Asterix

Van Wikipedia
Asterix en Obelix ip e meur in Hagen, Westfaaln

Asterix is e Fransche stripreekse van Albert Uderzo en René Goscinny. Achter da Goscinny dôodgienk in 1977, het Uderzo ollêne vors edoan. 't Bestoan oundertusschn 33 officiële titels en nog êentige specioale uutgoavn.

't Goat verre ossan over d'inweuners van e klêen dorptje in Armorica (nu Bretagne) in Gallië (oude noame van Vrankryk in 'n tyde van de Keltn en de Romeinn) die bluuft vichtn teegn de Romeinn, oundermêer teegn Caesar. Ze kunn mêestol winn deur dan ze e toverdranksje drienkn die ebrouwd is deur nunder druïde Panoramix en woadeure dan ze ounoverwinnelik kommn.

Aar zoakn die vele werekommn, zyn clichés over landn en nunder inweuners en wôordkluchtjes.

Personoages[bewerkn | brontekst bewerken]

  • Asterix: e klêenn, mor indeliks stoutn keirel. En het blound hoar en lik olle Galliërs het 'n oek e moustas. Up zyn hoofd het 'n en helme me kroaievlerkn up (etwot die in 't echt nie bestoeg). 't Is 't hoofdpersonoage en de mêeste verhoaln droain dus round nem. Ze noame komt van en asterisk, de benoamienge voun e sterretje woamei dat er verweezn is nor voetnootn (*).
  • Obelix: 'n dikstn en bestn moat van Asterix. En is menhirhouwer en dedie droagt 'n zevve round up ze rik (e kut dadde omdat 'n, at 'n klêne wos, in e pot met toverdrank evolln is en 't gerakt nie mir uutewrocht). Ze bekendste uutsproake is Rare jongens, die ..., woarachter dat 'n toune e vook zegt, lik Romeinn. E doe nie liever of vichtn me de Romeinn en joagn up everzweens (en ze vaneigns oek upeetn). Zyn noame komt van en obelisk, e sôorte monument uut 't oude Egypte.
  • Idefix: 't houndje van Obelix, die oek zot is van everzweens en Romeinn. E ku wel nie teegn boomn die omme ekapt zyn.
  • Panoramix: de druïde die zorgt vou 'n toverdrank woadeure dan de Galliërs ounoverwinnelik kommn.
  • Heroix (in 'n tyde Abraracourcix): stamhoofd en oek ossan grêed voun te vichtn. En is etrouwd me Bellefleur en thuus et 'n nie ol te vele te piepn.
  • Kakofonix (in 'n tyde Assurancetorix): bard die nie ku ziengn en die deur Hoefnix ('n smed) geregeld ekir in de ground esleegn is.
  • Kostunrix: visverkoper die gin goeie zoakns doet omdan olle menschn van 't dorptje vele liever everzwynevlêes eetn. E komt geregeld in stokke met 'n smed Hoefnix.
  • Hoefnix: 'n smed, e keirel me vele macht die ossan met en hoamer roundlopt. En affrounteert oek 'n oudstn van 't dorp geirn.
  • Nestorix: 'n oudstn van 't dorp, en het nog evochtn in Alesia. En is etrouwd met e wuuf die vele jounger is of nem.
  • Caesar: Romeinschn keizer die der nie goed teegn kut dan 't Romeinsche leger e klêen dorptje nie kut overmêestern.

Boekn[bewerkn | brontekst bewerken]

't Bestoan 33 officiële albums.

Têeknfilms[bewerkn | brontekst bewerken]

't Zyn ol 8 têeknfilms emakt.

  • Asterix de Galliër (1967)
  • Asterix en Cleopatra (1968)
  • Asterix verovert Rome (1976)
  • Asterix contra Caesar (1985)
  • Asterix bij de Britten (1986)
  • Asterix en de knallende ketel (1989)
  • Asterix in Amerika (1994)
  • Asterix en de Vikingen (2006)

Films[bewerkn | brontekst bewerken]

't Bestoan oundertusschn 3 langspeelfilms.

  • Asterix & Obelix teegn Caesar (1999)
  • Asterix & Obelix: missie Cleopatra (2002)
  • Asterix en de Olympische Spelen (2008)

Externe koppelienge[bewerkn | brontekst bewerken]

Wikimedia Commons