Boreoale busschn van Kamtsjatka en de Koerieln

Van Wikipedia

Liggienge van de Kamtsjatka-Rieviere.
Liggienge van de boreoale busschn in de weirld.

De boreoale busschn van Kamtsjatka en de Koerieln, geleegn ip 't Kamtsjatka-Schiereiland, zyn 'n ekostreeke uut d' ekozôone Palaearctis vôgnst de Weirld Nateur-Stichtienge (WWF) [1][2][3]. Ze maakn dêel uut van 't bioom de boreoale busschn of de tajga. D' ippervlakte van d' ekostreeke besloa 1 528 092 êktoarn [4]. Vo de grôote ekoloogiesche rykdom is d' ekostreeke e dêel van de Global 200-streeke de "Tajga en graslandn van Kamtsjatka" [5].

Beschryvienge[bewerkn | brontekst bewerken]

't Êenige koniefeern-bus van êenigte betêeknisse ip 't schiereiland is dadde geleegn ip gemiddelde oogte, tusschn 1 000 en 1 200 meetrs, lanst de Kamtsjatka-Rieviere in de sentroale valleje van Kamtsjatka. 't Wordt ook "Koniefeern-eiland" gêetn deur de Russn en 't is 't mêest ôostlik geleegn vôorbeeld van 't Sieberiesch boreoal bus. De bioloogiesche rykdom is ier lêegre of ip 't vasteland angezien dat e deeprêsje zoendre boomn e schiddienge gift tusschn de tajgas van 't schiereiland en van 't vasteland. D' ekostreeke was in 't verleen styf beïnvloed deur de werkienge van vuulkoann, wat da ryke, vruchtboare groendn gegeevn êt.

Plantn-weirld[bewerkn | brontekst bewerken]

Boreoal bus ip Kamtsjatka.
Boreoal bus ip Kamtsjatka.

Die uutzoendrlikke ekostreeke telt 400 toe 700 sôortn plantn. Teegnwôordig zyn Jezo-sparre (Picea jezoensis) en Kajandre-lorke (Larix cayanderi) de boomsôortn die 't bus oovrêersn, dat ook e mienglienge bevat van Erman-berke (Betula ermanii), Kamtsjatka-berke (Betula kamchatica), Koerieln-lorke (Larix gmelinii var. japonica), elze en wilge. Sekundèère busschn van gemêenschappn van berkn en roatlpopliere (Populus tremula) vervangn de busschn die verstôord gewist zyn deur menschlikke tusschnkomste lik busbrand en oet-uutboatienge.

Bêestn-weirld[bewerkn | brontekst bewerken]

Dr verbluuvn in d' ekostreeke 120 toe 150 sôortn broedveugls, en 40 toe 50 sôortn zoogbêestn. De verscheidneid angt of van de beschikboareid van nateurlikke leefomgeevienge, in 't byzoendre van beschermde gebiedn lik 't Nasjonoal Park Bystrinsky, da e belangryk leefgebied is vo bruune beirn (Ursus arctos beringianus), soablemartre (Martes zibellina) en zêeoarend (Haliaeetus albicilla). Zeldzoame veugls zyn slichtvolke (Falco peregrinus), giervolke (Falco rusticolus) en Siebeeriesche oene (Falcipennis falcipennis). Zoogbêestn die gevoenn wordn in die valleje-busschn omvattn visottre (Lutra lutra), eeland (Alces alces), Europeesche beevre (Castor fiber), êrmelyn (Mustela erminea), en d' Eurazeoatiesche lynx (Lynx lynx). De mêeste bêestn verkiezn leefgebiedn roend de rieviern, lik dedeeze lanst de Kamtsjatka-Rieviere.

Bedreigiengn en beschermienge[bewerkn | brontekst bewerken]

Dr is mo 2,1 persênt van de koniefeern-busschn uut d' ekostreeke da nog nie verstôord is deur uutboatienge of busbrand. De busschn die kwetsboar zyn vor oetkap zyn mêesta geleegn in rieviere-bekkns, woadeure da de platsn vo de vôortplantienge van de zoalmn in gevoar kommn. Lik in andre dêeln van ôostlik Rusland, briengn de busbrandn verôorzakt deur de mensch veele schoa toe an de busschn van d' ekostreeke en ze leidn no de gruuj van andre boomsôortn of dedeeze die dr ôorsproenklik gruujdn. Mynbow vo goed te vienn, oolje-eksploroasje, stroopery en oentbusschienge bedreign 'n antal gebiedn.

Zied ook noa[bewerkn | brontekst bewerken]

Boreoale busschn uut 't Palaearctis
PA0601 Boreoale busschn van ôostlik Siebeerje Rusland
PA0602 Boreoale berkebusschn en alpiene toendra in Ysland Ysland
PA0603 Beikn en dinne gezoajde busschn van Kamtsjatka en de Koerieln Rusland
PA0604 Boreoale busschn van Kamtsjatka en de Koerieln Rusland
PA0605 Boreoale busschn van nôordôostlik Siebeerje Rusland
PA0606 Boreoale busschn van Okhotsk-Mantsjoerye Rusland
PA0607 Boreoale busschn van Sakhalien Rusland
PA0608 Skandienoavsche en Russiesche boreoale busschn Finland/Nôorweegn/Rusland/Zweedn
PA0609 Koniefeere-busschn van Transbajkal Mongoolje/Rusland
PA0610 Bergbusschn en toendra van den Oeral Rusland
PA0611 Boreoale busschn van westlik Siebeerje Rusland


Eksterne koppliengn[bewerkn | brontekst bewerken]

Verwyziengn[bewerkn | brontekst bewerken]

<references>

  1. (en) Ecoregion PA0604 : Kamchatka-Kurile taiga (WWF).
  2. (en) Ecoregion PA0604 : Kamchatka-Kurile taiga (Nationalgeographic).
  3. (en) Ecoregion PA0604 : Kamchatka-Kurile taiga (WWF).
  4. (en) Ecoregion PA0604 : Kamchatka-Kurile taiga (Globalspecies).
  5. (en) Kamchatka Taiga & Grasslands