Piero di Lorenzo de' Medici

Van Wikipedia
Piero de' Medici
14711503
portret deur Agnolo Bronzino
Signore (hêre) van Firenze
(de facto)
Periode1492 - 1494
VôorgangerLorenzo de' Medici
IpvolgerRepubliek :
Girolamo Savonarola (1494-1498)
Pier Soderini
(1502-1512)
Giovanni de' Medici(1512-1513)
VoaderLorenzo de' Medici
MoederClarissa Orsini
Dynastie
Huus Medici

Piero de' Medici, bygenoamd den Oungelukkign, (Firenze, 15 februoari 1471 – Gaeta, 28 december 1503) was den oudste zeune en ipvolger van Lorenzo il Magnifico. Je regeerdeg’ over Firenze van 1492 tout an zyn verbannienge in 1494.

Zyn leevn[bewerkn | brontekst bewerken]

Piero is geboorn in Firenze. Je was den oudstn van de drie zeuns van Lorenzo de' Medici en Clarice Orsini. Zyn broers woarn Giovanni, de loatern Paus Leo X en Giuliano, de loatern hertog van Urbino.

Piero miste de kwaliteitn van z’n voader. J’had e zwak, oungedisciplineerd karakter en je kost de moeilikke situoatië die ol ’n ende bezig was nie an. Zyn voader Lorenzo had ol de latste joarn van zyn leevn last g’hed van de fanatieke dominicoansche monnik Girolamo Savonarola, die ’t volk probeerde wys te moakn dat de weireld gink vergoan deur ol die luxe van de Medici.

Achter den dôod van Lorenzo wist Savonarola da zyn tyd gekommn was. Je kost ‘t volk overtuugn van in ipstand te kommn. Ôok van buutn uut kwamt er gevoar, want keunink Karel VIII van Frankryk stound gerêed vo ’t keuninkryk Napels binn te volln via Firenze.

Piero verzetteg’ hem nie genoeg en de 17stn november 1494 bezette Karel VIII Firenze. Je blêef tien doagn.

Savonarola profiteerde van de situoatië. Je liet de Medici verbann, hunder paleis plundern de kunstwerkn vernietign en ol de volgns hem goddelôze weireldse zoakn verbrandn.

Firenze was veranderd in e ruïne en ’t deurde nie lange of ’t volk begost genoeg te krygn van Savonarola ’s moralistische ideeën. In meie 1498 kwamt er e volksipstand en z’hen Savonarola leevnd verbrand ip de Piazza de la Signoria vo de Palazzo Vecchio.

In 1512 kostn de Medici werekêern, mo vo Piero was ’t te loate want je stierf in 1503.

Vrouwe en jounges[bewerkn | brontekst bewerken]

Piero is in 1488 getrouwd met Alfonsina Orsini, de dochter van Roberto Orsini, groaf van Tagliacozzo. Z’han twi jounges:

  • Lorenzo II, hertog van Urbino
  • Clarice, die trouwde me Filippo Strozzi de joungn

Zyn dôod[bewerkn | brontekst bewerken]

In 1503 verdrounk Piero in de Garigliano, ’n Italioansche riviere tusschn Rome en Napels, ten zuudn van Gaeta, binst de Slag van Garigliano.

Zyn graftombe, gemakt in ipdracht van zyn kozyn Giulio, de loatern Paus Clemens VII, is te bezichtign in d’abdye van Montecassino.

Achter Piero’s dôod stoundn zyn twi joungere broers an ‘t hoofd van de familie, want zyn ênigste zeune Lorenzo, die no zyn grôotvoader genoemd was, was me zyn elf joar nog te jounk.

Giovanni de kardinoal kost in 1512 de macht van de Medici were herstelln deur zyn invloed ip paus Julius II, en je regeerde tout dat ’n in 1513 verkoozn wierd tout Paus Leo X. De joungste broere, Giuliano, volgdeg hem ip.

Wikimedia Commons