Peegie

Van Wikipedia

Peegie es den ôofdpersôon uut de boekn van Willem Denys. Peegie ountstound in de fantasie up de Nieuwmarkt in Roeseloare. Die veroalen wierden overgedroagen van generatie up generatie.

Achiel Denys, de voadre van Willem, schrêef vele van die vertellingen in zyn "calpinske" en vertelde ze by veel gelegeneedn, ounder andre an Roeseloarse vluchtelingn die binst 't endoffensief in 1918 de stad moestn ountruumn en ier en toa ounderdak vounden. Willem Denys èt die veroalen toen verder uutgewerkt.

Standbild van Peegie up de Beutermart

Peegie & de Nieuwmarters[bewerkn | brontekst bewerken]

Peegie leefde up de Nieuwmarkt in Roeseloare. Dichte by de Sint-Michielskerke, noa 't westen, weunn de Nieuwmarters. Zyder leefden ol lange up 'n hêel aparte maniere. Ze kennen mekoar styf goed en oe ze zyder weten wie da Tarzan en Tanite en Sissen zyn, toen es da genoeg. Vo de reste èt er doa niemand zoakens mee, zeekre de politiecommessoaris en de controleur nie.

Nieuwmarkters zyn goed ter toale en zyn hêel zelfstandig. Ze kennen en êren under vôoroeders. Je ziet da an de schône grafzerken up 't Oed Kerkof die 't vrovolk olle joare met schuum en lôge kusen en upblienken.

Da vrovolk zorgt wok dat undr' uzen gelekt zyn. ‘t Mannevolk tôont under styf stoer noa buutn moa z'anveirden en oundergoan toch de wille van under wuuvn. De vintn goan olle joare up triem deur hêel 't land en toet in 't verre Lourdes zelfs. 't Zyn êerlikke moa gesleepn verkôpers. Peegie zelve tsjoolt met schoeblienk.

Oe ze were thuus kommn me Roeseloare kermesse es't vullen bak fêeste! In De Beurs, 'n danszoale, kommn d'Antnetjies de Peegies tegen. En oeter nen trouw ankomt, toen es 't hêlegans fêeste. De schoewinkels, de naaisters en de traiteurs weetn dat ollêne 't beste en 't schôonste goe genoeg es. Ze pinten de kerke met een zêe van bloemen, met baldaking en rôo lôpers. 't Mag ol kosten dat wilt, want lik da de Nieuwmarkt viert, kan 't er niemand vieren. "Den deken moe wok leven", zeggen ze.

Boekn[bewerkn | brontekst bewerken]

  • Peegie in zyn oapejoaren, Willem Denys.
  • Peegie, zyn triem deur 't leevn, Willem Denys.

Standbild[bewerkn | brontekst bewerken]

Sichtend 1982 stoat er up den Beutermart van Roeseloare 'n standbild van Peegie. 't Es ol in 1976 gemakt deur Jef Claerhout in updracht van Gilbert Bonte, êén van d'organisoaters van Scoutsival. 't Ad êest 'n ende in zyne of gestoan en toen up de binnenkoer van 't staduus.

Externe koppelienge[bewerkn | brontekst bewerken]