Jacobus Clemens non Papa

Van Wikipedia

Jacob (Jacobus) Clemens non Papa (Middelburg? ca. 1510 - Diksmude, 1555 of 1556) was e Renaissancecomponist uut de Franco-Vlamsche Schoole.

Biografie[bewerkn | brontekst bewerken]

Tenorpartye van't mêerstemmige liêd "Te Schepe Wart" van Jacobus Clemens non Papa, in de lezienge van't liedboek: "Nievve Dvytsche Liedekens, met III. IIII. V. VI. ende VIII. partyen", gedrukt in Maastricht deur Jacob Baethen in 1554

Er wordt verteld dat ie zyn byname "non Papa" an emzelve hed gegeven omdat de mensen nie zoun missen met den Ypersen dichter Clemens Papa (Clément de Paepe). Ook de paus (Latyn: papa) hêette tonne Clemens. Andere bronnen beweiren dat er gin redenen vôoren zyn voe da te geloven. Soms wordt ôok gesuggirird dat ie d'anduudienge 'Clemens, niet de paus' voe de klucht aad.[1]

Van zyn leven is winnig bekend. Je was afkomstig uut één van de zeventien Provinsjes van het België van vandage of Holland (misschien wel Zêeland). Zyn êeste compositie verschêen in 1536. In moarte 1544 wierd ie benoemd toet zangmêester aan de Sint-Donaaskathedroale van Brugge. Achter e joar gienk t'je weere weg van Brugge. Je gienk e zakelikke reloasje an met den Antwerpsen muziekuutgever Tielman Susato, die toet an Jacobus z'n dôod de mêeste van zyn werken zoud uutgeven. Tusschen 1545 en 1549 was't je woarschynlik werkzaam an't hof van Filips van Croÿ, ertog van Aerschot en generoal van keizer Karel V. In 1550 was't je drie moanden te gast in 's-Hertogenbosch by d'Illustere Lieve Vrouwenbroederschap. In 1551/1552 was't je meugelik te gast in Leiden; In de Leidse kôorboeken, afkomstig uut de Pieterskerke, zyn hêel vele van zyn werken, oender andere e cyclus Magnificat-zettiengen. Volgenst Antonius Sanderus is't je begraven in de grôote kerke van Diksmude.

In tegenstellienge toet e poar van zyn tydgenôoten lykt Clemens nooit nor Italië te zyn gewist. Zyn styl is "nôordelik" gebleven zoender Italioanse invloeden. J'et vele composities geschreeven, oender andere 15 messen, mêer dan 200 motetten en vier boeken met in totoal 159 driestemmige psalmen in 't Hollands (souterliedekens). Die wierden uutgegeven deur Tielman Susato in Antwerpen.

Herdenkingsjoar 2012[bewerkn | brontekst bewerken]

In 2012 wierd, oender name "Clemens500" Clemens' [geschatte] vuufhoenderste gebôortejoar erdacht in e par steden woar dat'jie actief zoe zyn gewist[2]

Referenties[bewerkn | brontekst bewerken]

  1. Atlas 1998: pp. 397-8
  2. clemens500.be
Wikimedia Commons

Externe links[bewerkn | brontekst bewerken]