Pieter Rodenbach
Uit Wikipedia
Pieter Rodenbach (Roeseloare, 1759 – 1820), wos den oudstn zeune van Ferdinand Rodenbach, den êestn Rodenbach die em kwam vestign in Roeseloare.
Achter z’n studies in Rysel en Gent in 1782 volgdeget ie z’n voader ip ols chirurgyn in Roeseloare. ’t Zelfste joar ist ’n getrouwd met Anna Degeest, geboorn in Brugge ols dochter van Roeseloarnoare Gregorius Degeest-Nory.
Tusschn 1783 en 1794 zyn d’r in de menoage Rodenbach-Degeest zeven joungns geboorn, zes zeuns en één dochter. Twee zeuntjes stiervn ip jounge leeftyd, de vier andere studeerdegen in Parys. Alexander, die blend gewordn wos ip jounge leeftyd, is zounder succes g’opereerd gewist an z’n ogen deur Barong Dubois, den dokteur van Napoleon. De drie andere zeuns Ferdinand, Constantin en Pedro een gevochtn ounder Napoleon.
In 1792 eet Pieter Rodenbach een uus gekocht "op de westcant van de Noordstraete ende maeckende den noorderschen houck van de brauwerystraete", noamelik in de Nôordstroate no. 51. (Dichter Albrecht Rodenbach, de klêenzeune van Pieter is in 1856 in ‘t zelfste uus geboren).
Ounder ’t Frans bewind is Pieter Rodenbach gestopt ols chirurgyn en geniverstoker gewordn. De stokerye wos geleegn ip "Cleen Spagnien" (nu Krottegem). Pieter Rodenbach was Fransgezind en een bewounderoare van Napoleon. J’ is gestorvn in 1820 in Roeseloare.
Alexander, Ferdinand, Constantin en Pedro, de vier zeuns van Pieter Rodenbach, speeldegen een belangryke rolle in Vloandern by de omwentelienge van ‘t joar 1830 en maktegen de noame Rodenbach vo ‘t êest populair in Roeseloare.
