Tommaso Portinari

Van Wikipedia
Tommaso Portinari deur Hans Memling (Metropolitan Museum of Art, New York)

Tommaso Portinari (1432-1501) was ’n Italioanschn bankier uut Firenze en filioalhouder van de Medici-bank in Brugge.

De Medici woarn de belangrykste geldschieters van de Bourgondische ertoogn en in 1466 eurdn ze ‘t Hof Bladelin in Brugge dat de Banco de Medici wierd. Loater kochtn ze ‘t. ’t Patriciërsuus wierd round 1440 gebouwd deur de belangryke Brugsche figeure Pieter Bladelin, êen van de schatbewoarders van de Orde van et Gulden Vlies. Piero de’ Medici, de zeune van Cosimo de' Medici, liet nog e vleugel bybouwn. Portinari weunde doa van 1479 tout 1497.

In 1450 was Angelo di Jacopo Tani filioalhouder in Brugge en Tommasso Portinari was eest z’n assistent. Cosimo de’ Medici e noois vele vertrouwn in Portinari g’ed. Mor achter z'n dôod en achter enigte intriges pakte Portinari in 1465 Tani ‘s platse. Tani vertrok in 1467 no de Medici-bank van Londn en werkte van doaruut tegoare met de bank van Brugge. Portinari bleef filioalhouder tout in 1478. Je gink failliet deur de grôte lêniengn an Karel den Stoutn en Maximiliaan van Oostnryk. In 1497 vertrokt ’n definitief uut Brugge.

Portinari was zot van Vlamsche kunst. Je liet z’n portret schildern, en ôok da van z’n vrouwe Maria di Francesco Bandini Baroncelli, deur Hans Memling.

En ’t bekendste werk van Hugo van der Goes, ’t altoarstik Anbiddienge van d’herders of de Portinari Triptiek, was zyn ipdracht. ’t Was bedoeld vo de kapelle van ‘t hospitoal van Santa Maria Nuova in Firenze en d’Italioansche schilders w.o. Leonardo da Vinci lietn under styf deur ’t werk beïnvloedn.

Wikimedia Commons