Jean-Marie Gantois

Van Wikipedia

Jean-Marie Gantois (Woatn, 21 juli 1904 – odoar, 28 meie 1968) wos e Frans-Vlamsche katholiekn paster.

Je dee zyn middelboare schoole in Ariën en Oazebroeke. Derachtr gienk tie in't seminoarie van Annappes en studeerde lettern en filosofie ande katholieke universiteyt van Rysel. Je kreeg zyn priesterwydienge in 1932 en wierd derachter vicaire in Rysel.

Gantois kwam by de Vlamsche Bewegienge lyk autodidact en ounder invloed van êenigte Vlamschgezinde lêeroars. Byst zyn seminoarie begoest ie Nederlands te lêern. Die gewoarwordienge beschreef 'tem loatr, in 1942, in zyn boek "Hoe ik mijn taal en mijn volk terugvond". Med en pôote and're gastn van't seminoarie stichtte ie em in 1924 't "Vlaamsch Verbond van Frankrijk" (VVF). Gantois zo de moteur van da verbound bluuvn tout in 1944. Je wos de gangmoakre achter de joarlyksche congressn en letterkundige vergoariengn. Je wos ôok de redacteur vande tydschriftn die gepubliceerd wierdn deur't VVF tussschn 1929 en 1944, noamelyk "le Lion de Flandre" en "De Torrewachter".

An't begun van den Twiddn Weireldoorloge wierd et VVF verboodn deur 't Fransche gezag. Mor byst de bezettienge startte Gantois in 1941 were d'aksjes van't VVF. J'oopnde nen bureau van't VVF in Rysel en breydde d'activiteytn van vôorn den oorloge nog vodder uut. Gantois wos anangr vande Grôot-Nederlandsche gedachte, mo toch woarn d'aksjes van't VVF surtout culturêel. J'it pertank, in countroarjie tout and're (Vlamschgezinde) pasters in dien tyd, noois mienschn angezet vo teegn 't bolsjevisme an't Ôostfrount te goan battern.

Achter de bevrydienge van Vrankryk wierd ie veroordêeld tout vuuf joar prisong ip ground van separatisme. In 1958 stound ie mee an de wiege van d'organizoasje "De Vlaamse Vrienden in Frankrijk". Je werkte mee an de redaksje van "Notre Flandre", mo bereykte der gin grôo publiek mêe mee. Ne bleef aglyk stief vele artikels schryvn, nog olsan me de Grôot-Nederlandsche gedachte als rôo'n droad. Ip 28 meie 1968 wierd em dôo weregevoundn in den Aa in Woatn, êenign tyd achter den dôo va zyn moedr.