Johan Hendrik van Dale
Uit Wikipedia
Johan Hendrik van Dale (Sluus, 15 februoari 1828 – Sluus, 18 of 19 meie 1872) was oofdounderwyzer, archivoaris in Sluus en woordnboeknmoaker.
Zyn ouders woarn ofkomstig uut ‘t Ôost-Vlamsche Eeklo, moa deurdat er juste een pokknepidemie in ‘t Meetjesland was uutgebrookn, vluchtte voader van Dale me z’n zwangere vrouwe weg, de grenze over noa Sluus. Hendrik van Dale is surtout bekend omdat ’n z’n noame gegeevn et an ‘t ‘’Groot woordenboek der Nederlandse taal’’, of de Dikke van Dale.
[bewerkn] Leven en werk
Van Dale oalde z’n êeste ounderwyzersdiplom an z’n zestiene. Ip 23 meie 1854 was 't ‘n angesteld als oofdounderwyzer an de openboare schole in z’n geboorteplekke. Vanof 1855 was 't ’n d’r ook stadsarchivoaris. Tusschenin schrêeft ‘n lêerboekn over toalzuvereid, sproakkunste en zinsontledienge, geschiedkundige artikels en brochures over Sluus en je richtte d’ oude rederykerskoamer 'De Oranjebloem' were ip. In 1867 vroegen z’ em van d ’êeste druk van ‘t ‘’Nieuw woordenboek der Nederlandsche taal’’ uut 1864 t’ erzien. Je dêed d’r vier joar over. Je was nôois styf content gewist over de voage, ondudelikke informoatie in de bestoande woordnboekn. Je stelde oge eisn an de exacte omschryvienge van de begrippn. In ’t vôorbericht by de druk van 1871 schrêeft ’n zelve: “Het schrijven van een Woordenboek is een ondankbaar en verdrietig werk. Is er veel dat men heeft opgenomen of verbeterd, er is nog veel meer dat men is vergeten.” Je was nog bezig an de latste fase van z’n werk, ost ’n in 1872 dôodgienk an de pokkn. D' êeste ofleveriengn woaren al uutgegeevn. Z’n lêerlienk Jan Manhave et z’n werk ofgemakt.
[bewerkn] Sluus
- In Sluus stoat een borstbeeld van Johan Hendrik van Dale gemakt deur beeldouwer Pieter Puijpe ounthuld ip 4 september 1924
- ”Herdenkingszuil” ip ’t kerkof
- Van Daleschole
- Van Dalestroate
- ’t Vroeger klôoster juste buutn de stad is nu een viersterrenhotel: “De dikke van Dale.”
