Olivier den Duvel

Van Wikipedia
(deureverweezn van Olivier De Neckere)
Stambild van Olivier den Duvel in Tielt
Galge van Montfaucon

Olivier De Neckere bygenaamd Olivier den Duvel (necker of nekker=duvel), oadelikkn titel Olivier le Daim (Tielt, 1434 - Parys, 21 meie 1484) was e Vlamschn barbier en vertrouwelienk van de Fransche keunienk Lodewyk XI van Vrankryk.

Lodewyk van Valois, de loatere keunienk van Vrankryk Lodewyk XI, was ip de vlucht voe zyn voader. Filips de Goein gaf em asiel en herbergdeg'hem in 't kastêel van Genepiën (Genappe), tegoare mè zyn vrouwe Charlotte van Savoye. Doa wierd ôok under twidde zeuntje Joachim geboor'n, die ol achter vier moandn dôodgieng en in de kerke van Halle (Vlams-Brabant) begraavn ligt.

Lodewyk arrivirde ôok in Tielt. Olivier was de zeune van e Tieltsche barbier en gerakte moat mè Lodewyk. Lodewyk kêerde achter êenigte tyd were no Parys, tegoare med Olivier.

De vriendschap tusschn de volksjoungn en de keunienk zorgde d'ervôorn dad Olivier roadgever en vertrouwelienk van de Fransche keunienk wier. De keunienk benoemdeg'hem toet hofbarbier van 't Frans keunienkshuus en hoofd van de barbiersgilde van Parys. Olivier wier bedacht mè titels en schenkiengn. Je krag (Tielts voe krêeg) den oadellikkn titel van "Olivier le Daim" (in 't schôon Vlams: damhert), groaf van Meulan.

Vaneigns blêef die blitzcarrière nie oenipgemerkt by den hofoadel. Os de keunienk in 1483 dôodgieng kwam het toet e rap proces en Olivier wierd ipg'hangn an de beruchte galge van Montfaucon (letterlik valknberg), e zeshoekige en drie etages hoge galge ip en heuvel te nôordôostn van 't middelêeuwsche Parys. D' exacte locoasje is nie mè bekend moa valt verzekers t'hope mè 't stadspark Buttes Chaumont van nu.[1]

D' historische figeure wierd ipgevoerd in werkn van sommigte 19e-êeuwsche schryvers, woaroender Walter Scott ("Quentin Durward"), Victor Hugo ("Notre-Dame de Paris") [2] en Alfred Neumann ("Der Teufel").[3]

Ze standbild stoat vô d'alletorre van Tielt, ze woapenschild ku je zien in de meuren van d'alletorre. In ze standbild is e kobbe (allegorische vôorstellienge van de Fransche keunienk) verwerkt die em beschermt.

Referensjes[bewerkn | brontekst bewerken]

  1. Repertorium van eigennamen in Middelnederlandse literaire teksten
  2. Inventaris Onroerend Erfgoed
  3. Alfred Neumann, Der Teufel

Externe link[bewerkn | brontekst bewerken]