Cyriel Van Hauwaert

Van Wikipedia
Ga naar: Begunplekkn, zoeken
Dit artikel es geschreevn in 't Môoslees, en da zou best ozô bluuvn.

Cyriel "in actie"

Cyriel Van Hauwaert, officieel "Cyrille van Hauwaert", (Môoslee, 16 december 1883 - Zellik, 15 februoari 1974) wos e West-Vlamsche coureur.

Cyriel Van Hauwaert wos als joenk vintje stookre in d'alkoholfabrieke van Camiel Lammertyn. Je moste van zynen boas wok d'handelsbrievn oltemets me zyn velo roenddroagn, ofdat da nu in Môoslee wos of in Ostende. Camiel Lammertyn zoag rap dat Cyriel koersebêenn had en kochte ne koersevelo vor hem. Vanof zyn 14 moest ie no Vrankryk in de stêenovens goan werkn. Da wos zwoar labeur vo winnig geld ... Doarom wilde ie in Vrankryk goan koersn, omdat ie wiste da ze doa toamlik veel geld kostn verdienn. De grôte velofabriekn haddn ol eigen ploegn en ne coereur krêeg materioal en helpers van under.

In 1907 trok Van Hauwaert noa Parys vo te proberen te startn in Parys-Roubaix. Moa van de direksje kreegt'en gêen gangmoakers. Ze wilden zyn kostn vo de terugreize betoaln, moa da wos nie nôdig: je wos me zyn velo noa Parys gekommn. Je startte toch, volgenst de legende "me twêe reservetuben, twêe eiers en 'n floske limenoade". An den arrivee in Roubaix wos tie twidde, achter 'n volparty kort voa 't binnryen van de velodrom. Twêe moandn loatre woen tie Bordeaux - Parys. Doardeure wierd ie in België lik nen nationoalen held oentvangn.

De velosport wierd wok van langsom poppulairdre. Vele joenge gasten begosten wok te koersn omda ze zoagn dat er mêer mee te verdienn viel dan me te goan werkn. Van Hauwaert krêeg noamelik zêre 'n contract van ne Franske ploeg en je verdiende 3000 fr in e moand.

Je wos dus eigentlik den êesten Flandrien en je krêeg de bynoame "De Leeuw van Vloandern".

In Môoslee es 't er 'n stroate genoemd noar em.

Cyriel met 90 jarige vader by 't ouderlyk uus in Slyps

Vôornamste uutsloagen[bewerkn | brontekst bewerken]

  1. 1907: 2e in Parys - Roubaix
  2. 1907: 1e in Bordeaux - Parys
  3. 1908: 1e in Miloan-San Remo
  4. 1908: 2e in Belgisch kampioenskap
  5. 1908: 1e in Parys-Roubaix
  6. 1908: 2e in Parys - Brussel
  7. 1908: 2e in Bordeaux - Parys
  8. 1909: 1e in Belgisch kampioenskap
  9. 1909: 1e in 2e rit Roende van België, Yper
  10. 1909: 1e in 4e rit Roende van België, Noamen
  11. 1909: 3e in klassement Ronde van België
  12. 1909: 1e in 1e rit Tour de France, Roubaix
  13. 1909: 1e in Bordeaux - Parys
  14. 1910: 1e in Parys - Mêende (Nederlands: Menen)
  15. 1910: 2e in Parys - Roubaix
  16. 1910: 4e in klassement Tour de France
  17. 1910: 3e in Parys - Brussel
  18. 1911: 3e in Belgisch kampioenskap
  19. 1911: 3e in Parys - Roubaix
  20. 1911: 2e in Parys-Tours
  21. 1911: 2e in Zottegem
  22. 1911: 3e in Roende van Lombardeye
  23. 1912: 2e in Zesdoagse van Brussel
  24. 1913: 2e in Bordeaux - Parys
  25. 1913: 2e in Parys - Brussel
  26. 1914: 1e in Zesdoagse van Brussel
  27. 1914: 3e in Bordeaux - Parys
  28. 1915: 1e in Zesdoagse van Brussel

Achter zyn lôopboane als coureur èt ie de bloeinde zoake 'Cycles Van Hauwaert' op den Boulevard des Fusillés in Ronse upgericht.