Jan Wittoen

Jan Wittoen was ‘n Ôostkampse ridder uut de 15ste êeuwe. Je wordt ook soms Jan Winteyn genoemd. Je trouwde mè jounkvrouwe Ligarde Baefs, dochter van Jacob.

In 1417 wast ie hêre van d’heerlikheid Orskamp (nu Ôostkamp) en burgemêester van ‘t Brugse Vrye. In ’t noajoar van 1419 vocht ie mee an de kant van hertog Filips de Goein.

In 1433 krêegt ie miserie deurdat er e pôorter van de stad Gent, Henri van de Camere, hem e proces an dêed. Je beweirde dat ênigte persêeln uut d’heerlikheid Orskamp van hem woarn. Vuuf scheepns van Brugge hieldn under bezig mè de zoake en ‘t droaideg uutendelik uut in ’t vôordêel van Jan Wittoen.

In 1454 verkocht ie d’heerlikheid Orskamp an ridder Lodewyk van Brugge, hêre van Gruuthuse. ’t Was goegekeurd deur under lêenhere Filips de Goein en ’t wierd gevierd ten Burch van Brugghe.

Varia

Tripelbier mè de noame Wittoen

• Sedert oktober 2004 hèt Ôostkamp ‘n eign tripelbier mè de noame Wittoen. Der wordn kruudn gebruukt ter herinnerienge an de lokoale biern die in de Middelêeuwn gebrouwn wierdn. De kruudnmiengelienge wierd in dien tyd ter plekke verzoameld. ’t Bier met hoge gistienge wordt ambachtelik gebrouwn deur Brouwery Strubbe uut Ichtegem.
• De twi reuzn van Ôostkamp zyn ridder Jan Wittoen en zyn jounkvrouwe Ligarde Baefs.