Vrede van Atrecht (1482)

Van Wikipedia
Ga naar: Begunplekkn, zoeken

De Vrede van Atrecht van 23 december 1482 wos e verdrag tusschn Maximiliaan van Oostnryk en Lodewyk XI van Vrankryk.

Achter den dood van Maria van Bourgondië in 1482 kwoamn de Vlamsche steejn, en nie in et minst Gent, in upstand tegen den vrimdn buutnlandschn vorst Maximiliaan. De reedn iervoorn wos da deur Maria’s dood et Groot Privilige verviel. De Vlamsche steejn addn da Groot Privilege in 1477 van Maria ofgedwoungn vlak achter den dood van eur voader Karel de Stoute. In da Privilege èn ze ol under oude gunstn en vryeedn were upg’eist.

Moar de Vlamsche steejn addn ook benauwd dat Maximiliaan were gienk begunn te vichtn tegen Vrankryk. Want Maximiliaan wilde de gebiedn were verovern da Lodewyk XI in 1477 binn de kortste keern ad g’annexeerd achter den Slag by Nancy woar da Karel de Stoute et leevn a geloatn.

Surtout Gent sloagde derin vo Maximiliaan te loatn ounderandeln mè de Stoatn-Generoal. Doar dwoungn ze Maximiliaan nog in dazelste joar tout e verdrag mè Lodewyk XI, de Vrede van Atrecht. In da verdrag kwoamn de twee overeen vo Margaretha van Oostnryk, dochter van Maximiliaan en Maria, te loatn trouwn mè den Franschn dauphin. Lik uwelikscadeau gof Maximiliaan Franche-Comté en Artesië an de Fransche.

Lodewyk a zynen slag binng’oald. Moar lange èt da nie gedeurd want achter den dood van Lodewyk in 1483 trok Maximiliaan et verdrag were in. Oundertusschn kreeg ’n em d’ene Vlamsche stee achter d’andere were ounder controle. Je wilde ook nen nieuwn oorloge begunn tegen ’t Fransche moa de Vlamsche steejn dein nie mè. Ze wildn zynder den oorloge nie bluuvn betoaln en droungn an up vrede mè 't Fransche. By de Vrede van Senlis in 1493 wisselden Maximiliaan en den nieuwn Franschn keunienk Karel VIII de groafschappn Artesië en Franche-Comté uut tegen Picardië en et ertogdom Bourgondië, die nu vo goed by Vrankryk kwoamn.