De Slimste Mens ter Wereld

De Slimste Mens ter Wereld is e tilleviezjeprogramma up één. 't Is nu ol an ze zevenste reekse bezig en oundertusschn loopn der oek reeksn in Olland en Turkeye. I Vloandern is 't en indeliks populair programma, me vele kêern mêer of e meljoen kykers.

Concept

't Concept is simpel: drie bekende menschn probeern voen seconn te verdienn deur goeie antwôordn te geevn. 'n Dien me de mêeste seconn, goat deure no de noaste ofleverienge. De twêe aar speeln toene de finalle en 'n dien die doarin up nul komt, vliegt deruut. 'n Dag derup komt er toene e nieuwn kandidoat meidoen.

Uutendelik telln ze toene de dêelnoames up en de beste dêelnemers doen toene in de latste weke mei an de finalleweke, tope me de twêe overbluvers van de vorlatste weke. De winnoare van de finalleweke is toene de slimstn mens van de wereld.

Roendes

3-6-9

De drie dêelnemers begunn ollemoale me 60 seconn. Ze kunn in d'êeste rounde gin tyd verliezn. 'n Lienkschn begunt te antwôorn up de vroagn die esteld zyn. Je ku mo 10 secondn verdienn a je 't juuste antwôord gift up vroage 3, 6, 9, 12 en 15.

Open Deur

Drie aar bekende menschn stelln e vroage en byn die vroage moet 'n kandidoat die de vroage stelt, 4 antwôorn kunn geevn. Lukt dadde nie, toene meugn d'aar kandidoatn trachn voen d'antwôorn die der nog nie stoan, te geevn. Per antwôord zyn der 20 secondn te verdienn, mor oundertusschn lopt 'n tyd van 'n dien of dedie die bezig is, wel of.

Puzzel

In e rôoster stoan der 12 wôorn, woavan dan der drie keirs viere elienkt zyn, 'n kandidoat moet de 3 lienkn kunn vienn en doavôorn krygt 'n per juust antwôord oek 20 seconn. D'aar kandidoatn meugn oek anvulln.

E vôorbeeld zoe kunn zyn: Ploegsteirt, oend, Mattan, Luuk-Bastenoakn-Luuk, die tope Frank Vandenbroucke zoun uplevern.

Gallerij

Iedern dêelnemer ziet 10 fotto's en moet antwôorn, voen 10 seconn per juust antwôord. D'antwôorn die nie egeevn zyn, meugn anevuld zyn deur d'aar kandidoatn.

Vroeger wos er Ingelijst, woarin dan der lystjes woarn (lik de personoages van Jommeke of de Vlamsche steejn met e Grôte Mart) en de kandidoatn moestn toene ek up ze toer en antwôord geevn voen 10 seconn. Byn e verkêerd antwôord, mucht je nie mi meidoen.

Collectief Geheugen

Iedern kandidoat krygt e stiksje beeld en doarover moetn der 5 antwôorn egeevn zyn. 't Êest antwôord is 10 seconn weird, 't twidde 20 en 't vuufde 50. In totoal kun der dus 150 seconn ewonn zyn. D'antwôorn die nie egeevn zyn, meugn d'aar kandidoatn probeern te geevn.

Finale

De twêe verliezers speeln de finalle. 'n Dien me de minste seconn, begunt. E krygt e vroage en moet doarup 5 antwôorn trachn te geevn. Per juust antwôord, goan de 20 seconn of van 'n aarn. At 'n kandidoat nie olle antwôorn ku geevn, meugt 'n aarn anvulln en kut 'n dus oek zorn dat 'n êestn seconn verliest. 't Is surtout slim van up 't ende (an olletwêe de kandidoatn ounder de 100 seconn zittn), je tyd te loatn zakkn ounder 'n tyd van je teegnstander, zodoanig daj ku begunn antwôorn up de noaste vroage en 'n aarn up nul ku krygn.

Menschn

Presentoasche

In 't begun wos 't Bruno Wyndaele die 'n quiz presenteerde. Nu is 't ol êentige joarn Eric Van Looy.

Jury

Marc Reynebeau wos 'n keirel die zorde voen de kluchtjes en die de kandidoatn e bitje probeerde belachelik te moakn. Oendertusschn is 'n upevolgd deur Rik Torfs.

Winnoars

• 2002: Alain Grootaers wint de finalle teegn Ben Crabbé
• 2003: Stany Crets wint de finalle teegn Yves Desmet
• 2004: Bert Kruismans wint de finalle teegn Koen Fillet
• 2005: Wouter Deprez wint de finalle teegn Bart Peeters
• 2007: Steven Van Herreweghe wint de finalle teegn Marc Reynebeau
• 2007: Annelies Rutten wint de finalle tegen Hans Bourlon
• 2008 / 2009: Freek Braeckman wint de finale tegen Bart De Wever

West-Vlamsche dêelnemers

't En ol e masse West-Vloamiengn meiedoan en êen et er kunn winn: Wouter Deprez.

Buutn Wouter Deprez en oundermêer Karl Vannieuwkerke, Liesa Naert, Martine Tanghe, Piet Huysentruyt, Gunter Lamoot en Lieven Verstraete meiedoan.

Externe koppelienge

• Site van 't programma