Latemsche Schole
De Latemsche Schole is e Vlamsche kunstenoarsgroep die tegoare kwam in den êestn helft van de 20e êeuwe in Deurle en in Sint-Martens-Latem, twêe dorpn an de Leie, ten zuudn van Gent.
't Ende van de 19e êeuwe was 't begun van e nieuwe mentaliteit. Die vernieuwienge begost ook by de schilderkunst, die de noame symbolisme krêeg. Vele kunstenoars krêegn interesse vo 't spirituele. De melancholie binst d'êeuwwisselienge tegoare met 't fin-de-sièclegevoel was een typische eignschap van 't symbolisme. Een ander kenmerk was 't werekêern noa de nateure en vele kunstenoars wildn ip den buutn goan weunn. Vanuut Gent vertrokkn vele artistn noa Sint-Martens-Latem en ze vormdn doa de Latemsche Schole.
De Latemsche Schole wordt ingedêeld in de volgnde groepn:
- Den êeste groep met de mystieke symbolistn Albert Servaes, George Minne, Gustave Van de Woestijne, Valerius De Saedeleer en Albijn Van den Abeele.
- De twidde groep met de expressionistn Constant Permeke, Jos Verdegem, Gust De Smet, Leon De Smet en Frits Van den Berghe. Die groep had e grôotn invloed ip d'ountwikkelienge van de loatere modernistische bewegienge in België.
- De derde groep met Hubert Malfait, Albert Saverys, Jozef De Coene, Arthur Deleu, Albert Claeys, Victor Lorein, Achile Van Sassenbroeck, Jules Boulez en Maurice Schelck.
- Sommigte critici hen 't ook over e vierde groep me Fons Roggeman, Luc-Peter Crombé, Joe Van Rossem, Chris Pots, Jef Wauters, en Lea Vanderstraeten.