Johanna van Constantinopel

Van Wikipedia
Ga naar: Begunplekkn, zoeken
Johanna van Constantinopel
ca. 1200- 1244
Johanna van Constantinopel in ‘t begynhof van Kortryk
Blason Comte-de-Flandre.svg
Blason fr Hainaut ancien.svg
Gravinne van Vloandern en Henegouwn
Periode 1205 - 1244
Vôorganger Maria van Champagne
Ipvolger Margaretha II
Voader Boudewyn van Constantinopel
Moeder Maria van Champagne

Johanna van Constantinopel (Valencyn, ca. 1200 - Marquette, 5 december 1244), was gravinne van Vloandern en Henegouwn van 1205 toet 1244. Ze was d’oudste van de twê dochters van Boudewyn IX van Vloandern, groaf van Vloandern en Henegouwn, en êeste keizer van ‘t Latyns Keizerryk van Constantinopel, en van Maria van Champagne.

Heur leevn[bewerkn | brontekst bewerken]

In 1202 vertrok heur voader ip de vierde kruustocht. Heur moeder, die in verwachtienge was, is mor achter gegoan o ze genoeg hersteld was van de geboorte van heur zuster Margaretha. Heur noenkel Filips I, markgroaf van Noamn, was regent en zorgde vo de twê meisjes. In 1204 is heur moeder ziek gekommn in Akko (Israël), en de 9stn ogustus is ze doa gestorvn. E joar loater stierf heur voader in de kerkers van Bulgareye.

Filips van Noamn blêef regeern in heur noame, mo je brocht zyn nichtjes in e moeilikke situoasje deur hem te verloovn mè Marie, dochter van de Fransche keunienk Filips August, die under liet overbriengn no zyn hof in Parys.

Teresa van Portugal (of Mathilde), de weeuwe van Filips van den Elzas, kost de Fransche keunienk overtuugn vo Johanna te loatn trouwn met infante Fernando (of Ferrand) van Portugal, e zeune van heur broere Sancho. Ze trouwdn in Parys in januoari 1212 en da was ’t ende van ’t regentschap van Filips van Noamn.

Ferrand van Portugal kwam in ipstand teegn Filips August en je trok partye vo den Iengelsche keunienk Jan zoender Land en de Duutsche keizer Otto IV van et Hillig Rooms Ryk. Mo mè de Fransche overwinnienge in de Slag by Bouvines (27 juli 1214) paktn ze Ferrand gevangn en ze slootn hem ip in e torre van ’t Louvre. Johanna most dertien joar lank ollêne regeern.

Johanna met heur twidde vint Thomas van Savoye

Deurda ze nog minderjoarig was, haan de Fransgezinde edeln, ounder leidienge van Jan van Nesle, de burggroaf van Brugge, ol de macht en was Filips August in feite mêester van ’t groafschap. Deur heur vint gevangn t’houdn, kost ze gin jounges hen, en os ze stierf zounder jounges zou zyn zeune Lodewyk VIII Vloandern ervn. Achter da Lodewyk VIII in 1223 zyn voader ipvolgde, hèt ’n beslist van Ferrand toch vry te loatn ounder de vôorwoardn, die vaste geleid wierdn in de Vrede van Melun in 1227.

Round 1228 wierd under ênigste kiend, Marie, geboorn. Ze was beloofd an Robert I van Artesië, e zeune van Lodewyk VIII, mo ze stierf ol in 1236. Ferrand stierf in 1233.

In 1234 stichtte Johanna ’t Begynhof van Gent en in 1238 da van Kortryk.

Z’hertrouwde nog in 1237 mè Thomas van Savoye, mo ze stierf toch zounder jounges. Ze wierd ipgevolgd deur heur zuster Margaretha van Constantinopel.

Wikimedia Commons