Malaga

Van Wikipedia

Liggienge van Malaga in Spanje
't Klimoat in Malaga
Calle Marqués de Larios, e chique wienkelstroate in 't centrum
Foto van et centrum mei 'n alcazaba up 'n achterground

Malaga (Spoans: Málaga) es de 6e grotste stee van Spanje en ligt in 't zuudn van 't land, an de Costa del Sol.

Liggienge en Klimoat[bewerkn | brontekst bewerken]

Malaga ligt in Andalusië, de meest zudelikke autonome regio van Spanje, woa da de Guadalmedina uutmondt in de Middellandsche Zee. Z'es oofdstee van de provinsje Málaga.

In de binnestee zelve weunn d'r à peu près 569.009 mienschn (2016), in de Magaleense agglomeroatie oungeveern één miljoen.

Malaga eit e Mediterroans, subtropisch klimoat. De temperateurn zyn dus osan vree zochte: van 8° C in 'n winter tot 30° in 'n zomer. De stee es gekend lik Oofdstee van de Costa del Sol.

Geschiedenisse en Economie[bewerkn | brontekst bewerken]

Malaga noemde oorsprounkelik Malaca en wos e Fenicische kolonie gesticht etwoaschn tussen 1000 v.C. en 700 v.C. In de 6e eeuw v.C. wos de stee veroverd deur Carthago.

Binst den Twiddn Punischn Oorloge vier eeuwn loater, in 218 v.C., ein de Romeinn de stee veroverd. Zyder ein doar verschillende grote bouwwerken angeleid, lik 'n oavn en 't Romeins theoater, woavan da je nu nog de reistn kut ziene an de voet van 'n Alcazaba.

In 411 kwom de stee in andn van de Germoansche stamme van de Visigootn. De Gootn ein drie eeuwn lank boas gewist over de stee en 't omliggende. Van under anwezigeid es d'r nietn mee overgebleevn.

In de 8e eeuwe ein de Moorn 't grotste stik van et Iberisch schiereiland veroverd; Malaga zevve ein ze veroverd in 714-716. Verschillende Aroabische bevolkingsgroepn ein de stee achtereenvolgens veroverd en besteurd: de Moorn, Almohoadn, Almoravidn, d'Aroabische keuniengn van Cordoba... De stee was toun styf welvoarend, surtout deur 'n textielandel. Uut dienen tyd dateert et alcazaba, een Moors fort uut de 11e eeuwe, en 't kasteel van Gibralfaro da in de 14e eeuwe gebouwd eit gewist ter verdedigienge van den alcazaba.

't Es moar an 't ende van de 15e eeuwe dan de Spoansche katholieke keuniengn d'Arabiern ein keun buutndryvn. Die periode es bekend ounder de noame Reconquista, wuk da Spoans es vo eroverienge. De veroverienge van Malaga zevve verliep styf moeizoam en deurde meerdere joarn.

't Economisch erstel van de stee kwam d'r nie idder dan in de 16e eeuwe binst de regerienge van keunienk Filips II.

In de 19e eeuwe wos Malaga de belangrikste industriestee van heel Spanje. In diezelste eeuwe wos d'r ook ne revolutionairn, separatistischn sfeern anwezig die resulteerde in regelrechte conflictsituoasjes mei 't centroal gezag van 't land.

In 1919 kreeg Malaga eurn eigen vliegoavn. De stee oundergienk in de joarn ’50 en ’60 nen grootn economischn boom deur d'upkomste van et massatoerisme an de Costa del Sol.

Beziensweirdigeedn[bewerkn | brontekst bewerken]

Istorische gebouwn[bewerkn | brontekst bewerken]

  • Alcazaba: e Moors fort up d'euvels round Malaga
  • Castillo de Gibralfaro: kustverdedigiengskasteel vo den alcazaba, mei et Interpretoasjecentrum (en istorisch oorlogsmuseum)
  • Romeins theoater

Religieuze gebouwn[bewerkn | brontekst bewerken]

  • Kathedroale: imposant gebouw, gebouwd tusschn 16e en 18e eeuwe in barok en neorenaissancestyl. Van de twee toorns es d'r ene noois nie ofgewerkt gewist.
  • Palacio Episcopal: bisschoppelik paleis neffers de kathedroale, mei e schone pieta in 'n voorgevel
  • Iglesia de Santiago: 16e eeuwse kerke gesticht deur de Katholieke Keuniengn. In die kerke eit Picasso gedopt gewist.
  • Iglesia del Sagrario: 16e eeuwse kerke, ze stoat in 'n of van de kathedroale
  • Iglesia de los Mártires: 15e eeuwse styf versierde kerke
Iglesia de Santiago, mei islamitische mudejar stylkenmerkn
De kathedroale
De onofgewerkte torre van de kathedroale

Cultureel[bewerkn | brontekst bewerken]

  • Museo Picasso Málaga: et Picassomuseum
  • Museo-Casa Natal Picasso: 't geboorteuus van Picasso, mei permanente tentoonstellienge van etsn en keramiek van em
  • CAC Malaga (Centro de Arte Contemporáneo): Museum vo eedndoagsche kunste
  • Plaza de Toros: arena woa dan ze stieregevichtn oudn
Arena vo stieregevichtn
Picassomuseum

Andre[bewerkn | brontekst bewerken]

  • den Oavn
  • Paseo del Parque: prachtige verkeers- en wandelweugen in 't centrum van de stee mei enstens lange reekn palmboomn
  • Finca de la Concepción: botoanischn of, mei exotische soortn, en restantn van Romeinse beeldn en vloertiggels
'n Oavn van Malaga
De Guadalmedina-rivier stoat in 'n zomer gedeeltelik droge

Varia[bewerkn | brontekst bewerken]

  • Malaga es gekend vo eurne zoete roje wyn, de málaga dulce.
Wikimedia Commons

Externe koppeliengn[bewerkn | brontekst bewerken]