Albrecht II (HRR)

Albrecht van Habsburg (Weenn, 16 ogustus 1397 - Neszmély, 27 oktober 1439), was van 1404 tout 1439 hertog van Oostnryk als Albrecht V, en van 1438 tout 1439 Roomse keunienk van ‘t Hillig Rooms Ryk als Albrecht II. Je was ook keunienk van Hongareye en Boheemn.

Zyn voader, hertog Albrecht IV van Oostnryk, stierf in 1404, en Albrecht was mo zeevn joar oud ost ‘n hem ipvolgde in ‘t hertogdom Oostnryk. Zyn nounkel Willem die ton an ‘t hoofd stound van under rivoaln, de Leopoldynn van den andern tak, was zyn regent, gevolgd deur zyn andere nounkels Leopold IV en Ernst den Yzern.

In 1422 trouwde Albrecht met Elisabeth van Luxemburg, dochter en ipvolgster van keunienk Sigismund van Hongareye, die loater ook keizer van ’t Hillig Rooms Ryk kwam en keunienk van Boheemn. Elisabeth was e dochter van Sigismund zyn twidde vrouwe en stamdeg of van d’oude Árpád dynastie van Hongareye.

Keizer Sigismund stierf in 1437. Den 1ste januoari 1438 wierd Albrecht tout keunienk van Hongareye gekrôond en je giengt hem doa vestign. Zes moandn loater kwamt ’n ook keunienk van Boheemn, mo zounder macht. Je was bezig met oorlog voern teegn de Boheemers en under Poosche boundgenôotn, ot ’n den 18ste moarte 1438 verkoozn wierd tout Roomse keunienk in Frankfurt am Main.

Je verdedigde Hongareye loater ook teegn d’Ottomoansche Turkn, en de 27stn oktober 1439 ist ’n gestorvn in Neszmély en j’is begroavn in Székesfehérvár.

Zyn nounkel Ernst den Yzern, die zyn voogd gewist was in 1406, was de voader van Frederik V van Steiermark, die Albrecht II loater ipvolgde als Frederik III van ’t Hillig Rooms Ryk. Frederik was ’n achterkozyn van Albrecht II en de voader van Maximiliaan van Oostnryk.

Achter Albrecht zyn dôod in 1439, kwam Frederik regent vor Albrecht zyn zeune Ladislaus Posthumus (1440–1457), die ton nog nie geboorn was. Ladislaus kwam keunienk van Boheemn en Hongareye, mo j’is jounk gestorvn in 1457.

Olhoewel dat Albrecht II nôoit tout keizer gekrôond is, was zyn korte regerienge toch styf belangryk, want met hem begost de lange reke van Duutse keuniengn en keizers van 't Huus Habsburg (1438-1740), en loater ‘t Huus Habsburg-Lotharingen tout in 1806, ’t ende van ’t Hillig Rooms Ryk.

Mêer ofbeeldiengn die ier by passn ku je vien in de categorie Albert II of Habsburg van Wikimedia Commons.