Karloman van West-Francië

Van Wikipedia
Karloman
ca. 866- 884
Keunienk v. West-Francië
Periode879-884
tout 882 tegoare mè
Lodewyk III
VôorgangerLodewyk den Hakkeloare
IpvolgerKarel den Dikkn
VoaderLodewyk den Hakkeloare
MoederAnsgarde van Bourgondië

Karloman (ca. 866 - 12 december 884) was de twidde zeune van keunienk Lodewyk den Hakkeloare van West-Francië en Ansgarde van Bourgondië. Je wordt Karloman II genummerd achter Karloman I, de broere van Karel de Grôotn.

Karloman was keunienk van West-Francië van 879 tout 884, êest tegoare mè zyn broere Lodewyk III, en van 882 ollêne.

Under voader was ook keunienk van Aquitanië en Provence gewist. Aquitanië kwam ounder West-Francië, mo Provence wilde de twi zeuns nie ols ipvolger en ze koozn etwien van under: Boso van Provence. Ounder hem wierd et keunienkryk Lêger-Bourgondië (of Cisjuranië) gesticht.

Vo sterker te stoan teegn Boso van Provence en ook teegn de Vikings, kwoamn de Karolingische keuniengn, Lodewyk de Joungn van Oost-Francië en Lodewyk III en Karloman van West-Francië, overêen vor under gevecht vo Lotharingen te stoppn. Ze kwoamn in 880 tegoare in Ribemont. Ze bevestigdn doa, in ’t Verdrag van Ribemont, dat ’t stik van Lotharingen, dat achter ’t verdrag van Meerssen in 870 by West-Francië gekommn was, nu by Oost-Francië kwam. Lodewyk de Joungn kost azo de grenze van zyn keunienkryk no ’t westn verschuuvn.

‘t Was de latste verdêlienge van ‘t Frankisch Ryk en die grenze tusschn Vrankryk en Duutsland blêeft de reste van de Middelêeuwn bykan ounveranderd.

Karloman veroungelukte binst dat ie an ’t joagn was, en je wierd ipgevolgd deur zyn kozyn keizer Karel den Dikkn, de joungste broere van Lodewyk de Joungn.

Overwinnienge van Lodewyk III en Karloman teegn de Vikings in 879 (Grandes Chroniques de France deur Jean Fouquet, 1455-1460)
't Ryk van Karloman blow, van Lodewyk III purper, van Boso geel, van Lodewyk de Joungn groen, en van Karel den Dikkn rôod
Wikimedia Commons