Vlaams Belang

Van Wikipedia
Ga naar: Begunplekkn, zoeken
Logo

Vlaams Belang is een Vlamsche polletieke party die bestoat sedert 14 november 2004. Ze is reks-conservatief (volgens de partymenschn), extreem-reks toet platweg racistisch-populistisch (volgens polletieke tegenstanders).

Geschiedenisse[bewerkn | brontekst bewerken]

Vlaams Belang is de opvolger van 't Vlaams Blok. In 2004 woarn drie vzw's verboundn me 't Vlaams Blok angekloagd en verôordeeld voe racisme deur 't Hof van Cassoasje, de ogste rechtbank va België. De drie vzw's woarn:

  • De Vlaamse Concentratie, den ountvanger en behêerder van den overheidssubsidies van 't Vlaams Belang,
  • De Nationalistische Omroepstichting, da zorgt vo de radio- en televisieprograms en
  • Het Nationaal Vormingsinstituut, da zorgt vo de vormieng va de koadrleedn van 't Vlaams Belang.

Doarip besloot de party van noame te verandern.

Tot in 2006 giengn de verkieziengsuutsloagen van't VB oltyd moa in stygende lyne. Vô de Gemêenteroadsverkiezingn 2006 krêeg Filip Dewinter en koude douche deur 'n uutslag van Patrick Janssens, moa ôok in de grôte steedn was't nie oltyd ne vettn.

Anno 2007 zien we veranderiengn in de winnoarsmentaliteit en stuuft et ol ne kêe in den top van 't VB. Me de nieuwe "Lyste Dedecker" ester ne nieuwn die komt vissen in dezelfdn vyver.

By de verkieziengn van 7 juni 2009 oalde de partie 15,28% van de stemmn voe 't Vlams Parlement en 15,88% voe d' Europeesche verkieziengn. Da wos e verlies van 8,86% en 7,28% vergeleekn met de vôorige Vlamsche en Europeesche parlementsverkieziengn van 't Vlams Blok.

By de federoale verkieziengen van 2010 gieng 't Vlaams Belang were achteruut. In de Koamer zakte de partie toet 12,3% van de stemmn, e verlies van 6,7%. Ze woarn vuuve van under 17 zetels kwyt. In de Senoat giengn ze 6,92% achteruut toet 12,28%. Doa woarn ze twêe van under vuuf zetels kwyt (voe de rechtstreeks verkoozn senateurs).

Oofdpuntn van 't programma[bewerkn | brontekst bewerken]

Sedert die verôordelienge probeert 't Vlaams Belang neur racistiese parleej e bitje in te perkn. Moa nie olle verkooznen sloagn doa even goed in. Dat is oek normoal: de arde kritiek op immigrantn is oek êen van de belangrykste reed'nen vowuk da 't Vlaams Belang goed scôort in de verkiezingn.

  1. De vrimde die ier weunn, moetn nunder anpassen a nuuze toale e de Vlamsche cultuur.
  2. Der meugn gin nieuwe vrimde mêer immigreern in België.
  3. Vloandern oenofankelik. Dikkers verwôord in de krete België barst.
  4. Mêer blauw op stroate voe mêer veiligheid en e betere bestryding van de criminaliteit.
  5. De familie is belangryk. Vele mêer kindjesgeld om de voader of de moeder by 't gezin te loatn in de plekke va te goan werkn.
  6. Economie: minder macht voe de vakboundn, gin geldstroomn ne mi na de Woaln e na Brussel.

De Vlams Belangers zelve zeggn dikkers dan de 'traditionele' partyen ol vele van nunder standpuntn geweune overenoomn en. Objectif ezien is dat oek wel woa. E vôorbeeld: overtyd wos 't e schande om te zeggen "aanpassen, of werekêern na joen land" tegen e vrimdelieng. Moa nu durvn oek d'ander partyen dat ol te zeggn. Zelfs de partyen ol de lienkerkant zyn in de loop der joarn opeschoovn na 't centrum.

De kopstikkn[bewerkn | brontekst bewerken]

De nieuwn vôorzitter sedert ende 2012 is Gerolf Annemans, die Bruno Valkeniers ipvolgde. Vôodien wos 't Frank Vanhecke, ipvolger van stichter Karel Dillen. Andere kopstikkn zyn Filip Dewinter, Filip De Man, Marijke Dillen, Barbara Pas en Anke Van dermeersch.

Zôwel Frank Vanhecke as Filip Dewinter zyn afkomstig van Brugge, moa 't centrum van de party en ulder activiteitn liggn in Antwerpen. In november 2009 gaf Frank Vanhecke zyn ountslag uut 't partybesteur van 't Vlaams Belang.

Externe koppelienge[bewerkn | brontekst bewerken]

Wikimedia Commons