Willem Clito

Van Wikipedia
Willem Clito
1102 - 1128
Groaf van Vloandern
Periode1127 - 1128
VôorgangerKarel de Goein
IpvolgerDiederik van den Elzas
VoaderRobert Curthose
MoederSibylle van Conversano

Willem Clito of Willem van Normandië (Rouen, 25 oktober 1102Oalst, 28 juli 1128) was groaf van Vloandern van 1127 tout 1128.

Willem was den oudste zeune van hertog Robert Curthose van Normandië en Sibylle van Conversano, en e klêenzeune van Willem de Veroveroare en Mathilda van Vloandern. Zyn grotmoeder Mathilda van Vloandern was de zuster van Robrecht de Fries. De dochter van Robrecht de Fries, Adela van Vloandern was de moeder van Willems vôorganger Karel de Goein.

De noame Clito was e middelêeuws-Latynschn term, equivalent met et Angelsaksisch woord Aetheling. ’t Wilde zeggn van oadel, en ’t wierd gebruukt vo prinsn an te duudn van de keunienklikke dynastye, die verkiesboar woarn vo ‘t keunienkschap. De gelatiniseerde Germoansche vorm Adelin(us) wierd gebruukt by zyn kozyn Willem Adelin, zeune van Hendrik I van Iengeland.

Zyn leevn[bewerkn | brontekst bewerken]

Achter da Willems voader, Robert Curthose, versleegn was deur zyn broere Hendrik I van Iengeland in de Slag by Tinchebray (28 september 1106), wierd ie overmêesterd en gevangn gezet. De klêne Willem kwam in handn van zyn nounkel, die Willems halfzuster, ’n ounwettige dochter van Robert Curthose, vor hem liet zorgn. Ze was getrouwd met Helias van Saint-Saens, die in 1112, achter de rik van Hendrik I, mè Willem vluchtte no ’t hof van groaf Boudewyn VII van Vloandern.

Van 1109 was ter standvastig boel tusschn Hendrik I en de Fransche keunienk Lodewyk VI den Dikkn. De Fransche keunienk kost nie verdroagn dat Hendrik zyn broere Robert Curthose ipgeslootn haad, en hem ounrechtmoatig boas gemakt haad van Normandië in ’t noadêel van Willem.

In 1123 trouwde Willem mè Sibylle van Anjou en krêegt ie Maine mee. Mor under huwelik wierd g’annuleerd, ip ground van bloedverwantschap, deur paus Honorius II, in ipdracht van Hendrik I.

In 1127 ist ie ton hertrouwd mè Johanna, dochter van Gisela van Bourgondië en 'n halfzuster van Adelaide van Maurienne, vrouwe van de Fransche keunienk Lodewyk VI.

Achter da groaf Karel de Goein in 1127 vermôord was in de Sint-Donoaskerke in Brugge, gerakte Vloandern in e serieuze crisis, omda Karel zo geirn gezien was en omdat ‘n gin ipvolger haad. Mo der woarn veel kandidoatn:

De Fransche keunienk profiteerde van de chaos deur Willem Clito an te stelln ols ipvolger. Je peisde dat ‘n azo van Vloandern e sterkn boundgenôot kost moakn teegn de keunienk van Iengeland. Mor economisch kwoamn Vloandern en Iengeland goed overêen, omda Vloandern Iengelsche wulle nôdig haad vor under loaknindustrie.

Willem ha wel ’t grotste stik van zyn jeugd in Vloandern deuregebrocht, mo je wist nie hoe dat ’n e groafschap most besteurn. Je besefte nie dat er de latste joarn grôte veranderiengn gebeurd woarn in de stedelikke ountwikkelienge en j’hield gin rekenienge met ol de rechtn dan de gemêentn gekreegn haan ounder Boudewyn Hapkin en Karel de Goein, in ’t noadêel van de groafelikke macht.

Olgouwe begostn z’overol in ipstand te kommn teegn hem. In Rysel en Sint-Omoars wierdn ze zwoar gestraft. Mor o Willem ip weg was no Gent haan z’under doa voorbereid deur twi machtige hêern van Ryksvloandern, Daniel van Dendermonde en Ywan van Oalst, te benoemn. Ze voeldn under sterk, want Hendrik I van Iengeland haad under beloofd van Vloandern militair te steunn in geval dat er ’n oorloge zou van kommn.

Brugge en Gent wildn Diederik van den Elzas ols under groaf, en der kwoamn verschillige veldsloagn van. Ip 21 juni 1128 won Willem Clito de Slag by Axpoele teegn Diederik van den Elzas, die nog ip tyd kost vluchtn.

E moand loater is Willem gesneuveld by ’t beleg van Oalst. Je was mo 25 joar oud. Diederik van den Elzas volgdeg hem ip.

J’is begroavn in d’Abdye van Sint-Bertinus in Sint-Omoars.