Atmosfeer (Sterre)

Van Wikipedia
Fotto genoomn in Vrankryk gedeurende de zunsverduusterienge van 11 ogustus 1999

Den atmosfeer van een sterre is 't butenste dêel van een sterre da boovn de kern, de radioasjezone en de conveksjezone van de sterre ligt. 't Bestoat uut verschillende dêeln mè verchillende eigenschappn:

De fotosfeer, die 't lêegstliggende en 't koelste dêel van den atmosfeer is, en 't dêel da me kunn'n zien. 't Is doar da 't licht van de zunne uut 't binnenste dêel noa buutn komt. De temperateure van de fotosfeer bedroagt omtrent 5780 K, binst da 't dêel woa dan der zunnevlekkn zittn zo'n 500-2000 K kouder is.

't Spectrum van direct zunnelicht up zêeniveau (rôod) en hoge in d' atmosfeer (gilve)

Boovn de fotosfeer ligt de chromosfeer die een zone van omtrent 2000 km dikke is, en da me as een oranje rienk kunn'n zien gedeurende zunsverduusteriengn. In de chromosfeer wordn bepoalde dêeln van de sterre zyn spectrum g'absorbèrd, wa dat anleidienge gift an karakteristiek absorptielynn die anduudn waffer scheikundige elementn der te viendn zyn in den atmosfeer van een sterre.

Boovn de chromosfeer ligt d' overgangszone, woardat de temperateure rap omhoge schiet over een ofstand van nie mêer dan 100 km. Doaboovn viendn me 't butenste dêel van de sterre zyn atmosfeer, de corona, een vrê din moa vrê hêet (~ 1 miljoen groan) plasma. Binst dan ol de sterrn up de hoofdreekse een overgangszone en een corona hên, is da nie 't gevol met olle sterrn. Moa vrê winnig reuzn en superreuzn hên een corona.

Gedeurende een volledige zunsverduusterienge is de fotosfeer van de zunne ofgedekt en zyn d' andere laagn van de atmosfeer zichboar. Ounder die omstandigheedn is de corona te zien as een oranje-rôo rienk, mè vantydn zunnevlammn, en de corona is te zien as een stroalnkrans (halo).