Boudewyn VII van Vloandern

Van Wikipedia
Ga naar: Begunplekkn, zoeken
Boudewyn VII
1093 – 1119
Blason Comte-de-Flandre.svg
Groaf van Vloandern
Periode 1111 - 1119
Vôorganger Robrecht II
Ipvolger Karel de Goein
Voader Robrecht II van Vloandern
Moeder Clementia van Bourgondië

Boudewyn VII, bygenoamd Hapkin of met de Byle (1093Roeseloare, 17 juni 1119) was Groaf van Vloandern van 1111 tout an zyn dôod.

Je was achttien joar oud o zyn voader Robrecht van Jeruzalem stierf. In ’t begun dêeldegt ie de macht mè zyn moeder Clementia van Bourgondië, moar in 1113 kwoamn z’ol in ruuzje vor heur weeuwegoed.

Boudewyns kozyn Karel van Denemarkn, loater bygenoamd Karel de Goein, was zyn adviseur. Achter da Karels voader Knud IV van Denemarkn in 1086 vermôord was, was zyn moeder, Adela van Vloandern, weregekêerd met heur jounges noa ’t Vlams hof van heur voader Robrecht de Fries. Boudewyn arrangeerde in 1118 den trouw van Karel mè Margaretha van Clermont.

Boudewyn krêeg zyn bynoame deur zyn hardn anpak teegn bandietn, roofridders en rebellerende edeln. De steedn woarn binst de 12ste êeuwe tout stand gekommn en da veranderde de verhoudienge tusschn de groaf en zyn ridders. De steedn woarn de vyand van de ridders, die benouwd woarn dat hunder macht verminderde, en doarom mêer en mêer geweld begostn te gebruukn teegn de stadsbeweuners. De groaf stound wel an de kant van de steedn, want j’hoalde profyt uut hunder commerce.

Boudewyn wilde van in ’t begun orde ipstelln in zyn groafschap. De zesdn oktober 1111 riept ’n ol de Vlamsche edeln tegoare in Atrecht vo de Godsvrede te zweirn. Die Godsvrede was êest e gêestelikke instellienge, mo nu kost de groaf ook d’overtrediengn bestraffn.

Boudewyn stelde strienge wettn ip, woavan dan de mêeste gebaseerd woarn ip d’oude Salische wettn van Clovis I, die ton 600 joar oud woarn, en ook ip de Godsvredes die deur de bisschoppn gebruukt woarn in de 11ste en 12ste êeuwe.

Van ton droegt ’n ossan e byle by hem ols têekn van zyn bloedig recht. Van doa zyn bynoame Hapkin of Hapken, wat dat in dien tyd e klêne byle wilde zeggn. Niemand, uutgenoomn de baljuws en de beschermers van de groaf en de steedn, mocht nog woapns droagn.

Je bestrafte overtrediengn volgns de poenia talionis (oog om oog, tand om tand). Struukrovers wierdn ter plekke ipghangn. Je liet o.a. ip de mart van Brugge e ridder leevnd kookn, en ip de joarmart van Tourhout liet 'n tien rovers iphangn.

In 1105 ist ‘n getrouwd me Havoise van Bretagne, dochter van Alain IV van Bretagne. Je was ton 12 joar oud en zy 9 joar. Moar hunder trouw wierd in 1110 g’annuleerd deur den paus vo bloedverwantschap. Boudewyn zag zyn vrouwe styf geirn en j’is nôoit mêr hertrouwd.

J’is gestorvn an e blesseure, ipgedoan binst de Slag van Bures-en-Bray tusschn Hendrik I van Iengeland en Lodewyk VI van Vrankryk. Je wierd no ’t kastêel van Roeseloare gebrocht, woa dat ’n gestorvn is.

Deurdat ‘n gin jounges haad, duudegt ie Karel de Goein kort vo zyn dôod an ols zyn ipvolger. Zyn moeder Clementia van Bourgondië was doa teegn. Zy steunde Willem van Yper, ook e klêenzeune van Robrecht de Fries, mo Karel de Goein hèt et uutendelik ghoald.

Varia[bewerkn | brontekst bewerken]

Boudewyn VII verblêef styf geirn in ‘t Kastêel van Wyndoale, dichte by Thourout in ’t West-Vlams Houtland. Je liet vo zyn volk e sterk blound bier brouwn deur de Cisterciënzerpoaters van d’abdye Ter Duunn. ’t Most hem en zyn leger ounoverwinnelik moakn.

't Bier ligt an de boasis van ’t achter hem genoemd Hapkin bier of Thouroutenaere, die êest gebrouwn wierd deur de Brouwery Louwaege uut Kortemark. In 2002 wierd de brouwerye overgepakt deur Alken-Maes.