Schotse Hooglandskoeie

Van Wikipedia
Schotse Hooglandsstier

De Schotse Hooglandskoeie (in 't Iengels Highland cattle, in 't Gaelic Kyloe) is een oud sôorte vlêeskoeie van Schotland mè lange hôorns en lank hoar. Under pels kan verschillende kleurn hèn, moar is mêestol rôo-bruun.

't Ras was ountwikkeld in de Schotse Hooglandn en d' eilandn an de westkust van Schotland. Vandoa zyn ze in de twientigst' êeuwe g'exportèrd noar andere dêeln van de weireld, gelik Australië en Nôord-Amerika. Hooglandskoein zyn vrê gehard omdan ze gewend zyn an under thuusland mè veel reegn en sterke wiend. Under vlêes is minder vet dan van andere rassn, omdan z' under isoloasje van under vacht krygn in plekke van deur 't vet in under vlêes.

Een volwassen stier weegt 800 kilo en een koeie 500 kilo. Schotse hooglandskoein kunn'n toet an under achttienste joar leevn. In dien tyd kan een koeie toet viftien kolvers krygn.

't Hooglandskoeieras is vrê goed geschikt vor in nateurgebien deur 't joar round te loatn graazn. Z' hèn nie veel zorge nôdig en ze zyn ook nie agressief.

Wikimedia Commons