Karel II van Spanje

Van Wikipedia
Ga naar: Begunplekkn, zoeken
Karel II
1661 - 1700
Karel II
keunienk van Spanje
Periode 1665 - 1700
Vôorganger Filips IV
Ipvolger Filips V
Soeverein van de Zudelikke Nederlandn
Periode 1665 - 1700
Vôorganger Filips IV
Ipvolger Filips V
Voader Filips IV van Spanje
Moeder Maria Anna van Oostnryk (1634-1696)
De stamboom van Karel II toogt dat er veel intêelt was

Karel II (Madrid, 6 november 1661 – Madrid, 1 november 1700), bygenoamd el Hechizado (den Behekstn) was keunienk van Spanje, Napels en Sicilië en soeverein van de Zudelikke Nederlandn. Je was de latste keunienk van de Spoansche Habsburgers.

Zyn leevn[bewerkn | brontekst bewerken]

In Spanje woarn ze styf blye o Filips IV in 1661 e mannelikkn ipvolger krêeg. Mo Karel II was gêestelik en lichoamelik g’handicapt. Ol de specifieke kenmerkn van de Habsburgers: o.a. e grôte neuze en e voruutstoande kinne woarn by hem overdreevn. Zyn kop was te grôot en zyn ounderkoake stak zo verre voruut dat ’n zyn tandn nie ip makkoar kost krygn. Zyn toenge was te grôot en doadeure kost ’n mè moeite klappn. Je kost ook mè moeite goan en ot ’n vuufendertig joar oud was wast ’n verlamd, epileptisch, kletse, j’haa bykan gin tandn mi en je kost nie goed zien. In 1698 ist ’n ôok nog doof gewordn. Je blêef lange kiends en loater kwamt ‘n seniel. Je kost mè moeite leezn of schryvn. Doadeure regeerde zyn moeder ols regentesse.

Je peisde zelve dat ’n bezeetn was, vandoar zyn bynoame. Van overol kwoamn der Exorcistn vo den duvel uut hem te dryvn. Mo zyn handicaps han nateurlik mêer te moakn mè de lange tradiesje van intêelt by de Habsburgers.

In 1678 wierd zyn moeder Maria Anna van Oostnryk (1634-1696) uut Madrid verdreevn deur Juan II, de bastoardzeune van Filips IV. Je kost nie verdroagn da zyn halfbroere Karel verwoarlôosd weggestookn zat in ‘t Escorial, ’t enorm paleis met ’n abdye en mausoleum da Filips II haa loatn bouwn vo zyn voader Karel I van Spanje en da van 1984 erkend is ols UNESCO weirelderfgoed. Mo Juan II stierf in 1679 en Maria Anna kêerde were no Madrid. Karel zou zelve an zyn halfbroere gevroagd hen vo zyn moeder of te zettn, omdat ‘n zelve wilde regeern.

Zyn vrouwn[bewerkn | brontekst bewerken]

Zyn êeste vrouwe was Marie Louise van Orléans, e nichte van Lodewyk XIV. Ze zoagn makkoar styf geirn en ze loazn vele in de kerke vo joenges te kunn hen, mo da lukte nie want je was impotent. Achter tien joar is ze gestorvn. Achter heur dôod wierd ’n verplicht van te trouwn mè Maria Anna van Beiern, prinsesse van Neuborg. Ze was e schôonzuster van keizer Leopold I van ‘t Hillig Rôoms Ryk. Mo by heur lukteg' et nateurlik ook nie. Je gienk styf achteruut en je schrêemde vele by ’t lyk van zyn êeste vrouwe, wa da doe peizn an Johanna de Woanzinnige.

Omdat ’n gin joenges haad kôost ’n e klêenzeune van Lodewyk XIV, Filips van Anjou (loater Filips V van Spanje ) vor ipvolger.

Binst profiteerde Lodewyk XIV van de teegnsloagn van de Spoans-Habsburgsche dynastie vo zyn Ryk uut te breidn.

Zyn dôod en de Spoansche Successieoorlog[bewerkn | brontekst bewerken]

Karel II stierf den êestn november 1700 in Madrid. Zowel keunienk Lodewyk XIV of keizer Leopold I woarn familie en voendn dan ze recht haan ip de Spoansche trône. Doadeure begost in 1701 de Spoansche Successieoorlog, die deurde tout 1713 met de Vrede van Utrecht. Filips van Anjou kwam Filips V van Spanje. De Zudelikke Nederlandn giengn no den Ôostnrykschn tak van ‘t huus Habsburg en da was ‘t ende van de Spoansche Habsburgers.

De stad Charleroi is noa Karel II genoemd.

Wikimedia Commons Mêer ofbeeldiengn die ier by passn ku je vien ip Charles II of Spain ip Wikimedia Commons.