Piere (Blanknberge)
Uit Wikipedia
De Piere van Blanknberge is d’ênigste recreoatiepiere an de Vlamsche Kust. ’t Is 'n uniek bouwwerk met een wandelbrugge in de zêe van 350 m lank. D’êeste Blanknbergsche piere dateert van 1894.
[bewerkn] Geschiedenisse
- 1894 - 1914
D’êeste pierconstructies zyn were te vindn in Ingeland in ‘t middn van de 19ste êeuwe. ’t Is moa vanof den twiddn elt van de 19ste êeuwe da pieren ’n touristische attractie gewordn zyn vo wandeloars. In Ingeland wierdn ze pleasure piers genoemd. Vanof de joarn 1870 zochtn Ingelsche ingenieurs en architectn ook g’interesseerdn ip ’t continent.
‘t Was een Londenoare, John Hendrey, die in 1873 een êeste vôorstel dêed an de stad Blanknberge vor een piere te bouwn ter oogte van de Kerkstroate. Da vôorstel wierd ofgeweezn deur ’t gemêentebestier. In 1888 wierd er een vôorstel uutgewerkt deur ingenieur Casse, architect E. Hellemans en annemer Monnoyer. In 1889 was ‘t stadsbestier akkoord en ze stichtegen de Société Anonyme du Pier de Blankenberghe. De werkn an de piere begostn in februoari 1894 en ip zundag 12 augustus 1894 mochtn d’êeste wandeloars d’r al ip. De piere in Art-Nouveaustyl wierd al gauwe een echte attractie an de Vlamsche Kust.
Ip 15 oktober 1914 (êeste weireldoorloge), wierd de piere hêlegans ofgebrand deur de Duutsche bezetter.
- 1933 – 2005
Achter den êeste weireldoorloge zocht ‘t stadsbestier van Blanknberge een iplossienge vo ’t lêlik skelet van de piere ip ‘t strange van Blanknberge. Ze kochtn de piere over van de vroegere moatschappye vor een bedrag van 435 000 BEF (€10 800). Deur de toegekende oorlogsschoadevergoedienge van om en by de 900 000 BEF (€20 000) kostn ze begunn droomn van een nieuwe piere.
In 1930 besliste de stad vo zelve een nieuwe piere te bouwn. ‘t Ountwerp wierd gemakt deur Jules Soete uut Blanknberge en je wierd bygestoan deur de Gentschn ooglêroare G. Mangel en de Gentschn ing. Architect A. Bouquet. Ip 9 juli 1933 wierd de nieuwe piere ingehuldigd.
Binst de twidde weireldoorloge blêef de piere oungeschounden deurdat den Duutscher Karl-Heinz Keseberg 't bevel van z'n overstn negeerde vo de Blanknbergsche piere te dynamiteern. Tusschn K.H. Keseberg en 't Blanknbergs stadsbestier ist er alsan e vriendschapsband bluuvn bestoan. Nu en ton kwamt 'n vor e korte vakanse met z'n vrouwe en zeune en loater met z'n klêenjoungers. In 1994 is de Duutsche sergeant gehuldigd gewist deur de stad Blanknberge. In november 2006 krêeg Blanknberge 't bericht dat de redder van de piere ip 85-joarige leeftyd gestorvn was.
Achter den oorloge is de piere ommegedopt tout Aquarama en van 1955 tout 1999 is ‘t gebouw een ounderdêel gewordn van ‘t Meli-pretpark (nu Plopsaland) in Adinkerke.
In 2003 is de piere gerenoveerd en in 2004 is de concessie verkocht an Traincity, moa dat e moa gedeurd tout in 2005.
[bewerkn] Expositie zomer 2008
In de zomer van 2008 ist er ip de piere vanof 26 juni, een expositie over al de pieren in de weireld, de World Piers Exhibition 2008.
