Langereie

Van Wikipedia

Liggienge van de Langereie (in 't doenkreblow).

De Langereie is e woatreweg en e stroate in 't centrum van Brugge. De reie lopt vôort uut de Speeglreie en begunt an de Karmers-brugge en stopt aan de Dampôorte. De glyknoamige stroate, geleegn ip de westlikkn oevre, lopt van de Goednand-brugge no de Wulpnstroate. De stroate an den andre kant van 't woatre is de Potteriereie.

De woatrelôop en de stroat kroenkln e klêen bitje, min of mêer vôgns de beddienge van d' ôorsproenklikke rieviere de Reie. Ter ogte van de têegnwôordige 's-Groavnstroate wierd de Reie in de loate 12ste êewe no 't ôostn ofgeboogn vo zô an te sluutn by de scheepvoartverbiendienge die gienk no 't tonne zjuuste gestichte Damme. De Langereie wordt oovrespann deur de Snaggoardbrugge, de Duunebrugge en de Leonardsstuuwbrugge.

't Begun van de Langereie. Centroal de Karmers-brugge, mêt an den andre kant 't ende van de Speegl-reie, en rechs d' Oedn'and-brugge. In den achtregroend de torre van de Sint-Walburgakerke.

De Reie istr ofgebôord mê koajemeurn uut bakstêen, mê vanboovn arduunn dekploatn of 'n yzrn bostweirienge. De gebown, oovreweegnd van twêe of drie bowloagn, ên dr kommêrsjêele of weunfunksjes, en ze zyn uut de 15ste toe de 20ste êewe.

Geschiednisse[bewerkn | brontekst bewerken]

Ôorsproenklik wierd vo de platse de noame Roye gebruukt. Vanof de 13ste êewe is de noame Oetbreekrsdam weere te vienn, die verwyst no scheepsbowaktiviteitn. Vo 't gebied an de westkant bestoend toe an de 16ste êewe ook nog de platsnoame Koetelwic of Ketelwic, of kortweg 't Wyk. Zydre wyzn ip 'n anlegplatse en needrezettienge diedr aa vanof d' 11ste êewe, en meuglik aa vroegre, bestoenn. Vanof 't latste kart van de 16ste êewe wordt de noame Langerei gebruukt vo 't lange stik ip de westelikke oevre van de reie.

Van in de tyd van de Romeinn toe in de 15ste êewe was de woatrelôop de belangrykste verkêersoadr van Brugge no de zêe. Lans 't loatre (en oendretusschn verdweenn) Dampôorte-kompleks wastr e verbiendienge mê de zêe. 't Wyk kende veele kommêrsjêele aktiviteitn toe 't ende van de 12ste êewe; nodien veruuzde 't zwoartepunt no de Kroane-reie en de Speeglreie.

Tusschn 1623 en 1855 was de Langereie nog van belank lik oendrdêel van 't kanoal tusschn Ostende, Brugge en Gent. Nodien pakte de Riengvoart die rolle oovre. Nog toe in de joarn 20 van de 20ste êewe lêgdn binnevoart-scheepn dran.

In de joarn 1972-1974 wierdn de droajbruggn vervangn deur vaste stêenn bruggn: de Karmers-brugge, de Snaggoardsbrugge en de Duunebrugge.

E bitje voddr kykn[bewerkn | brontekst bewerken]

Langereie (stroate) gezien van de Wulpnstroate.
  • (fr) Duclos, Adolphe 1910 : Bruges, histoire et souvenirs, Brugge.
  • (nl) Buysse, Emiel 1948 : Zomer aan de Langerei. Van Houtbrekersdam tot Quai Napoléon, in : Brugsche Courant, 31 juli.
  • (nl) Buysse, Emiel 1958 : Langs de Langerei, in : Vlaams Weekblad, 27 september.
  • (nl) Schouteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
  • (nl) Beernaert, Brigitte e. a. 2002 : Langerei 66, de ruimtelijke tuin, in : Een tuin is meer dan er staat, Open monumentendagen Brugge 2002, Brugge.
  • (nl) Debrabandere, Frans 2009 : Brugse plaatsnamen, in : Brugge die Scone, blz. 47.
Wikimedia Commons