Kerkgebouw

Van Wikipedia
Zicht vanip de Brouwery D'Olve Moane ip de Sint-Salvatorkathedroale, d'Onze-Lieve-Vrouwekerke, de Sint-Jakobskerke (in de verte) en ip het de site van't Oud Sint-Jan

E kerke is e gebouw woa dan der by de christenen messn deuregoan. Bykan ieder prochie in West-Vloandern het e kerke, sommigte zest mêer.

D'hogste kerkn in West-Vloandern[bewerkn | brontekst bewerken]

  1. Onze-Lieve-Vrouwekerke (Brugge) 122,30 mèiters
  2. Sinte-Moartn (kathedroale) (Yper): 102 mèiters
  3. Sint-Medardus (Wervik): 86 mèiters
  4. Sinte-Moartns (Kortrik): 83 mèiters
  5. Sint-Hilonius (Sint-Tillokerke), Izegem: 83 mèiters
  6. Sint-Salvator (kathedroale), (Brugge): mèiters
  7. Sint-Petrus-en-Paulus (Ostende): 72 mèiters
  8. Oeze Vrouwn (Poperienge): 70 mèiters

Sôortn kerkn noa functie[bewerkn | brontekst bewerken]

Basilieke[bewerkn | brontekst bewerken]

Basilieke es nen eretitel van sommigste katholieke kerkn.

Collegioale kerke[bewerkn | brontekst bewerken]

E collegioale kerke of kapittelkerke es e kerkgebouw woa da 'n zetel van en kapittel stoat. En kapittel es e college van kanunnikn. Kapittels moestn zorgn vo d'uutvoerienge van 'n bisschoppelikkn macht up lokoal niveau.

De Fransche Revoluusje hèit de kapittels upgeheevn. Achter 1800 zyn der nog ollene kathedroale kapittels herupgericht gewist.

Decanoale kerke[bewerkn | brontekst bewerken]

Decanoale kerkn zyn d'hoofdkerkn binn en decanoat. Decanoatn zyn 't kerkelik besteursniveau tusschn bisdommn en prochjes, en bestoan uut e reke prochjes. 'n Geestelikkn da an 't hoofd stoat van en decanoat noemn ze 'n deekn.

Dom, domkerke[bewerkn | brontekst bewerken]

Es synoniem vo kathedroale. In België es da woord nie gebruukt, in Holland wel.

In Duutsland es Dom nie osan 't zelste lik kathedroale. Sommigste kerkgebouwn krygn doa de noame Dom omdan ze zo groot zyn.

Kapelle[bewerkn | brontekst bewerken]

E kapelle es en kleen kerkgebouw da nie van e prochje of ne paster ofhangt.

Moar e kapelle kut ook en deel van e groddere kerke zyn. E kapelle da round 't koor of ne koorommegank van e kerke ligt, es e stroalkapelle.

Kapittelkerke[bewerkn | brontekst bewerken]

E kapittelkerke es e kerkgebouw woa da 'n zetel van en kapittel stoat. En kapittel es e college van kanunnikn.

En kathedroalskapittel es en kapittel da ne bisschop helpt by 't besteurn van zyn bisdom. D'andere kapittels, los van ne bisschop, noemn me collegioale kapittels. De kerke woa da 'n zetel van zuk kapittel stoat, noemn me e collegioale kerke (zie uutleg doa).

Kathedroale[bewerkn | brontekst bewerken]

E kathedroale es d'hoofdkerke van e bisdom. In die kerke goat den bisschop voor up d'hoogdoagn. 't Woord kathedroale es ofkomstig van cathedra wuk da Latyn es voe bisschopszetel, dus et kerkgebouw woa da 'n bisschop zynen stoel stoat.

Ook oe't bisdom upgeheevn es, bluuft de kerke heur stoatus van kathedroale houdn. Zo hèi j' in Yper nog osan de Sint-Moartnskathedroale ook ol es Yper sinsn 1801 gin bisdom nie mè.

Kloosterkerke[bewerkn | brontekst bewerken]

E kloosterkerke es de kerke verboundn an e klooster woa dan der monnikn weunn.

Munsterkerke[bewerkn | brontekst bewerken]

Munsterkerke es de noame dan z'in Holland gebruukn vo zowel kathedroale lik kloosterkerke.

Da es nauwe verwant mè 't Iengelsche minster (West Minster Abbey, Lincoln Minster). Minster es nen anglicoanschn eretitel vo sommigste Iengelsche kerkn, lik da basilieke es vo sommigste katholieke kerkn.

Ook in 't Duuts gebruukn ze 't woord Münster. Da woord es styf g'evolueerd. Nu sloat et in 't olgemeen up e grote kerke woa dan der veel pasters de messe doen.

Zowel munster, minster lik Münster zyn ofkomstig van 't Latynsche monasterium (klooster). Da woord kom j' ook in platsnoamn teegn, lik in Iengelmunster (West-Vloandern), Woasmunster (Oost-Vloandern), Munsterbilzen (Limburg), Monster (Zuud-Holland), Münster (Duutsland).

Parochiekerke[bewerkn | brontekst bewerken]

E parochiekerke es 't belangrikste kerkgebouw van e prochje.

Priory[bewerkn | brontekst bewerken]

E priory es ne kleenn gemeenschap van kloosterliengn da ofhangt van e klooster. 't Woord priory es ook gebruukt lik noame van de kerke van zukne gemeenschap.

Sôortn kerkn volgens architectuur[bewerkn | brontekst bewerken]

Wikimedia Commons