Paolo Bettini

Van Wikipedia
Paolo Bettini in de Deutschlandtour 2004

Paolo Bettini (Cecina, 1 april 1974) is nen Italjoansen coureur. Jis profcoureur gekomn in 1997. 't Is êen die verre olles ankan en die explosiviteit, koersdeurzicht en deurzettingsvermeugen wit te combineern. Zyn bynoame is il Grillo (de krekel).

Zyn grotste succesn et 'n gekend in êendagskoersn. In 't begun stound 'n in de schoaduwe van zyne ploegmoat Michele Bartoli. Deur een poar blessures van dien Bartoli kost ie deurebreekn in 2000 deur Luik-Bastenaken-Luik en een etappe in den Tour de France te winn. 't Joar doarachter et 'n 't Kampioenschap van Zürich gewonn.

Sedert zyn deurbroake was zyn reloasje me Bartoli verslichterd. Achter da Bartoli weggink uut Mapei in 2002, kwam Bettini kopman. Dazelste joar et 'n voor den twidde kêe Luik-Bastenaken-Luik gewonn. Je was ôok den bestn in de Weireldbeker.

Zyn beste sizoen was zekerst 2003. J'et toun Milaan-San Remo, de Rounde van de Middellansche Zêe, de HEW Cyclassics en de Clasica San Sebastian gewonn. Ondertussn wast 'n ôok kampioen van Itoalië gekomn. Ounder andere deur die zeges at 'n veel UCI-puntn en was 't ie voor den twidde kêe den bestn in de Weireldbeker.

In 2004 stound hêel zyn sizoen in 't têekn van de wegrit ip de Olympische Spelen in Athene. Dedé et 'n ton ôok gewounn deur in de sprint de Portugees Sérgio Paulinho te kloppn. Neffest dadde et 'n voor den derde kêe ip reke de Weireldbeker gewonn.

2005 begost voor Bettini me een blessure in 't vôorjoar, moar in de Ronde van Itoalië et 'n een etappe kunn winn. In 't noajoar et 'n iederêen verboasd deur voor den twidde kêe 't Kampioenschap van Zürich te winn, een etappe te behoaln in de Rounde van Spanje en deur te winn in de Rounde van Lombardeye.

Ip 24 september 2006 woun de klênen Italjoan de weireldtitel ip de weug in Salzburg. J'et ton den Duutser Erik Zabel en de Spanjoard Alejandro Valverde versloagn in de sprint. Een weke loater verloor tie zyn broere Sauro deur een accident met 'n auto. Ip 14 oktober et 'n nog ne kêe de Ronde van Lombardeye gewounn en die zege et 'n ipgedroagn an zyn broere. 't Joar doarachter eit ie zyn weireldtitel verlengd in Stuttgart.

Afscheid in mineur[bewerkn | brontekst bewerken]

Bettini wilde styf geirn stoppn met e derdn weireldtitel, moa dat is ni elukt in 2008. Zyn latste officiële koersen goungn op de piste zyn. Ouk dadde is verkêerd ofeloopn: op 4 november 2008 viel 'n in de Zesdoagsche van Milaan.

Ploegn[bewerkn | brontekst bewerken]

  • 1997 - MG-Technogym
  • 1998 - Asics-CGA
  • 1999 - Mapei-Quick·Step
  • 2000 - Mapei-Quick·Step
  • 2001 - Mapei-Quick·Step
  • 2002 - Mapei-Quick·Step
  • 2003 - Quick·Step-Davitamon
  • 2004 - Quick·Step-Davitamon
  • 2005 - Quick·Step-Innergetic
  • 2006 - Quick·Step-Innergetic
  • 2007 - Quick·Step-Innergetic
Wikimedia Commons