Guido Depraetere

Van Wikipedia
Dit artikel es geschreevn in 't Yzegems, en da zou best ozô bluuvn.

Guido Depraetere (Yzegem, 26 november 1946 - Roeseloare, 12 ogustus 2006) was ne presentateur, producer en de mede-iprichtere van VTM.

Vô zyn televisiecarrière[bewerkn | brontekst bewerken]

Guido studêerdege vo regent wiskunde en wierd leroare. Mo ie was 't ie ook aktief by de skoets, speeldige klarinette by de St-Leoharmonie in Brugge en surtout wierd ie bekend ols discjockey by Studio Barcka.

Polletiek[bewerkn | brontekst bewerken]

By de kiezienge van 1970 (Grôot Brugge) wierd Guido gekozen ols gemêenteroadslid vo de CVP (nu CD&V). J'is da gebleven tot in 1982.

Van den BRT noar de VTM[bewerkn | brontekst bewerken]

In 1977 begost Guido Depraetere te werkn by den BRT (nu VRT). Je makte zêre carrière. Êerst was 't ie producer by Omroep Brabant (de radio), loater producer van programs lik Spel Zonder Grenzen, Hoger Lager en TV Touché.

A je 'Guido' zegt, zeg je wok 'Mike'. T'ope me Mike Verdrengh giengk Guido weg by den BRT vo de VTM ip te richten, den êste commerciezender van by oes. VTM begost ermee den eerste februoari 1989. Guido Depraetere wos nie alleene directeur van den VTM, je presentêerdige ie wok zelve programs lik Klasgenoten en HT&D.

In 1996 trokken Depraetere en Verdrengh d'er van oender by VTM. Ze woarn ni mi t'akkôord over de programs en over de bespoariengen. De bestierders en 't under beklaagd en Mike e Guido mochten ol een achterportje were binn (ze wieren 'externe consulenten').

Baziel[bewerkn | brontekst bewerken]

Guido Depraetere leerdege van Andries Van den Abeele de figeure van Baziel kennen. Je verteldege in HT&D (e program mè kluchtjes ip VTM) ip 't ende oltyd een grapke over Baziel. Baziel was min of meer ne broavn West-Vlamieng, mo gin ol te rappn. De Baziel-kluchtn woaren populair, want e bitje loater maktege Depraetere ook boekskes over Baziel. Ieder weke stond er azo een tekeningske van Baziel met êen van z'n kluchtjes in de West-Vlamsche gazette. Loater is 't ie ton nog enigte kêeren ipgetreden in theoters me e hele reke Bazielkluchtn.

Populaire vint[bewerkn | brontekst bewerken]

Ip 't ogenblik da Guido tielik es gestorven van de kanker, was 't er niemand die ook mor êen kwoad woord over hem kostege zeggn. Je was 't ie overolst in ol de middens wor da 't ie kwam vree geirn geziene. Je was ook oltyd styf Bruggeliengk gebleven en je 'n ad er nooit an gepeisd van no Brussel te goan weunn. Je gienk liever olle dagen ip en of. Azo was 't ie nie olleenliks dichte by 't vrouwtje en de joengens, mor wok by zijn vele vrienden. Olle dunderdage gieng 't ie een spelletje poker goan spelen, lange joaren in de 'Café du Théatre' en loater in 't 'Zwart Huus'. De zoaterdagnoene was 't by zyn moatn vo den aperitief. In de laatste joaren van zijn leven gieng 't ie ook geiren gon golven, zowel in Yper, Damme of elders, mor ook in 't buutnland.

Guido was ook ridder in d'Orde van 't Mannetje van de Moane.