De stoeten Ostendenoare

Uit Wikipedia

De stoeten Ostendenoare is een mysterieuze actiegroep die ’t gemunt eit ip de monumentn ter êre van keunienk Leopold II in Ostende.

Justitie in Brugge is an ’t uutzoekn wien dat er achter de groep zit moa z’en nog niks gevoundn. In januoari 2004 et de actiegroep een and ofgezoagd van ’t monument “Dank der Congolezen”, een dêel van de de Drie Gapers, een beeldngroep ip de zêedyk van de twi broers architectn Cortens (1931). Ip een plakkoat an ’t monument stoat: “Dank van de Congolezen aan Leopold II om hen te hebben bevrijd van de slavernij van de Arabieren”. Volgens de Stoeten Ostendenoare is da peur revisionisme. Keunienk Leopold II bestierde Congo lik zyn persôonlik bezit en je schoakelde sloaven in ip zyn rubberplantages. En ot de Congolezen te lui bevoundn woaren wierdn under andn ofgekapt. Doarom et de actiegroep een and ofgezoagd van êen van de Congolezen van de beeldngroep. Azo is ’t beeld realistischer. En ’t stadsbestier van Ostende e nu beslist van ’t beeld nie te loatn vermoakn omdat de scheepn van ountwikkeliengssoamenwerkienge vindt dat ’t monument nu inderdoad beter beantwoordt an de “historische werkelijkheid”. De stoeten Ostendenoare et in een e-mail an ’t stadsbestier van Ostende loatn weetn da ze ’t and willen weregeevn ip vôorwoarde da ze ’t plakkoat vervangen deur de in New York American gepubliceerde foto’s in 1906 van Congolezen me ofgekapte andn.

[bewerkn] Varia

• De stoeten Ostendenoare was van 1976 toet begin joaren negentig ook de noame van een bekend satirisch blad in Ostende. Ze schrêven sproakmoakende artikels en journalistieke reeksn.
• In Blanknberge et de politieke partye “Dwars” van Piet Wittevrongel ook een anvroage ingediend an ’t stadsbestier vor een plakkoat te zettn by ‘t Monument van Lippens en De Bruyne met uutleg over wat dat er echt gebeurd is in uus koloniaal verleedn.