Emmy Award

Emmy Awards
Uutgereikt vo	Uutzounderlikke prestoaties in de tilleviesje-industrie
Uutgereikt deur	ATAS / NATAS / IATAS
Land	Verênigde Stoatn
Êeste uutreikienge	25 januoari 1949
Websites	televisionacademy.com/awards emmyonline.tv iemmys.tv

De Emmy Awards, of d' Emmys, zyn een uutgebreide reekse pryzn vo artistieke en technische prestoaties in de tilleviesje-industrie. Een antal joarlikse Emmy Award-ceremonies wordn deurhen 't joar g'houden, en z' hen idder under eign set van regels en pryscategorieën. De twêe evenementn die de mêeste andacht van de media krygn, zyn de Primetime Emmy Awards en de Daytime Emmy Awards, die respectievelik uutzounderlik werk eeren in d' Amerikoansche primetime- en daytime-entertainmentprogrammaties. Andere gekende Amerikoansche nationale Emmy-evenementn omvattn de Children's & Family Emmy Awards vo kiender- en familiegerichte tilleviesjeprogramma's, de Sports Emmy Awards vo sportprogramma's, de News and Documentary Emmy Awards vo nieuws- en documentaireshows, en de Technology & Engineering Emmy Awards en Primetime Engineering Emmy Awards vo technologische en ingenieurs-prestoaties. Regionoale Emmy Awards wordn ôok ip verschillige momentn binst 't joar in 't hêle land uutgereikt ter erkennienge van uutmuntendheid in de lokoale tilleviesje. Doarneviëst eeren d' International Emmy Awards de topkwaliteit in tv-programma's die buutn de Verênigde Stoatn zyn geproduceerd en vôor d'n êestn kêer zyn uutgezoundn.

D' Emmy-statuette, die e gevleugelde vrouwe toogt die een atoom vasthoudt, is vernoemd noar "immy", een informele term vo de image orthicon-buize (beeldbuize) die stief vele wierd gebruukt in vroege tilleviesjecamera's. 't Wordt anzien lik êen van de viere grôte joarlikse Amerikoansche entertainmentpryzn, tegoare me de Grammy vo muziek, den Oscar vo film en de Tony vo theater.

De Emmys wordn uutgereikt deur drie gerelateerde, moar ounoafhankelikke organisoaties: de Academy of Television Arts & Sciences (ATAS), de National Academy of Television Arts & Sciences (NATAS), en de International Academy of Television Arts and Sciences (IATAS). Elk van dizze drie organisoaties is verantwôordelik voor 't beheern van e specifieke reekse van Emmy Award-ceremonies. De ATAS deêlde in 1949 de êeste Emmys uut ter eere van shows die in de streke van Los Angeles wierdn geproduceerd, vôorn dat 't in de joaren 1950 een nationaal evenement wierd om programma's te bekroonen die over 't hêle land wierdn uutgezounden. In de doarippevolgnde twêe decennia en de ATAS, de NATAS en de IATAS de prys uutgebreid om ôok andere sectoren van de tv-industrie te eeren.

Geschiedenisse

De Philo T. Farnsworth Primetime Emmy-trofee vo NASA Television uut 2009.

De in Los Angeles gevestigde Academy of Television Arts & Sciences (ATAS) richtte den Emmy Award ip als dêel van een imagobouwende en public relations opportuniteit. De êeste Emmy-ceremonie vound plekke ip 25 januoari 1949, in de Hollywood Athletic Club, moar uutsluutend oem shows the lauweren die lokoal in d' umgevienge van Los Angeles woarn geproduceerd en uutgezoundn. Shirley Dinsdale eêt d' eere van d' allereêste Emmy Award ôoit t' ountvangn vo Meest Uutzounderlikke Tilleviesjepersôonlikeid, binst die eêrste prysuytreikienge. De terme "Emmy" komt vôort van "Immy", de slang in de tilleviesje-industrie vo een image orthicon-buize uut e tv-camera.

In de joaren 1950 breidde de ATAS d' Emmys uut noar e nationoal evenement om shows t' eeren die landsbreed wierdn uutgezounden ip reguliere tilleviesje. In 1955 wierd de National Academy of Television Arts and Sciences (NATAS) in New York City ipgericht als e zusterorganisoatie om leedn an de Ôostkust van de Verênigde Stoatn te bedien'n. Binst da de ATAS een aparte ceremonie bleêf houden om shows the bekrôonen die lokaal in d' uhmgevinge van Los Angeles woarn uutgezoundn, richtte de NATAS regionale ofdeeliengn ip in de rèste van de Verênigde Stoatn, woarby dat iddere ofdeeling under eign lokoale Emmy-ceremonie ountwikkelde vo de lokale programma's.

Ôorspronkelik was er moar êên Emmy-evenement per joar da g'houden wierd oem de nationoale Amerikoansche tilleviesjeuutzendiengn t'eeren. In 1974 vound d' eêrste Daytime Emmy-ceremonie plekke om specifiek de prestoaties in natsjonale dagprogrammoaties te vieren. Andere regiogebounden Emmy-evenementn volgden al redelik zêre. Oôk d' International Emmy Awards, voor 't eeren va tilleviesjeprogramma's die buutn de Verênigde Stoatn zyn gemakt en uutgezondn, wierd in 't begun van de joarn 1970 ipgericht. Binstdoen stoan olle Emmys die vôor d'n ipkomst van die ofzounderlikke, streekgebounden pryzn wierdn uutgereikt, ipgelyest tegoare met de Primetime Emmy Awards in d' officiële registers van de ATAS.

In 1977 braakn de ATAS en de NATAS under bandn deur verschillige conflictn. Z' kwoamn overêen om 't eigndomsrecht van 't Emmy-beeldje en 't handelsmerk te dêeln, woarby da ze idder verantwôordelik woarn voor 't beheern van e specifieke reekse prysuytreikiengn. Der wos een uutzounderienge vo de Engineering Awards (pryzn vo individu'n, bedryvn of wetenschappelikke of technische organisoaties ter erkennienge van belangryke ountwikkeliengn en bydroagn an de technische en technologische aspectn van tilleviesje): De NATAS bluuft de Technology & Engineering Emmy Awards beheern, binst da de ATAS de ofzounderlikke Primetime Engineering Emmy Awards uutreikt.

Met d' ipkomste van kabeltilleviesje in de joarn 1980, kwoamn kabelprogramma's in 1988 vo d'n êestn kêer in anmerkienge vo de Primetime Emmys, en vo de Daytime Emmys in 1989. In 2011 annuleerde ABC de soapseries All My Children en One Life to Live, en verkocht de licentierechtn van de twêe shows an productiebedryf Prospect Park zoda ze kostn vôortgezet wordn ip streamingtilleviesje; dit zette de NATAS ertoe an om e nieuwe Daytime Emmys-categorie te moakn vo de ceremonie van 2013 oem zukke exclusieve webseries t'eeren. De ATAS begost oôk in 2013 met 't anveirden van orihinele exclusieve online streamingtilleviesjeprogramma's.

In december 2021 koundigden de ATAS en de NATAS e grôte erstructurerienge an van de nationale Emmy Award-ceremonies ols reactie up de groei van streamingtilleviesjeprogramma's, wuk dat de grenzn vervoagde by 't bepoaln wukke shows ounder Daytime of Primetime volln. D' ofbakenienge van iddere ceremonie zou nu droain round factorn lik de thema's en frequentie van de programmoatie, in plekke van 't moment van uutzenden (dayparts). Ounder de grôte veranderiengn zoun daytime-drama's in de Daytime Emmys bluven, moar de mêeste andere gescripte drama's en komedies zoun veruuze noar de Primetime Emmys. Olle kienderprogrammoatie zoudt overgoan noar de nieuw g'ïntroduceerde Children's & Family Emmys die de NATAS eêrder in november 2021 ad ankoundigd. Ochtendshows (morning shows) zoun veruuze van de Daytime Emmys noar de News & Documentary Emmys, en talkshows zoun nu verdêeld wordn tusschn de Daytime en Primetime Emmys up boasis van "formoat en stylkenmerkn die weerspiegeln ofda 't goat oem daytime- of latenoavondprogrammoatie". De erstructurerienge van de spelprogramma's en instructieve programmacategorieën wierd loater in 2023 bepoald.

Statuette

Den Emmy-statuette, die e gevleugelde vrouwe toogt die een atoom vasthoudt, wierd ountworpn deur tilleviesje-ingenieur Louis McManus, dien zyn wyf gebruukte als model. De ATAS verwierp zeevnenveertig vôorstelln vôorn da z' under vasteleidn up 't ountwerp van McManus in 1948. De statuette "is sedertdien 't symbool gewordn van 't doel van de TV Academy om de kunste en wetenschap van tilleviesje t' oundersteunen en te verheffen: De vleugels stoan vo de muze van de kunste; d'n atoom vo d'n elektron van de wetenschap."

By 't bepoaln van e noame vo de prys, stelde ATAS-iprichter Syd Cassyd in 't begun "Ike" vôorn, de bynoame vo de tilleviesje-iconoscoopbuize. "Ike" was echter ôok de populaire bynoame van d'n held van den Twiddn Weireldoorlog en loatere Amerikoansche president Dwight D. Eisenhower, en de ATAS-leedn wildn eitwa unieks. Uuteindelik stelde tilleviesje-ingenieur en de derdn academy-president Harry Lubcke de noame "Immy" vôorn, e term die vele wierd gebruukt vo d' image orthicon-buize die in de vroege camera's wierd gebruukt. Achter da "Immy" was gekoozn, wierd 't loater vervrouwelikt toet Emmy om te passn by d' under vrouwelikke statuette.

't Gewicht en d' ofmetingn van den Emmy-statuette varieern per evenement. Elke Primetime Emmy-statuette weegt 3,08 kg (6 lb 12,5 oz) en is gemakt van koper, nikkel, zilver en goud. 't Beeldje is 39 cm (15,5 inch) oge met e boasisdiameter van 19 cm (7,5 inch) en e gewicht van 2,5 kg (88 oz). De Regional Emmy Award-statuette is 29 cm (11,5 inch) oge met e boasisdiameter van 14 cm (5,5 inch) en e gewicht van 1,4 kg (48 oz). 't Pakt idder kêer vuuf en een alve euren oem d'r eentje te moaken en ze wordn vastegepakt me witte andschoen'n oem viengeroffdrukkn te vôorkommn. De Primetime Emmy-beeldjes wordn gemakt deur R.S. Owens & Company gevestigd in Chicago, Illinois, die oôk verantwôordelik was voor 't moaken van d' Academy Award-beeldjes toet 2016, ton da d' AMPAS overstapte noar Polich Tallix in Walden, New York. De Regional Emmy Awards wordn gemakt deur zowel R.S. Owens & Company als Society Awards, e bedryf uut New York da ôok de Golden Globe Awards makt.

Ols eigendoars van 't handelsmerk (trademark) handhoaven de ATAS en de NATAS strakke regels vo 't gebruuk van d' ofbeeldienge en de noame van d' "Emmy". Bêvoorbeeld moe den Emmy-statuette assan noar links kykend afgebield stoan. Elke copyrightmededeêlieng voor 't beeldje moe "ATAS/NATAS" vermeldn, zoda de twêe academies an bod kommn. Academy-leedn moetn ôok tostemminge vroagn oem de ofbeeldienge of noame van 't beeldje te gebruukn vo promotionele doeleindn, zels ol zyn ze winnoars van de prys. Doarnoast meugen DVD's van Emmy-winnende shows verwyzen noar 't feit da ze een Emmy hen ountvangn, moar ze meugn d' ofbeeldienge van 't beeldje nie gebruukn tenzy dat 't in stoat is om êen joar achter d' uutreikienge van olle kopieën te wordn verwyderd.

Sôortn

Emmy-evenementn (gedêeltelikke lyste)

Beherende academy	Evenementn
ATAS	Primetime, Creative Arts, Primetime Engineering, Los Angeles Area, College TV
NATAS	Daytime, Daytime Creative Arts, Children's & Family, Sports, News & Documentary, Technology & Engineering, Regionoal (uutgezounderd Los Angeles), National Student Production
IATAS	International

Verschillige Emmy-evenementcompetities wordn joarliks g'houden gedurende 't kalenderjoar, goande van 't eeren van nationaal uutgezounden shows toet regionaal en lokoal geproduceerde programma's. Elk evenement et under eign set van pryscategorieën, nominoatie- en stemprocedures, en regels in verband me stemcomités. 't Is nie oungeweune dat 't eên evenement sommigte van dezelste categorienoamen et liek da een aâr evenement gebruukt (byv. de Primetime Emmy vo Uutstekende Dramaserie en de Daytime Emmy Award vo Uutstekende Dramaserie).

E show die meedoet an êen van d' Emmy-evenementn, kan normoal geziên nie oôk an de andre meedoen. Bêvoorbeeld, gesyndiceerde shows (syndicated shows) woarvan d' uutzendtyden variëren tusschn mediamarktn, kunn in anmerkienge kommn vo zowêl de Daytime als de Primetime Emmys, moar kunn nie an alletwêe dêelnemen. In 't algemêen wordt e show als nationoal anzien als 't mêer of 50 percent van d' Amerikoansche huushoedens bereikt; programma's die nie an minstens 50 percent van 't land groaken, kunn in plekke doarvan dêelnemen an de Regionale Emmys. Streamingtilleviesjeshows wordn ip e vergelikboare maniere behandeld as gesyndiceerde shows: ze moetn beschikbaar zyn vo te downloadn of te streamen deur mêer of 50 percent van d' Amerikoansche nationoale markt om in anmerkienge te kommn vo êen van de nationoale Emmy-competities, en ze kunn moar an êen van die nationoale Emmy-ceremonies meedoen. En e primetime show die e coproductie is tusschn Amerikoansche en buutenlandsche bedryvn kan in anmerkienge kommn vo zowêl de Primetime als de International Emmys, moar kan evenêens nie an alletwêe dêelnemen.

Oungeacht in wukke specifieke regiocompetitie dat eentwien een Emmy wint, wordn ol de winnoars "Emmy-winnoare" genoemd. Desoundanks zyn d'r e poar menschn die de Primetime Emmys as superieur an de andere Emmy-competities beschouwn.

Primetime

Actrice Dana Delany me een Primetime Emmy Award in 1992

Komiêk Garry Shandling binst de rëpetities van de 45ste Primetime Emmy Awards in september 1993

Hoofdartikels: Primetime Emmy Award en Lyste van Primetime Emmy Award-ceremonies

De Primetime Emmys wordn uutgereikt ter erkennienge van uutzounderlikke prestoaties in d' Amerikoansche primetime-tilleviesjeprogrammoatie. Ceremonies wordn over 't algemêen g'houden in d'n helft van september, ip de zundag vôorn d'n officiële start van 't najoarsseizoen ip de tilleviesje, en wordn teegnwoordig in e beurte-rolle uutgezoundn deur de netwerkn ABC, CBS, NBC, en Fox, woarby dat elk netwerk om de viere joar d' uutzendinge vo zyn rekenienge pakt.^{[bronne nôdig]}

Sommigte pryscategorieën die wordn uutgereikt an persônêel achter de schermn, lyk art directors, kostuumountwerpers, cameramans, casting directors, en geluudsountwerpers, wordn toegekend ip een aparte Creative Arts Emmys-ceremonie die e poar doagen êerder deuregoat.

De Primetime Emmys wordn georganiseerd en gestemd deur leedn van de ATAS. Vo de mêeste categorieën stemmn de leedn van idder van de ATAS-takkn (branches) round juni om de genomineerdn uutsluutend in under eign categorie te bepoaln. Olle leedn meugen stemmn vo de nominoaties in de categorieën vo beste programma's. De finoale stemmienge om de winnoars an te duuden wordt in ogustus g'houden.

Daytime

Tv-producer en schryver Bradley Bell nimt Daytime Emmy Awards in ountvangste vo zyn werk an de daytime-soapserie The Bold and the Beautiful in 2010

Hoofdartikel: Daytime Emmy Award

De Daytime Emmy Awards, mêestal g'houden in meie of juni, wordn uutgereikt ter erkennienge van topkwaliteit in d' Amerikoansche daytime-tilleviesjeprogrammoatie. De ceremonie vound traditioneel plekke in meie of juni; moar in 2025 wierd het verplatst noar oktober. D' êeste Emmys gericht ip daytime-televisie wierdn in 1972 uutgereikt ip de primetime-ceremonie, moar d' êeste ofzounderlikke prysshow uutsluutend vo daytime-programma's wierd pas in 1974 g'houden.^{[bronne nôdig]}

Zjuuste lik by de Primetime Emmys wordt er e poar doagen êerder ôok een aparte Creative Arts Emmy-ceremonie g'houden om 't persônêel achter de schermn van daytime-tilleviesje in de blommn te zettn.^{[bronne nôdig]}

De Daytime Emmys wordn g'organiseerd en gestemd deur leedn van de NATAS. De stemmienge wud gëdoan deur beoordêelingspanels van collega's. Elk actief lid van de NATAS dat in de latste vuuf joar minstens twêe joar lank natsjonoale televisiecredits êet verzoameld, komt in anmerkienge om een jurylid te zyn. Ofhankelik van de categorie gebeurt 't stemmn via e criteria-systeem vo puntn of een systêem gebaseerd up vôorkeure. Olle acteercategorieën in de dramareeksen hen een extra vôorrounde genaamd de pre-nominoaties, woarby da d'r êen of twêe acteurs per show wordn geselecteerd oem deur te goan en overwogen te wordn voor de hoofdnominoaties van de pryzn.

Sport (Sports)

Zie ôok: Sports Emmy Award

De Sports Emmy Awards wordn uutgereikt deur de NATAS vo uutmuntendheid in sportprogrammoatie. De prysuytreikienge vound idder joar plekke in de lente, mêestal in de latste twêe weekn van april of d' êeste weke van meie, en wordt g'houden ip e moandagoavend in New York City.

De stemmienge gebeurt deur jury's van collega's uut 't vak. De NATAS roept iddereen up die uutgebreide ervoarienge et in de natsjonale sportproductie om ols jury ip te teedn. De panels zyn azo g'organiseerd da z' moar êen vertegenwôordiger hen van elke bedryfsorganisoatie (d.w.z. Paramount Global, Disney, NBCUniversal, Fox Corporation, Warner Bros. Discovery ezv.). De mêeste categorieën hen moar één stemrounde woarby dat er e vôorkeurssysteem wud gebruukt. De beste 5 inzendienh'n in elke categorie wordn angekoundigd lik nominoaties, en d'n topper doarvan wordt loater ip de ceremonie angekoundigd lik de Emmy-winnoare.

Nieuws en documentaire (News and documentary)

Zie ôok: News & Documentary Emmy Award

De News & Documentary Emmy Awards wordn uutgereikt deur de NATAS vo uutzounderlikheid in nationale nieuws- en documentaire-programmoatie. De ceremonie vound vanouds iederen herfst plekke; in 2025 wierd het verplatst na juni.

De stemmiengn gebeurn weeral deur jury's van experten uut de branche. De NATAS vroagt iddereên met e goeie proktijkervoaring in nationale nieuwsverslaggevienge of documentaires oem in d' jury te zetelen. De mêeste categorieën hen twêe stemroundes, met ofzonderlyke jury's in iddere rounde. De beste inzendienh'n in elke categorie wordn angekoundigd lik nominoaties, waarna d'n absolute topkandidoat ip de uutreikienge de Emmy in ountvangste mag neemn.

Kienders en familie (Children's and family)

Hoofdartikel: Children's & Family Emmy Awards

Ip 17 november 2021 miek de NATAS bekend da ze vanaf 2022 zoun begunn me d' uutreikieng van de Children's & Family Emmys Awards vo uutzounderlikheid in kiender- en familietilleviesje. Doarvôorn vielen de mêeste categorieën vo kiender- en familieprogramma's ounder de reikwijdte van de Daytime Emmys, binst da programma's die vornoamelik in primetime wierdn uutgezonden, ounder de Primetime Emmys vielen. De NATAS lichte too da deze nieuwe show nôdig was vanwege nen explosieven groei in kiender- en familieprogrammoatie binst de latste poar joar. Doarbnovehn schrapte de ATAS in 2020 ol heur primetime-categorieën vo kiendertilleviesje, woarby ze met de NATAS overêenkwam oem oalle degelyke categorieën noar de Daytime Emmys the verplaatsen, omdat 'n uutbreidienge van streamingdiensten verwarringe ad gecreëerd over of kienderprogramma's ounder de Daytime of Primetime pryzn zoun moeten vollen.

Ingenieurstechniek (Engineering)

Hoofdartikels: Primetime Engineering Emmy Awards en Technology & Engineering Emmy Award

Goddard Space Flight Center ingenieur Richard Nafzger, actrice June Lockhart en astronaut Buzz Aldrin neemn in 2009 de Philo T. Farnsworth Emmy Award in ountvangste noamens NASA, ter êre van de technologische innovaties die vo den êestn kêer wierdn gebruukt binst d' uutzendiengn van de moanelondienge van d' Apollo 11

De Primetime Engineering Emmy Awards, uutgereikt deur de ATAS, en de Technology & Engineering Emmy Awards, uutgereikt deur de NATAS, zyn twêe afzonderlikke competities die individu'n, bedryvn of wetenschappelyke/technische organisoaties eeren vo belangryke ountwikkeliengn en bydroagn an de ingenieurs- en technologische aspecten van tilleviesje. Over 't algemêen wordt de Technology & Engineering Emmys-ceremonie van de NATAS g'houden in januoari, binst da de Primetime Engineering Emmys van de ATAS in oktober wordn toegekend.^{[bronne nôdig]}

Iddere academy eêt zyn eign apart panel van ogekwalificeerde, ervoarn ingenieurs uut de tilleviesje-industrie om under respectievelikke prysountvangers an te duudn. Ounder 't repertoire van de Engineering Emmy Awards van de ATAS volt de Philo T. Farnsworth Award, egeev'n om bedryven in de blommn the zet'n die oever een lankdeurige periode de stoat van tilleviesje- en zendtechniek zwoar en beïnvloed.^{[bronne nôdig]}

Regionoal

New England sportpersôonlikeid Charlie Moore me e New England Emmy Award in 2011

WZDC-CD nieuwsdirecteur Maria Rozman, winnoaresse van drie National Capitol/Chesapeake Bay Regional Emmy Awards in 2018

Der zyn 20 regionale afdeeliengen verspreid over de Verênigde Stoatn die idder regionale pryzn uutdêeln ter erkennienge van uutmuntendheid in olle regionale tilleviesjemarktn, waarounder uutzendiengen per stoat, moar ôok lokoal nieuws en lokoal geproduceerde shows. Negentien van die regionale afdeeliengen zyn verboanden an de NATAS, binst da d' in Los Angeles gevestigde ATAS fungeert als de regionale afdeelienge die d' umgevienge van Los Angeles bedient.

In 't algemêen wudt e show als regionaal aanzien a't et nie mjîr of 50 percent van de Amerikoansche huushoedens bereikt; programma's die mêer of 50 percent van 't land bereik'n, moeten in plekke dervan meedoen an ene van de nationoale Emmy-competities.

Lyk d'n nationale pryzn, goat iddere regio deure zyn eihn nominoatie- en stemprocedures. Der worn comités iph'richt oem inzendietiengn te bekykn ip verkiesboarheid en ahe kwaliteitsnooken. Zodra geaccepteerd, goat iddre inzendienge langs verschillige reviewcomités, wovan udder stemmn wordn gebruukt oem de finale genomineerdn te bepoalen. De latste stemmn wordn ton geteld deur geregistreerde accountantsbureau's binn' iddere regio.

Donn Johnson, de vôorzitter van de afdeelienge Pacific Southwest, zei hierover in 2018: "De Emmy Award wordt anzien ols de mêest prestigieuze prys die e tilleviesjeprofessional ka winnen".

Ôorsprounkelik waarn de Regionale Emmy Awards allêene gericht ip 't eêrn van individuen in lokaal nieuws. Sindsdien zyn de regionale pryzen uutgebreid oem aal lokaal en per-stoat-geproduceerde shows t' umvatt'n die minder of vichtig procent van 't tilleviesjekykend publiek in 't land bereikn.

Regionale ofdeelienge	Stoatn in regio
Boston / New England	Maine, Massachusetts, New Hampshire, Rhode Island, en Vermont; 't Mêeste van Connecticut
Chicago / Midwest	Dêeln van Illinois, Indiana, en Wisconsin
Highlands Ranch / Heartlands	Colorado, Wyoming, Kansas, en Oklahoma; Dêeln van Nebraska
Dallas / Lone Star	Texas; Dêeln van New Mexico
Los Angeles (ATAS)	Allêene Greater Los Angeles
Brecksville / Central Great Lakes (vroeger Lower Great Lakes)	Dêeln van Indiana, Ohio, en Pennsylvania
Southfield / Michigan	Michigan
Arkansas / Mid-America	Arkansas, Iowa, en Missouri; Dêeln van Illinois en Louisiana
Delaware / Mid-Atlantic	Delaware; 't Mêeste van Pennsylvania; Dêeln van New Jersey en Ohio
Nashville / Midsouth	De tilleviesjemarkt van Huntsville, Alabama; Heêl North Carolina uutgezounderd de tilleviesjemarkt van Asheville; Tennessee
Maryland / National Capitol/Chesapeake Bay	Maryland, Virginia, en Washington, D. C.
New York / New York	New York; Dêeln van Connecticut en New Jersey
Alaska / Northwest	Alaska, Idaho, Montana, Oregon, en Washington
Kentucky / Ohio Valley	Kentucky en West Virginia; Dêeln van Indiana en Ohio
San Diego / Pacific Southwest	't Mêeste van Zuud-Californië (uutgezounderd Greater Los Angeles); Dêeln van Nevada
Rocky Mountain / Southwest	Arizona en Utah; 't Mêeste van New Mexico; Imperial County, Californië
San Francisco / Northern California	Nôord-Californië en Hawaii; Dêeln van Nevada
Atlanta / Southeast	Mississippi en South Carolina; 't Mêeste van Alabama en Georgia; De tilleviesjemarkt van Asheville, Nôord-Carolina
Suncoast	Florida; Dêeln van Alabama, Louisiana, en Georgia
Minnesota / Upper Midwest	Minnesota, North Dakota, en South Dakota; Dêeln van Nebraska en Wisconsin

Internationaal (International)

Hoofdartikel: International Emmy Award

De International Emmy Awards belôont topkwaliteit in tv-programma's die in eerste instansie buutn de Verênigde Stoatn wordn geproduceerd. Ze wordn ol sedert 1973 joarliks uutgereikt deur de IATAS. De prysuytreikienge goat mêestal in november deure in New York City.

In algemêene zin kan elke nie-Amerikoansche organisoatie of persôon (lik e netwerk, e lokoal of regionaal tilleviesjestation, producer, regisseur of schryver) een programma indienen, oungeacht of ze wel of hêen lid zyn van d' IATAS. Voe programma's die een coproductie zyn tusschn Amerikoansche en buutnlandsche productiebedryvn, kunn z'in anmerkieng kommn at et under êeste uutzendinge buutn de V.S. aahden, ôf o d' uutzenddatums binnen a poar dahen va mekoar lahen. Een ipnoame die meedoet in de internationale competitie kan nie ip dezelsten tyd wordn in'ezonden in één van de binn'nlandsche pryzen.

Studentn (Student)

De College Television Awards wordn toegekend deur de ATAS om d' uutzounderlike werkn van unief/hogeschoolstudenten t'eeren. Studenten uut 't hêle land kunn under producties indienen en d' eere krygen in categorieën liek Komedie, Documentaire, Drama, Muziek, Nieuws en Series. De inzendietiengn wordn êest beôordeeld deur ATAS-leedn die gëspecialiseerd zyn in 't desbetreffende domein. Doarna wordn de winnoars verkoozn deur de "Blue Ribbon Panels". Elk ingediend werk moe een formulier bevatten da is oundertekend deur 'n fakulteitsadviseur om the verifieern da 't geproduceerd wos vo e schôolgroep, -project of -klasse.

Up een gelykoardige maniere wordn de National Student Production Awards gepresenteerd deur de NATAS, ter êre van prestaties deur middelboare scholieren. Middelboare scholieren uut 't hele land kunn producties indienen in de hooop d' ip erkeinhieng in d' nieuws-, vakmanschap- en programmacategorieën.

Bestuurders en beheerders (Governors and trustees)

De Governors Award is de allerôogste prys uutgereikt deur de ATAS. Die viert de prestoaties van e persôon, bedryf of organisoatie woavan d'n impact van under werkn uutblienkt vanwehe d' oumiddelikke en hùdige belangrykheid d'rvan.

De Trustees Award is de ôogste prys gepresenteerd deur de NATAS, ter vierienge van de biëzoundre of joarenlange prestoaties van e persôon.

Humanitair en openboare dienstverlênienge

De Bob Hope Humanitarian Award wudt uutgereikt deur de Raad van Bestuur van de ATAS an e figeure in de industrie wies dat zyn humanitair werk een blyvenden indruk makt up de moatschappye.

De Public Service Award (Openboare Dienstverlenienge) is vo tv-spotjes round 't openboar belang (public service announcements) en de programmatie the beloonen die bydraagt an 't "algemêen welzyn".

Kritiek

Sommigte vôorstanders van gendergelykheid en non-binaire menschn hen de schêdienge van mannelikke en vrouwelikke acteercategorieën in d' Emmys, Academy Awards en Tony Awards zwoar bekritiseerd. Oewil da sommigte commentatoorn vrezen da d' ofschaffienge in e geslachtsoenafhankelikke categorie zou leidn totdat d' mann'n domineren in de resultaatn, zyn doartegen andere categorieën wel mêer en mêer open e'makd. De Grammy Awards wierdn byvôorbeeld genderneutroal in 2012, en de Daytime Emmy Awards introduceerden een ênigste Oustanding Younger Performer in a Drama Series categorie in 2019 ter vervangienge van udder tweê h'slachtsgebondne categorieën vo jonge acteurs en actrices.

Zie ôok

Emmy-gerelateerd

• Lyste van Daytime Emmy Award winnoars
• Lyste van Primetime Emmy Award winnoars
• Lyste van International Emmy Award winnoars

Andere gelykoardige pryzn

• Lyste van Amerikoansche tilleviesjepryzn
• British Academy Television Awards (Verênigd Keunienkryk)
• National Television Awards (Verênigd Keunienkryk)
• Screen Actors Guild Award
• Streamy Awards
• Directors Guild of America Award
• Producers Guild of America Award
• Writers Guild of America Award
• TCA Awards
• Canadian Screen Awards – film- en tv-pryzn in Canada
• Logie Awards – tv-pryzn in Australië
• CableACE Award – g'annuleerde prys voor exclusieve koabel-programma's
• ITA Awards (Indië)

Externe koppeliengn

• Academy of Television Arts & Sciences (ATAS) Officiële Emmy website
• National Academy of Television Arts and Sciences (NATAS) Officiële Emmy website
• International Academy of Television Arts and Sciences Officiële Emmy website
• De Emmy Awards ip EmmyTVLegends

Ofbeeldiengn die ier by passn ku je vien in de categorie Emmy Awards van Wikimedia Commons.