Intespuger

Van Wikipedia
Ga naar: Begunplekkn, zoeken

De geweunn intespuger (Sepia officinalis) is de bekendstn intevis in uze streke.

Uutzicht[bewerkn | brontekst bewerken]

Intespugers kunn 50 cm grôot wordn. Z'hèn e brêed, ofgeplat lyf mè vinn langst hêel under zykant. Z'hèn tien oarms mè vier reekn zuugnappn en een inwendige skeletschelpe. Da rikschild ligt dikwils angespoeld ip 't strange en wordt zêeschuum genoemd.

De sôorte die in uze woaters vôornkomt hè bruunwitte striepn, moa ze zyn in stoat van da patrôon te verandern deur 't t'hopetrekkn van microscopisch klêne spiertjes in under vel woadeure dan z'under pigmentcelln loatn krempn of uutzettn. Ze krygn ton andere kleurpatrôonn woadeure dan z'under perfect kunn anpassn an den oendergroend. Binst de poarienge verschietn ze rap van kleur en ze zyn dikwils wit on ze dul zyn.

Leevnswyze[bewerkn | brontekst bewerken]

Intespugers speitn e zwarte vloeistoffe on z'under bedreigd voeln. De vintjes wordn nie ouder of 2-3 joar, de wuvetjes leevn zelfs moar één joar.

Eetn[bewerkn | brontekst bewerken]

Sepia's joagn 's nachts ip krabbn en geirnoars, moar ook ip vissn. Tusschn under 8 geweune tentoakels zittn 2 langere vangoarms die allêne te zien zyn on z'under prôoie grypn. Ze zoekn under eetn ip e speciale maniere. Ze zwemmn styf troage over de zêebodem, binst dan ze woaterstroaltjes bloazn over 't zand vo de prôoie te doen verschietn. Vo dan de bêestjes de keure hèn vor under were in te groavn, wordn ze styf rap vaste gepakt met de twi vangoarms en noa de snoavelachtign bek gebrocht.

Vôortplantienge[bewerkn | brontekst bewerken]

De poartyd is surtout in april en meie. 't Vintje briengt e pakketje sperma over in de trechter van 't wuvetje. Direct derachter legt ze eitjes die der uut zien lik druvetrossn en zwart-purper van kleur zyn. Ze wordn bevestigd an e stêen of an andere diengn die uutsteekn in 't woater.

Achter de poaityd bluuft 't wuvetje achter en sterft. 't Vintje trekt were noar oopn woater, moa komt ook nie ouder of drie joar. De joengsjes bluuvn nog een ende in oendiep woater en duukn under weg tusschn de wiern.

Verspreidienge en leefgebied[bewerkn | brontekst bewerken]

Intespugers kommn vele vele vôorn an de Vlamsche en d'Hollandsche kust, surtout in de Nôordzêe en d' Ôosterschelde.

De sepia's overwientern in de diepere woaters van 't continentoal plat. Os 't woater 12 groadn hèt kommn ze noar oendiep woater vo te poain. In de lente zyn ze goed te zien oender woater.

Externe koppelienge[bewerkn | brontekst bewerken]

Wikimedia Commons