Bagynof (Brugge)

Van Wikipedia
Dit artikel es geschreevn in 't Brugs, en da zou best ozô bluuvn.

't Bagynof van Brugge

't Bagynof van Brugge (in andere stikkn van de provinsje zeggn ze begynof) is in 1245 gesticht deur gravinne Margaretha van Constantinopel, dochter van graaf Boudewyn IX van Vloandern, die toet keizer van Constantinopel gekroand was achter de vierde kruustocht.

Brugge no de pôorte van 't Bagynof

't Bagynof van Brugge, ôok wel Begijnhof Ten Wijngaerde genoamd, ee zun originèle middelèèuwse structeure kunn oeden. 't Is een geslootn of omriengd deur woater. Ip de pôorte wo da je deure moet vo binn te goan stoat er 1776, mo de mèèste uzetjes zyn uut de 17ste en 18ste èèuwe. Der zyn der een poar in neo-gotieke styl uut de 19ste èèuwe en in ’t zudelik dèèl zyn der zelfs nog een poar bewoard gebleven uut de 14ste en 15ste èèuwe. In 't grôotste uus weunde vroeger de ‘Grootjuffrouw’ die ’t bagynof leidige. In èèn van de uzetjes is ’t er een muzeum ingericht, ’t Bagynuzetje, wo da je ku zien oe dan de bagyntjes vroeger leefdigen.

De Sint-Elisabethkerke die by d'iprichtinge van ’t bagynof deur Margaretha van Constantinopel gebouwd was, brandige gedèèltelik uut in 1584, mo is eripgebouwd en ersteld en de werkn woaren in 1609 gedoan.

In ’t begun van de 20ste èèuwe woaren der verre gin bagyntjes me en dorom werd er beslôotn vo een dèèl van d'uzetjes omme te bouwen toet een klôoster. De vroegre bagyntjes zyn dus vervangen deur nunnen van d’Orde van St-Benedictus die in een angepaste tenue in ’t bagynof roendloopn.


't Bagynof van olbuutn, met ip den achtergroend 't Minnewoaterpark
Wikimedia Commons