Arentshof

Van Wikipedia
De zudelikke pôorte tusschn de twi piloarn van de vroegere Woaterolle

Arentshof of ‘t Arentspark in Brugge is de noame van ’t park an ‘t Arentshuus, ’t classicistisch huus uut de 18e eeuwe van d’oadelikke familie Arents. ’t Ligt tusschn ‘t Groeningemuseum en Gruuthuse. Tout in de 17e eeuwe maktege ’t nog dêel uut van ’t Gruuthusedomein.

In 1909 wierd den hof achter veel processn ounteignd. De latstn eigenoare was Aquilin Arents de Beerteghem. D’architectn L. Viérin en U. Salmon miekn ‘t park lik da ’t nu is en de Bonifaciusbrugge wierd gebouwd vor e verbiendienge t’hen over de Bakkersreie me Gruuthuse. D’r kwam ook e nieuwe zudelikke pôorte in Groeninge. Deur de pôorte ku je de gietyzern zwoane zien, die gemakt is deur E. Simonis. De kop van de zwoane wordt gestrêeld deur iederêen die doa passeert. 't Joartal 1867 d'r boovn wilt ollêne mo zeggn da 't beeld ton vo de Magdalenakerke stound.

De toeristische peirdekoetsn kommn van den Dyver langs de nôordelikke pôorte ‘t park binn. Ze ryen d’r deure no Groeninge tusschn de twi piloarn van de Woaterolle dan ze gevoundn hen by de groafwerkn round 1910, ip den hoek van de markt en de Philipstockstroate, en in 1912 in ’t park gezet hen. D’r neffest stoan d’r vier bronzn peirdebeeldn van Rik Poot (1987), die de verschrikkiengn van d'apocalyps vôornstelln: oorloge, dôod, ipstand en hounger.

’t Pôortje in d’ôostmeur kwam ter in 1929 by den bouw van ’t Groeningemuseum. In ’t paviljoentje in ’n ôosthoek stoat er e kopie van e beeldje uut 1781, toegeschreevn an Pieter Pepers. ’t Is in 1972 gemakt deur de Brugschn beeldhouwer André Standaert en in 1974 angekocht deur ’t stad vo de Reiefêestn.

Reks he j’e schôon zicht ip Gruuthuse, met den oudstn gevel van 't Gruuthusehuus uut 1420, en d’Onze-Lieve-Vrouwekerke. ‘t Is êen van de schonste plekkn van Brugge en de Bonifaciusbrugge ziet er middeleeuws uut, mo ’t is e voorbeeld van historisch romantisme.

Rechtover 't Arentshuus stound 't koetshuus, die e vebouwienge zou gewist zyn van 't eigentlik gruuthuus, woa dat er gruutrecht most betoald wordn. 't Wierd ommegebouwd tout koetsmuseum en nu is e museumshop.

Wikimedia Commons