Ippolito de' Medici

Van Wikipedia
Ippolito de' Medici
1511- 1535
Ippolito de’ Medici deur Titiaan
Signore (hêre) van Firenze
Periode1523-1527
VôorgangerKardinoal Giulio de' Medici
IpvolgerRepubliek 1527-1530
Alessandro de' Medici
1530-1532
VoaderGiuliano di Lorenzo de' Medici
MoederPacifica Brandano
Dynastie
Huus Medici

Ippolito de’ Medici (Urbino, 1511Itri, 10 ogustus 1535 was den ounwettign en ênigstn zeune van Giuliano, hertog van Nemours.

Zyn leevn[bewerkn | brontekst bewerken]

Ippolito was mo vuuf joar oud os zyn voader stierf in 1516. Zyn nounkel paus Leo X liet hem by hem no Rome kommn, woa da kardinoal Bibbiena vor hem zorgde.

Loater groeideg’t ie ip in de Palazzo Medici in Firenze, tegoare met Alessandro, de zeune van Giulio de’ Medici en Catharina, de dochter van Lorenzo II. Hunder ipvoeder was kardinoal Passerini.

O Giulio in 1523 verkoozn wierd tout paus Clemens VII, liet ‘n Ippolito regeern over Firenze.

Achter de plunderienge van Rome in 1527, deur de troepn van Karel V, profiteerdn de Florentynn van de chaos in Italië, en ze voerdn de republiek were in. De Medici mostn vluchtn. Achter drie joar, in de zomer van 1530, kostn ze were an de macht kommn me d’hulpe van ’t keizerlik leger.

Mo Clemens dêed er nu olles an vo zyn eign zeune Alessandro signore te moakn, in de plekke van Ippolito.

Ippolito had hem pertang ol goed voorbereid ip zyn toake en je was styf goe gezien in Firenze, in teegnstellienge tout Alessandro, die doa nie geirn gezien was deur zyn grof, arrogant, ounbeschoft en gewelddoadig karakter.

Vor Ippolito uut Firenze te krygn benoemde Clemens hem tout kardinoal, en je zound hem vor e politiekn ipdracht nor Hongareye. Ippolito verzetteg’ hem uut olle macht want j’had ‘n ofkêer van olles wa da met e gêestelikke carrière te moakn had. Je was liever soldoat gewist. Mo je most luustern no de paus.

Je was nog mo juste vertrokkn of de republiek wierd ofgeschaft, en Clemens stelde Alessandro an ols signore van Firenze. Je was ton 19 joar oud.

Zyn dôod[bewerkn | brontekst bewerken]

In 1535 krêeg Ippolito ipdracht van de verdreevn Florentynn, vo te goan klappn me Keizer Karel, vor Alessandro of te zettn. Keizer Karel zat ip da moment in Tunis.

Os Ippolito toe kwam in Itri, in de Kerkelikke Stoat, woa dat ‘n de bôot most pakkn no Tunis, kwamt ‘n ziek. Ênigte doagn loater stierft ‘n, officieel an Malaria. Mo je zou vergiftigd gewist zyn in ipdracht van Alessandro.