De Slimste Mens ter Wereld

Van Wikipedia

De Slimste Mens ter Wereld is e tilleviezjequiz woavan dan der tusschn 2003 en 2011 neegn uutgezoendn zyn up één. Vanof de tienste reekse in 2012 wordt 't program uutgezoendn ip de zender Vier. Oundertusschn loopn der oek reeksn in Olland en Turkeye. I Vloandern is 't en indeliks populair programma, me vele kêern mêer of e meljoen kykers.

Concept[bewerkn | brontekst bewerken]

't Concept is simpel: drie bekende menschn probeern voen seconn te verdienn deur goeie antwôordn te geevn. 'n Dien me de mêeste seconn, goat deure no de noaste ofleverienge. De twêe aar speeln toene de finalle en 'n dien die doarin up nul komt, vliegt deruut. 'n Dag derup komt er toene e nieuwn kandidoat meidoen.

Uutendelik telln ze toene de dêelnoames up en de beste dêelnemers doen toene in de latste weke mei an de finalleweke, tope me de twêe overbluvers van de vorlatste weke. De winnoare van de finalleweke is toene de slimstn mens van de wereld.

Roendes[bewerkn | brontekst bewerken]

3-6-9[bewerkn | brontekst bewerken]

De drie dêelnemers begunn ollemoale me 60 seconn. Ze kunn in d'êeste rounde gin tyd verliezn. 'n Lienkschn begunt te antwôorn up de vroagn die esteld zyn. Je ku mo 10 secondn verdienn a je 't juuste antwôord gift up vroage 3, 6, 9, 12 en 15.

Open Deur[bewerkn | brontekst bewerken]

Drie aar bekende menschn stelln e vroage en byn die vroage moet 'n kandidoat die de vroage stelt, 4 antwôorn kunn geevn. Lukt dadde nie, toene meugn d'aar kandidoatn trachn voen d'antwôorn die der nog nie stoan, te geevn. Per antwôord zyn der 20 secondn te verdienn, mor oundertusschn lopt 'n tyd van 'n dien of dedie die bezig is, wel of.

Puzzel[bewerkn | brontekst bewerken]

In e rôoster stoan der 12 wôorn, woavan dan der drie keirs viere elienkt zyn, 'n kandidoat moet de 3 lienkn kunn vienn en doavôorn krygt 'n per juust antwôord oek 20 seconn. D'aar kandidoatn meugn oek anvulln.

E vôorbeeld zoe kunn zyn: Ploegsteirt, oend, Mattan, Luuk-Bastenoakn-Luuk, die tope Frank Vandenbroucke zoun uplevern.

Gallerij[bewerkn | brontekst bewerken]

Iedern dêelnemer ziet 10 fotto's en moet antwôorn, voen 10 seconn per juust antwôord. D'antwôorn die nie egeevn zyn, meugn anevuld zyn deur d'aar kandidoatn.

Vroeger wos er Ingelijst, woarin dan der lystjes woarn (lik de personoages van Jommeke of de Vlamsche steejn met e Grôte Mart) en de kandidoatn moestn toene ek up ze toer en antwôord geevn voen 10 seconn. Byn e verkêerd antwôord, mucht je nie mi meidoen.

Collectief Geheugen[bewerkn | brontekst bewerken]

Iedern kandidoat krygt e stiksje beeld en doarover moetn der 5 antwôorn egeevn zyn. 't Êest antwôord is 10 seconn weird, 't twidde 20 en 't vuufde 50. In totoal kun der dus 150 seconn ewonn zyn. D'antwôorn die nie egeevn zyn, meugn d'aar kandidoatn probeern te geevn.

Finale[bewerkn | brontekst bewerken]

De twêe verliezers speeln de finalle. 'n Dien me de minste seconn, begunt. E krygt e vroage en moet doarup 5 antwôorn trachn te geevn. Per juust antwôord, goan de 20 seconn of van 'n aarn. At 'n kandidoat nie olle antwôorn ku geevn, meugt 'n aarn anvulln en kut 'n dus oek zorn dat 'n êestn seconn verliest. 't Is surtout slim van up 't ende (an olletwêe de kandidoatn ounder de 100 seconn zittn), je tyd te loatn zakkn ounder 'n tyd van je teegnstander, zodoanig daj ku begunn antwôorn up de noaste vroage en 'n aarn up nul ku krygn.

Menschn[bewerkn | brontekst bewerken]

Presentoasche[bewerkn | brontekst bewerken]

In 't begun wos 't Bruno Wyndaele die 'n quiz presenteerde. Nu is 't ol êentige joarn Eric Van Looy.

Jury[bewerkn | brontekst bewerken]

Marc Reynebeau wos 'n keirel die zorde voen de kluchtjes en die de kandidoatn e bitje probeerde belachelik te moakn. Loater is 'n upevolgd deur Rik Torfs. Vanof sizoen 8 bestoat de jury uut kluchtige duo's die iedere kêer ofwisseln.

Winnoars[bewerkn | brontekst bewerken]

  • 2003: Alain Grootaers wint de finalle teegn Ben Crabbé, derdn is Paul D'Hoore
  • 2003: Stany Crets wint de finalle teegn Yves Desmet, derdn is Ivan De Vadder
  • 2004: Bert Kruismans wint de finalle teegn Koen Fillet, derde is Greet Op de Beeck
  • 2005: Wouter Deprez wint de finalle teegn Bart Peeters, derdn is David Davidse
  • 2006/2007: Steven Van Herreweghe wint de finalle teegn Marc Reynebeau, derdn is Karl Vannieuwkerke
  • 2007: Annelies Rutten wint de finalle teegn Hans Bourlon, derde is Eva Brems
  • 2008/2009: Freek Braeckman wint de finalle teegn Bart De Wever, derdn is Lieven Verstraete
  • 2009/2010: Linda De Win wint de finalle teegn Peter Vandermeersch, derdn is Bent Van Looy
  • 2010/2011: De Allerslimste Mens ter Wereld: Bert Kruismans wint de finalle teegn Stany Crets, derde is Eva Brems
  • 2012: Tomas Van Den Spiegel wint de finalle teegn Magali Cobbaert, derdn is Otto-Jan Ham
  • 2013: Gilles De Coster wint de finalle teegn Jelle Cleymans, derdn is Prem Radhakishun
  • 2014: Adil El Arbi wint de finalle teegn Bart De Pauw, derdn is Gert Verhulst
  • 2015: Tom Waes wint de finalle teegn Danira Boukhriss, derdn is Kobe Ilsen

West-Vlamsche dêelnemers[bewerkn | brontekst bewerken]

't En ol e masse West-Vloamiengn meiedoan en êen et er kunn winn: Wouter Deprez.

Buutn Wouter Deprez en oundermêer Vincent Van Quickenborne, Michiel Devlieger, Michiel Hendryckx, Peter Vandermeersch, Johny Vansevenant, Jean-Marie Dedecker, Friedl' Lesage, Kurt Van Eeghem, Joke Devynck, Marc Van Eeghem, Chris Dusauchoit, Caroline Van den Berghe, Yves Leterme, Kamagurka, Maaike Cafmeyer, Guido Depraetere, Karl Vannieuwkerke, Gunter Lamoot, Mia Doornaert, Liesa Naert, Piet Huysentruyt, Geert Lambert, Lieven Verstraete, Johan Vande Lanotte, Phaedra Hoste, Sophie Dewaele, Steven Vanackere, Luk Alloo, Els Pynoo, Lien Van de Kelder, Ann De Craemer, David Galle, Evy Gruyaert, John Crombez, Wendy Van Wanten, Sam Louwyck en Ann Tuts meiedoan.

Externe koppelienge[bewerkn | brontekst bewerken]