Verdrag van Ribemont (880)
Uit Wikipedia
Met ‘t Verdrag van Ribemont in 880 wierd ‘t Frankisch Ryk vo de latste ki verdêeld.
‘t Verdrag wierd geslootn tusschn Lodewyk den Joungn, zeune van Lodewyk den Duuts, en Lodewyk III en Karloman, de klêenjounges van Karel den Kletsn. ’t Westelik stik van Lotharingn, dat achter ’t verdrag van Meerssen in 870 by West-Francië gekommn was, kwam nu ook by Oost-Francië. Lodewyk den Joungn krêegt doadeure hêel Lotharingn.
Den êestn november 878, e joar achter den dôod van Karel den Kletsn, woarn zyn zeune Lodewyk den Hakkeloare en Lodewyk den Joungn in Voern tegoare gekommn, vo d’akkôordn van ‘t Verdrag van Meerssen te bevestign. Z’han ofgesprookn van tegoare an één kant te stoan teegn de Vikings en makoars jounges te beschermn.
Den 10stn april 879 stierf Lodewyk den Hakkeloare en zyn twi oudste zeuns volgdn hem ip. Ze woarn nog mo 15 en 13 joar oud.
Lodewyk den Joungn profiteerde van den dôod van zyn nounkel vo West-Francië binn te valln, vo ’t westelik stik van Lotharingn te verovern.
En Provence wilde de zeuns van Lodewyk den Hakkeloare nie ols ipvolger. Ze koozn Boso van Provence (gin Karolienger). Je stichtte ‘t keuninkryk Lêger-Bourgondië (of Cisjuranië), en je liet hem uutroepn tout keunink.
Achter ‘n ende kwoamn de Karolingische keuniengn, Lodewyk den Joungn van Oost-Francië en Lodewyk III en Karloman van West-Francië, overêen vor hunder gevecht vo Lotharingn te stoppn, vo sterker te stoan teegn Boso van Provence en ook teegn de Vikings.
In februoari 880 kwoamn ze tegoare in Ribemont vo te têeknn. Lodewyk den Joungn kost azo de grenze van zyn keuninkryk verschuuvn no ’t westn. Die grenze wierd nu gevormd deur de Schelde en nie me deur de Moas, en Henegouwn, Luuk en Noamn kwoamn nu by Oost-Francië.
‘t Was de latste verdêlienge van ‘t Frankisch Ryk en die grenze tusschn Vrankryk en Duutsland blêeft de reste van de Middelêeuwn bykan ounveranderd.
D’irdere verdêliengn van ‘t Frankisch Ryk woarn:
- 't Verdrag van Verdun (843)
- 't Verdrag van Prüm (855)
- 't Verdrag van Meerssen (870)
