De Garre (Brugge)
De Garre is êen van de smolste stroatn in Brugge, geleegn in 't êrte van den iestôoriesche stad. "Garre" of "Gêrre" wilt zeggn in 't West-Vlams e smolle oopnienge of spleete.
Stroate en zeifs stratje zyn e bitje oovredreevn noame vo tgêene mor e smolle gank is of e steegstje. 't Volt weinig ip, deur zyn liggienge tusschn twêe wienklpandn in de Breidelstroate en 't ku wordn ofgeslootn deur 'n yzrn êkkn.
Toch is 't bekend by de Bruggliengn en toeriestn vo de lokoasje en d' anweezigeid van een bruun kafee. 't Is e zystratje van de Breidelstroate, die de Grôote Mart mê de Burg verbiendt.
Geschiednisse
[bewerkn | brontekst bewerken]De Garre êete in de 16ste êewe 't "Zuudzêepstratje", nor e zêepefabrieksje da doa stoend. Roend 1800 kwam de noame "De Garre" in gebruuk. In 1884 gaf 't stadsbestier dr d' offiesjêele noame "Zeepstraat" an. In de vôksmoend blêef 't pertank "De Garre", tgêene ip 't latste ook in 1936 lik offiesjêele noam wierd anveird.
Eigentlik êetn de Bruggliengn 't - en nog oltyd - De Garre van Koneei (deur sommigtn geschreevn lik "Cornée" of "Kornee"). Dadde verwêes no de gebeur, bakkre Corné (of Edouard Corneille), die 't stratje apeupri lik zyn eigndom bekêek en zorgde vo 't êkkn woamee datn 't 's navens ofslôot, vo de toegank vo wildplassers te belettn. 't Stratje a inderdoad noga e reputoasje ip da vlak. E vôksvêrzetje ieroemtrent is an veele Bruggliengn nog oltyd bekend en luudt:
- Siessn stoend te piessn
- in de Garre van Koneei,
- d'er kwoamn twêe agentn
- en ze pakten Siessn mee.
- Siessn zei: 'k ên nog nie gedoan
- en ze lietn êm do stoan.
Ôorsproenklik wast e brandstratje woalans dazze verbiendienge zochtn mê de reie vo by brand bluswoatre te kunn anvoern. In 't steegsje stoendr e oopnboare woatrepoempe, die vor êenigte oovrelast zorgde, omda d' oemweunndn doa oltyd mo woatre kwoamn oaln.
E bitje voddr kykn
[bewerkn | brontekst bewerken]- (nl) Buysse, Emiel 1958 : Rond het Zeepstraatje (Garre van Conné), in : Vlaams Weekblad, 12 november 1958.
- (nl) Buysse, Emiel 1965 : De geheimen van de Garre van Conné ontsluierd, in : Burgerwelzijn, 26 november 1965.
- (nl) Schouteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
- (nl) Rau, Jaak A. 1990 : De geheimen van de Garre van Conné ontsluierd?, in : Brugs Ommeland, blz. 89-100.
- (nl) Rau, Jaak A. 1990 : Nog over de Garre van Cornee, in : Brugs Ommeland, blz. 196.
- (nl) Weymeis, Chris 2011 : Brugge van Academiestraat tot Zwijnstraat. Geschiedenis van de straten in de binnenstad, Deel I, A-D, Brugge, ISBN 9781845886608.
|
Ofbeeldiengn die ier by passn ku je vien in de categorie De Garre (Brugge) van Wikimedia Commons. |