Frietn

Van Wikipedia
Kiekn met frietn

Frietn (of frittn, frits) zyn in stoafkes gesneen patattn die in frietvet gebakkn zyn. Frietn zyn vree populair en typisch voe België. Ip stroate kun je doa vele frietkoten viendn.

Typisch an Belgsche frietn is da ze twêe keirs gebakkn zyn. De vôorbak deurt e goe vuuf menuutn (150 °C), toet dan de frietn begunn te 'zingn'. Doarachter lat je de frietn rustn en toen bak je ze nog e twidde ki (180 °C) toet dan ze schône geel-bruun zyn.

Frietn eetn me in België mêestol me mayonaise op. Oek meugelik zyn: ketchup, piekels, tartaar, of stoofvlêessause.

Et ountstoan van de frittn[bewerkn | brontekst bewerken]

Dit ôofdstik es geschreevn in 't Kortryks.

Wannêer frittn nu juste zyn ountstoan es nie zô hêel deudelik. Ôok wien dat er nu juste ip et gedach gekoomn es om patattn in stikskes te snyn en in vet te frituurn es nie bekend. Den Belgieschn historicus Jo Gérard gingt er van uut dan de frittn zekerst oal bestonn in den 16n êeuw en dus toen ôok kunn zyn ountstoan uut et gebruuk om viskes te frituurn. Nem zegt y da bist de winter toen dat 't woater oallemoale bevroorn ô en er niemê kost wordn gevist, dan de minsn patattn in klêene visvormkes sneen en azôo in 't fritvet smeetn. Azôo an ze allik etwa dat erip trok.

French fries[bewerkn | brontekst bewerken]

De mythe doet de rounde da et ountstoan van dien term zen oorsproungg kent beist den Êestn Weireldoorloge. Ton datn Iengelsman in België arriveerde, makte y kennisse met 't Belgisch leger en dus ôok met uuze frittn. Agezien dat de voertoale van 't Belgisch leger in dien tyde nog oassan 't Frans wa zeidn d'Iengelse der "French fries" teegn. Der wordt echter agenomn da et 'french' komt van et werkwoord 'to french' (wa wil zegn in frietn snyen). Een andere plausibele theorie is da Thomas Jefferson de term uutgevounden et ton dat n frietn beschreef als pommes de terres frites, woar da 'frites' et voltooid dêelwoord es van et Fransche frire, die 'int vet bakn betêkent [1].