Naar inhoud springen

Familie

Van Wikipedia
Familie

Logo sinds november 2014
Genre Soapserie
Speelduur 25-35 menuutn
(geweune ofleveriengn)
50-90 menuutn
(sizoensfinoales & specials)
Bedenker Herman Verbaet
Producent Zodiak Belgium
Land België
Toale Nederlands (Vlams)
Zender VTM
Êeste uutziendienge 30 december 1991
Antal ofleveriengn 7695 (teegn 27 juni 2025)
Antal sizoenn 34
Website vtm.be/familie
IMDb 0162076

Familie is e Vlamse televiezjeserie van Studio-A die ol sinds 30 december 1991 wudt uutgezoundn ip VTM. Doadmeê is Familie de langst droaiende Belgische soapserie.[1] Mè uutzounderienge van de periode van 't begun van juli toet 't ende van ogustus is Familie 't hêle joar deure te zien van moandag toet en met vrydag.

De verhaallyn'n speeln nunder surtout of in en round de stad Mechelen, woa da de familie Van den Bossche ol joar en dag nunder familiebedryf runt. D'n soap eit een uutgebreide cast, woavan da Jef De Smedt (Jan Van den Bossche) en Annie Geeraerts (Anna Dierckx) d'r ol van in 't begun bykans ounofgebrookn dêel van uutmoakn.

De reekse is ol e poar kêers groundig vernieuwd g'weest met e facelift. Dikkels wierdn d'r ton ôok jounge acteurs an de reekse toegevoegd, zounder d'n boasis echt te roakn. Ip 26 april 2022 wierd de 7000ste ofleverienge uutgezoundn.

Inoud

[bewerk'n | brontekst bewerken]

Wuk datter vôorofging

[bewerk'n | brontekst bewerken]

Pierre Van den Bossche en Anna Dierckx zyn d' ouders van drie kienders. Nunder oudsten zeune Guido is nen yverigen student die vastebeslootn is om 't ôois te moakn in de zoakenweireld. Zyn joungere broere Jan en zuster Rita ein minder meugelikheedn en voeln nunder soms e bitje achteruutgestookn, moa da nimt nief weug da ze stief preus zyn ip nunder oudere broere.

Oen nunder kienders stillekesan e gezinne beginn'n te stichten, krygn Pierre en Anna twêe kêers choqueernd nieuws: hy is oungeneeslik ziek en zy is obnieuw in verwachtienge. Nog vôorn da nunder dochter Marleen geboorn wudt, sterft Pierre. Da's e zwoare klop vo Anna, moa ze beslist van eur eign kloek t' oudn en in te stoan vo d' ipvoedienge van eur dochter.

Start van de reekse

[bewerk'n | brontekst bewerken]

By d'n start van de reekse is Marleen ol e vulwassn vrouwe gewordn, die an de modeacademie studeert. Anna treurt nog elken dag om 't verlies van eur vint Pierre, moa nu da ze bykans 65 joar wudt, wilt ze eur eign erpakkn en d'r t'ope mè de familie e fêeste van moakn. Z' is ôok stief preus ip eur oudsten zeune Guido, die intusschn zyn eigen elektronicabedryf VDB Electronics uut de ground eit gestampt. J' is getrouwd mè de nogol excentrieke Marie-Rose De Putter en eit nu twêe joungvulwassn kienders: Peter en Veronique.

Jan is getrouwd mè Monique Stevens en eit ôok twêe kienders: Bart en Mieke. Je kykt nog olsan enorm ip noa zyn oudere broere en wudt, achter zyn ountslag by e verzekeriengsmaatschappy, deur Guido angenoomn lik personeelsdirecteur in 't familiebedryf. Rita eit eur in d'n lôop van de joarn e bitje ountwikkeld lik 't zörgenkiendje van de familie. Z' is gescheid van eur êesten vint achter d'n dôod van nunder zeuntje Paul. Uut e one-night-stand eit ze e twidde zeuntje, Pierrot. Nu blykt Pierrot ôok oungeneeslik ziek te zyn. Doaboovn up kunn'n Rita en Marie-Rose mekoar absoluut nief luchten of zien, wuk da dikkels leidt toet ruuzjes binn'n de familie.

Vodder ountwikkelienge

[bewerk'n | brontekst bewerken]

Den tyd bluuft nief stille stoan by de familie Van den Bossche. Marleen krygt t' ôorn da z' ounvruchtboar is, moa beslist vo t'ope mè eur vint Ben Van der Venne e kiendje t' adopteern. Oen de familie de komste van de klêne Lovely viert, endigt de fêeste subiet as Marleen vôorn de deure wudt aangereden en sterft.

Achter d'n dôod van eur zeuntje Pierrot sukkelt Rita in e drankversloafienge. Dirk lat eur in de stêke, moa intusschn is ze wel obnieuw in verwachtienge van em. Eur stoppen sloan deure en de vete mè Marie-Rose bereikt een ôogtepunt oen Rita probeert vo Marie-Rose en Guido te vermôordn. Rita belandt e poosje in d'n bak woa da eur zeune, die ze obnieuw Pierrot noemt, geboorn wudt.

Veronique goat goan studeern in 't buutnland en ôok Peter zegt 't leevn in België vaarwel. Je grakt verzeild in e mysterieuze sekte. Oen zyn moatn em probeern were t' oalen, viendn ze Peter en zyn lief Willeke t'ope met d' andere sekteleedn dôod. Round diezelfsten tyd goan Guido en Marie-Rose uut mekoar en vlucht zy mè eur minnoare Hugo noar 't buutnland. Nunder helikopter stort nere en ôok Marie-Rose wudt dôodverkloard.

Achter zyn zovielste scheve schoat wudt Jan deur Monique buutngesmeten. Jan trouwt mè Nele Van Winckel en krêegt nog twêe kienders: Maarten en Leen. Monique begunt e reloatie mè Didier De Kunst, de boas van FAIC, de grôotste concurrent van VDB Electronics. In d'n lôop van de joarn verandert Didier, zounder da Monique et wit, in e psychopaat die verschillige pogiengn ounderneemt oem Guido te vermôordn. Achter êen van zukke ansoagen belandt Guido in e rolstoel. Uutendelik wudt Didier g'arresteerd en sterft 'n binst e vluchtpogienge.

Peter blykt nog te leevn en sloagt d'rin om uut de klauwn van de sekte te vluchtn. Guido is in de wolken en elpt zyn zeune om van zyn drugsversloafienge (die j' in de sekte a g'kreegn) of te grakkn. Doarnoa gift 'n em e belangryke positie in 't familiebedryf. Sekteleider Salomon wilt wraak pakkn en gift d'n ipdracht an zyn handlangers oem Guido te vermôordn. Wa da Didier De Kunst in al die joaren nôoit wos gelukt, gebeurt nu wèl: Guido wudt vermôord binst e vakanse ip Malta.

Ôok de joaren d'rachter speeln d'r under e masse drama's af binn'n de familie. Achter eur scheidienge van d'n Itoaliaan Giancarlo Parducci, kêert Veronique verbitterd were noa België. Ôok Bart en Mieke kommn achter e langen tyd were. Achter de breuke mè Brenda Vermeir trok Bart noa de Verênigde Stoatn, woa dat 'n e reloatie begost mè Christel Feremans, moa nadat 'n in e vliegtuugcrash wos beland, kêerde j' were. Mieke moe teegn eur gouste eur weirk in e Brazilioans weeshuus ipgeevn oen ze 't slachtoffer wudt van e tropische ziekte. Eur moedre Monique en eur nieuwn moat, dokteur Guy Maeterlinck, beslissn van under persôonlik over eur t' ontfermn. Deure van e moment van ounopplettendheid grakt Monique ôok besmet en sterft ze. Mieke sloagt d'rin om wèl te geneezn, moa voelt eur enorm schuldig.

Jan is intusschn an zyn derde uwelik toe, deez'n kêer mè Linda Desmedt. Zy grakt in verwachtienge van nen drielienk, moa moar êen van de drie kienders goat et overleevn. Ze beslissn van em Guido te noemn, lik eêrbetôon an d'n overleedn broere van Jan. Anna viendt da e stief schôon gebaar, moa krygt intusschn e zovielste shock te verwerkn, oen blykt da Pierre binst zyn legerdienst in Duutsland e buutnechtelik kiend eit verwekt. Eur ezo geboorn kleinzeune Bert Van den Bossche wudt deur de familie noa België g'oald en goat loater an d'n slag by VDB Electronics, woa da Peter intusschn de boas is. Moa de grôotste verrassienge is den trugkêer van Marie-Rose, die dudelik eur helikoptercrash aad overleefd, moa deure van geheugenverlies van eur familie wos vervrêemd e-rakt.

Peter krygt 't eird te verduurn oen Xavier Latour, nen oud-werknemer van 't bedryf, em 't leevn zeur wilt moakn. Zjuust lyk Didier De Kunst, is Xavier Latour uut ip wraak en goat d'r niks of niemand em in d'n weug stoan. Binst êen van zyn plannetjes viendt Latour een ipvallende andlanger in Bert, die zyn eign deur de joaren eêne eit ountwikkeld toet e lêepn zoakeman en in 't stiekem achter de positie van Peter zit. Deur zyn veranderde persoonlykheid wudt Bert olsan moa minder geliefd binn'n de familie en wudt 'n openlik verstootn. Achter d'n dôod van Latour groeit Bert bitje per bitje uut toet de nieuwe vyand van de familie, toet dat 'n achter e brandstichtienge en môord by VBD Electronics uutendelik d'n bak in vliegt. Twêe joar loater makt Bert e plan oem uut de gevangenisse te vluchtn, vo revanche te pakkn ip Peter. Achter zyn ontsnapping wudt 'n weliswaar subiet were gepakt en vlygt 'n obnieuw d'n bak in.

Jan blykt as 16-joarige e zeune t' ein verwekt mè zyn jeugdliefde Isabelle. Zyn zeune Willem is in dien tyd geadopteerd deur een aander gezin. Zyn kleinzeune d'ruut, Thomas, duukt subiet ip en wilt zyn echte familie lêern kenn'n. Oen Thomas zwoar ziek wudt, blykt datter nog e twidde kleinzeune is: Simon. J' is d'n ênigsten die Thomas kan reddn deur e niere af te stoan, moa d' ulpe komt te loate en Thomas sterft. De drama's bluuvn ôok dièn kêer nief uut. Bart veroungelukt binst e verkêersaccident. Hannah en Jelle stoan d'r achter d'n dôod van nunder voader nu hêlegans allêne vôorn, angezien da nunder moedre Brenda e poar joar idder ôok ol g'storven wos. Gelukkig kunn'n ze reekn'n ip d' ulpe van Trudy, woamee da Bart sinds kort e reloatie ad. Loater blykt wèl da Bart zyn eign dôod a g'feynst oem te kunn'n vluchtn van een Itoaliaanse maffiafamilie woamee dat 'n in de probleemn wos e-kommn.

Het komt intusschn, achter de zovielste leugne van June Van Damme, toet e breuke tusschn eur en Peter. Ierdeure is ze vanaf ton belust ip wraak en niemand goat eur d'rin teegnhoudn. Ze start t'ope mè Veronqiue e modebedryf ip, da uutendelik rap fuseert mè VDB Fashion. Doarnoa ounderneemt ze med d' ulpe van nen handlanger e môordpogienge ip Peter, moa die mislukt. Oen ze uutendelik Simon kiezn lik CEO in plekke van Peter of Veronique, is June lêep genoug vo e contract ip te moakn woarin stoat da zy de plekke-vervangende CEO wudt as Simon d'r nief is. Ze vergiftigt em, gift d'n ipdracht vo Veronique te loatn verkrachtn, en smyt Hannah en Rudi buten, da olles oem 't bedryf na de verdoemenisse te elpen. In e latste pogienge oem eur vel te redden, rydt ze Mieke omverre, die in e diepe coma belandt. Ze steekt de schuld in de schoenn van Simon. Eur doaden kommn an 't lucht en ip n'n avend wudt ze in koelen broede dôodgeschootn deur nen ounbekenden dader. Uutendelik blykt da Cédric, de zeune van Veronique, June a vermôord, as revanche omdan ze d'n ipdracht a g'geeven vo Veronique te verkrachtn.

Andere verhaallyn'n

[bewerk'n | brontekst bewerken]

De reekse focust eur ol sinds d'n start dikkels ip de beslommerienge binn'n 't familiebedryf van de Van den Bossches. In d'n beginne wos da een elektronicabedryf, moa intusschn leidt de familie e holding woarin datter e confectieketen en e poar brôodjeszoakn zittn. In d'n lôop van de joarn zyn ôok de beroepsactiviteitn van andre personoages mêer en mêer in beeld ekommn. Patrick eit e vilomoakerie, Jan werkt in 't café van Mathias en Peter.

Lyk da wel mêer 't geval is by soaps, kenmerkt de reekse eur deur een enorme hoop uwelikken, sterfgevalln, en ingewikkelde reloaties en familiebandn. Een andre ipmerkelik en populair verhoal is 't êeuwige drankprobleem van Rita.

Dikkels drukt de joungere generoatie eur stempel ip de gebeurtenissn in de reekse. De kienders die in de beginjoarn van de reekse wierdn geboorn zyn intusschn uutgegroeid toet vulwassenen met elk nunder eign visie up de toekomst. Vele van under trekkn ip avontuur na 't buutnland, vo d'r e poar joar loater vul nieuwe ervoariengn were te kêern na nunder vertrouwde omgevienge.

Rolverdienge

[bewerk'n | brontekst bewerken]

Udige acteurs

[bewerk'n | brontekst bewerken]
Ôofdpersonoages (vôgns debuut personoage)
Personoage Debuut personoage Acteur Debuut acteur
Anna Dierckx1991Annie Geeraerts1991 (ofleverienge 1)
Jan Van den Bossche1991Jef De Smedt1991 (ofleverienge 1)
Mieke Van den Bossche1991Caroline Maes2002 (ofleverienge 2324)
Veronique Van den Bossche1991Sandrine André2012 (ofleverienge 4921)
Albert Thielens1992Ray Verhaeghe1992 (ofleverienge 112)
Hannah Van den Bossche1998Margot Hallemans2006 (ofleverienge 3378)
Cédric Moelaert2005Yanni Bourguignon2017 (ofleverienge 6059)
Louise Van den Bossche2005Tine Roggeman2025 (ofleverienge 7698)
Jelle Van den Bossche2006Maarten Cop2021 (ofleverienge 6827)
Mathias Moelaert2008Peter Bulckaen2008 (ofleverienge 3831)
Niko Schuurmans2009Jo Hens2009 (ofleverienge 4004)
Benny Coppens2012Roel Vanderstukken2012 (ofleverienge 4932)
Stefanie Coppens2012Jasmijn Van Hoof2012 (ofleverienge 4943)
Rudi Verbiest2013Werner De Smedt2013 (ofleverienge 5004)
Lars De Wulf2016Kürt Rogiers2016 (ofleverienge 5774)
Alfons Coppens2016Jaak Van Assche2016 (ofleverienge 5799)
Brigitte De Wulf2017Anke Helsen2024 (ofleverienge 7569)
Emiel Bauwens2021Jelle Palmaerts2021 (ofleverienge 6835)
Samira Jibrell2021Belinda Voorspoels2021 (ofleverienge 6902)
Jamila El Moussaoui2022Jools Jatta Janssens2022 (ofleverienge 6962)
Ilja El Moussaoui2022Senne Meynendonckx2022 (ofleverienge 6965)
Brahim Jibrell2022Amine Boujouh2022 (ofleverienge 6965)
Marcel Lodewijks2024Hugo Sigal2024 (ofleverienge 7537)
Rube Verdonck2025Bjarne Devolder2025 (ofleverienge 7583)
Kiki Mariën2025Nathalie Meskens2025 (ofleverienge 7685)
Josefien Lodewijks2025Anouck Luyten2025 (ofleverienge 7706)
Nevenpersonoages (vôgns debuut personoage)
Personoage Debuut personoage Acteur Debuut acteur
Rita Van den Bossche1991Jacky Lafon1991 (ofleverienge 1)
Simon Feyaerts2015Braam Verreth2015 (ofleverienge 5515)
Gastpersonoages (vôgns debuut personoage)
Personoage Debuut personoage Acteur Debuut acteur
Finn Vennens2018Sam Van den Bosch2022 (ofleverienge 6983)
Victor Van den Bossche2021Verschillige kinders2021 (ofleverienge 6918)
Bobbie De Wulf2025Verschillige kinders2025 (ofleverienge 7695)
Elise Roothooft2025Melia Loi2025 (ofleverienge 7765)
Ewout2026Samuel Van Greuningen2026 (ofleverienge 7798)

Ôorsprounkelikke acteurs

[bewerk'n | brontekst bewerken]
Acteur Personoage Ipmerkiengn
Karel Deruwe† Guido Van den BosscheVerdweenn in 1999 (ofleverienge 1767) uut de reekse
Martine Jonckheere† Marie-Rose De PutterVerdweenn in 2022 (ofleverienge 6974) uut de reekse
Erik Goossens† Peter Van den BosscheVerdweenn in 1995 (ofleverienge 833) en wierd nadien vervangn deur nen andren acteur. Personoage stierf in 2022 (ofleverienge 6975).
Anne SomersVeronique Van den BosscheVerdweenn in 2012 (ofleverienge 4920) en wierd nadien vervangn deur een andre actrice
Jef De SmedtJan Van den Bossche
Riet Van Gool† Monique StevensVerdweenn in 2002 (ofleverienge 2416) uut de reekse
Lotte MariënMieke Van den BosscheVerdweenn in 2000 en wierd nadien vervangn deur een andre actrice
Christophe Du JardinBart Van den BosscheVerdweenn in 1997 (ofleverienge 1083) en wierd nadien vervangn deur andre acteurs
Jacky LafonRita Van den BosscheVerdweenn in 2015 (ofleverienge 5457) uut de reekse
Steve Mees† Pierrot Van den BosscheVerdweenn in 1992 (ofleverienge 110) uut de reekse
Annie GeeraertsAnna Dierckx
† Guido Horckmans† Walter DierckxVerdweenn in 2006 (ofleverienge 3374) uut de reekse
Hilde De Roeck† Marleen Van den BosscheVerdweenn in 1993 (ofleverienge 290) uut de reekse
† Bob Stijnen† François Van den BosscheVerdweenn in 1996 (ofleverienge 1058) uut de reekse
† Nini Van der Auwera† Simonne VercauterenVerdweenn in 1994 (ofleverienge 544) uut de reekse

Recasts

[bewerk'n | brontekst bewerken]

Deur de joarn heen zyn d'r e poar personoages deur verschillige acteurs vertolkt, wuk da dikkers vo kritiek van de kykers zörgt. De bekendste wissels zyn Peter (Erik Goossens → Gunther Levi), Mieke (Lotte Mariën → Caroline Maes) en Bart (Christophe Du Jardin → Wim Van de Velde → Chris Van Tongelen).

Mêestol gebeurt e recast ollêne oen e personoage lange tyd uut beeld is gewist of oen d'r e tijdsproung wudt gemakt. Voorbeeldn d'ruut zyn Maarten (Gianni Verschueren → Michael Vroemans), Leen (Saskia Raë → Ruth Bastiaensen → Cathérine Kools) en Pierrot (Kristof Van De Vondel → Guillaume Devos).

Atypisch is 't personoage Brenda Vermeir, die van d'n êenn dag ip d'n andern veranderde van Vicky Versavel noa Chadia Cambie omdan Versavel zwoar ziek wos ewordn. E joar loater kwam ze were gezond verkloard en nam ze d'n rolle were over. In 2017 krêeg Benny Coppens ôok subiet e nieuw wezen oen Roel Vanderstukken een herte-operoatie moeste oundergoan en Govert Deploige em tydelik vervangde. Ende 2024 nam Janine Bischops e pauze en nam Anke Helsen d'r rolle van Brigitte over, wuk da loater e definitieve wissel bleek te zyn.

E specioale recast wos die van Bert Van den Bossche in 2024. In 't verhoal aad 'n plastische chirurgie loatn doen en azo e nieuw wezen gekreegn. Jan Sobrie pakt d'n rolle over van Steven De Lelie ounder d'n noame Joris Nuyens.

Cameo's

[bewerk'n | brontekst bewerken]

Vele bekende Vlamingen ein ol e gastrolle of cameo g'speeld in Familie, mêestol vo e fêestelikke ofleverienge. Soms speeln ze nunder eign, moa soms ôok een andere rolle. Lik Kelly Pfaff en weerman Eddy De Mey lik hotelmedewerkers, of judoka's Ingrid Berghmans en Harry Van Barneveld lik leedn van e dievenbende.

Een overzicht van de cameo's:

Locoaties

[bewerk'n | brontekst bewerken]

't Verhoal speelt nunder surtout of in en round de stad Mecheln, woar datter in de reekse ôok dikkers dudelik noa verweezn wudt. Bykans olle buutnopnoames gebeurn doa in d'n omtrek. Soms wykn ze uut noa andre gemêentn om praktische reedns.

De binn'nopnoames wierdn mêer of 25 joar lank g'pakt by Studio-A in Boortmeerbeek. In 2018 zyn olle decors verhuusd noa de AED Studios in Lint. Doa zyn d'r twêe studio's van t'ope 2400 m² inebruuk vo de soap.

Ier is een overzicht van de belangrykste plekkn:

Weuniengn

[bewerk'n | brontekst bewerken]
  • Appartemènt van Jan: Jan, Cédric en Jelle weunn ier, juste boovn 't café van Mathias.
  • Uus van Benny: Ier weunn Benny, Alfons, Samira, Brahim en Ilja.
  • Uus van Mathias en Vanessa: De weunplekke van Mathias, Vanessa, Victor en Kiki.
  • Brouwerieuze: Niko, Rudi en Jozefien weunn ier t'ope.
  • Loft van Lars: Geleegn in 'tzelste gebouw lik Wolff & Bos. Lars, Stefanie en Rube weunn ier.
  • Appartemènt van Hannah: Mieke en Veronique weunn ier. Linus komt doa dikkers logeern.
  • Studentnuus: Louise, Jelle en Jamila weunn ier. Victor logeert ier ôok dikkers.

Bedryvn

[bewerk'n | brontekst bewerken]
  • Wolff & Bos (vroeger VDB Fashion): 't Ôofdkantoor mè 't bureau van Lars en een ountnoaldesk. Cédric, Louise en Veronique werkn ier. In 't mode-atelier werkt Rudi lik ountwerper, t'ope mè Samira. Brigitte, Veronique, Lars, Cédric en Raven zyn d' andêelhouders.
  • Foodbar: E brôodjeszoake en conceptstore van Vanessa. Jamila werkt ier lik jobstudente.
  • Jan & Alleman: 't Stamcafé van Mathias woa da de familie Van den Bossche dikkers topekomt. Jan en Kiki werkn ier an d'n toog.
  • CoBrew: 't Ôofdkantoor van de brouwerie woa da Mathias, Vanessa en Mieke werkn. Niko is d'n brouwer.

Ofleveriengn

[bewerk'n | brontekst bewerken]

Overzicht

[bewerk'n | brontekst bewerken]

Ierounder zie je de sizoenn en d' ofleveriengn.

SizoenUutzenddoataOfleveriengnAntal
130 dec 1991 – 29 mei 19921 – 110110
231 ogustus 1992 – 8 mei 1993111 – 290180
330 ogustus 1993 – 28 mei 1994291 – 507217
45 september 1994 – 27 mei 1995508 – 735228
528 ogustus 1995 – 1 juni 1996736 – 975240
62 september 1996 – 30 mei 1997976 – 1208233
71 september 1997 – 30 mei 19981209 – 1442234
831 ogustus 1998 – 29 mei 19991443 – 1676234
930 ogustus 1999 – 6 juni 20001677 – 1918242
1028 ogustus 2000 – 29 juni 20011919 – 2182264
113 september 2001 – 28 juni 20022183 – 2422240
122 september 2002 – 27 juni 20032423 – 2637215
131 september 2003 – 27 juni 20042638 – 2853216
1430 ogustus 2004 – 26 juni 20052854 – 3112259
1529 ogustus 2005 – 30 juni 20063113 – 3375263
164 september 2006 – 29 juni 20073376 – 3632257
173 september 2007 – 27 juni 20083633 – 3889257
181 september 2008 – 26 juni 20093890 – 4146257
1931 ogustus 2009 – 25 juni 20104147 – 4403257
2030 ogustus 2010 – 24 juni 20114404 – 4660257
2122 ogustus 2011 – 29 juni 20124661 – 4885225
2227 ogustus 2012 – 28 juni 20134886 – 5105220
2326 ogustus 2013 – 27 juni 20145106 – 5325220
2425 ogustus 2014 – 26 juni 20155326 – 5545220
2524 ogustus 2015 – 29 juni 20165546 – 5768223
2629 ogustus 2016 – 30 juni 20175769 – 5988220
2728 ogustus 2017 – 29 juni 20185989 – 6208220
2827 ogustus 2018 – 28 juni 20196209 – 6428220
2926 ogustus 2019 – 24 april 20206429 – 6603175
3024 augustus 2020 – 25 juni 20216604 – 6823220
3123 augustus 2021 – 24 juni 20226824 – 7043220
3229 augustus 2022 – 23 juni 20237044 – 7258215
3328 augustus 2023 – 28 juni 20247259 – 7477219
3426 augustus 2024 – 27 juni 20257478 – 7697220
3525 augustus 2025 – juni 20267698 – ...220

D' êeste sizoenn wierdn ounderbrookn deur e korte winterstop. In sizoen 2 wierd Familie vo d' êeste kêer ôok ip zoaterdag uutgezoundn. Sizoen 29 stopte ol ip 24 april 2020 deure van de weireldwyde coronacrisis. Da sizoen eit achter 't êeste 't minst ofleveriengn.

Specioale ofleveriengn

[bewerk'n | brontekst bewerken]
  • 500ste ofleverienge: (20 mei 1994) Vierd mè e volksfêeste in de Nekkerhal in Mecheln mè 1000 fans. Bieke Ilegems (Babette) wos de gastvrouwe.
  • 1000ste ofleverienge: (30 september 1996) E dubbelofleverienge mè een opendeurdag by VDB Systems. D'r wos ôok e grote wedstryd woaby da 500 kykers mee noa Malta mochtn.
  • 2000ste ofleverienge: Speelde nunder of in 't Hilton in Antwerpn. Guido Van den Bossche kreeg doar postuum de World Electronics Award 2000.
  • 3000ste ofleverienge: Droaide round de geboortn van Louise (dochter van Trudy), d'n baby van Els (ip 't wc!) en Cédric (zeuntje van Veronique).
  • 4000ste ofleverienge: Genaamd 'De Reünie'. De familie reist noa de Fransche Alpn vo de verjoardag van Anna.
  • 5000ste ofleverienge: Gienk surtout over 't uwelik van Marie-Rose en Mathias.
  • 7000ste ofleverienge: Wierd nie echt gevierd, moa 't getal "7000" kwam wel e poar kêer vôorn in de ofleverienge.

By de jubileums wos d'r ôok altyd iet speciaals: vo 10 joar Familie wos d'r e dubbelofleverienge vo d'n 80ste verjoardag van Anna. Vo 25 joar Familie wierd d' êeste midseizoensfinoale uutegezoundn, iet wa ze nu nog elk joar doen. Vo d'n 30ste verjoardag trouwdn Veronique en Lars in e dubbelofleverienge.

Sizoensfinoales

[bewerk'n | brontekst bewerken]

Iedre sizoen wudt ofeslootn mè een extra dramoatische finoale, die mêestol zörgt vo êen of mêerdere cliffhangers vôor de zomerstop. E sizoensfinoale deurt mêestol dubbel zo lank lik e geweune ofleverienge. De ountknopieng wudt uutgezoundn by d'n start van 't volgende sizoen.

Sizoen 1

E fêestje by Peter lopt styf uut d'and. Birgit beschuldigt Peter van verkrachtienge. Peter wudt g'arresteerd en moe em vôor d'n rechter verantwôordn. Veronique, Guido en Marie-Rose krygn in Luxemburg e zwoar auto-accident.

Sizoen 2

De hêle familie is tegoare om de komste van Lovely, 't adoptiekindje van Ben en Marleen, te viern. Oen Marleen nog rap om e bôodschap goat, wudt ze ip stroate aangereden en ze sterft.

Sizoen 3

Peter en Guido ryen mè nunder otto lanks 't kanoal, oen ze subiet deur ne sluupschutter beschootn wordn en in 't woater belandn. Peter komt klem te zittn en dreigt te verzuupn.

Sizoen 4

Peter is verzeild g'raakt in e sekte. Oen 't bericht komt da de leedn collectieve zelfmôord ein gepleegd, reist Guido noa Spanje in d'ope van em weere te viendn.

Sizoen 5

Rita is ol weere e tydje vry, moa 't stoat eur nie an da eur zeuntje Pierrot wierd toegeweezn an Herman en Ingrid. Tegoare mè eur vriandinne Micheline ountvoert ze em. Moa ton krygn ze ounuutverwacht poliesjecontrole.

Sizoen 6

Guido en Els viern nunder trouwfêeste in e chic hotel, woa d'r ip da moment ôok e politieke delegoasje zit. E terroristische groeperienge gyselt under en platst e tydbom. Binst da de hêle familie nog upgeslootn zit, ountploft 't hêle gebouw.

Sizoen 7

Guido en Els viern nunder uutgestelde uweliksreize ip e jacht in 't zuudn. Terwyl da Els effkes in zêe duukt, klimt Didier subiet an bôord van 't schip. D'r volt e schot.

Sizoen 8

De schole van Maarten, Leen, Pierrot en Enrique is ip zeeklassn in Ôostduunkerke, oen zyderzelve, nunder klasgenôotjes en de kookouders slachtoffer wordn van e zwoare voedselvergiftigienge. D'r zyn ol verschillige dôon, moa 't is nief dudelik wien.

Sizoen 9

Peter, Veronique, Jan en Rita goan in ip e mysterieuze uutnôodigienge en goan noar een ofgeleegn kasteel. D'n zogenaamden gastère wilt under êen vo êen ofmoakn. D'r ountstoan gevechtn ip leevn en dôod.

Sizoen 10

Peter, Koen en Brenda reizn noar Amerika, woa da Bart achter e vliegtuugcrash in 't zyknhuus belandde. Ip d'n weug noa uus dreigt e wagen in vulle voart ip Bart in te ryen.

Sizoen 11

Jo en Els trouwn en vertrekkn direct ip uweliksreize. Subiet wordn ze 't slachtoffer van e brutale vliegtuugkaping. De kapers dreign 't koppel te vermôordn.

Sizoen 12

Trudy wudt ountvoerd deur Xavier Latour. Sarah en Thomas dappern vo tegoare mè eur te vluchtn. Latour lat Peter weetn dan ze an bôord zyn van e chartervluchte. Peter probeert mè nen helikopter te belettn da 't vliegtuug kan upstygign, moa ton lopt 't mis. Vôor zyn oge stort 't vliegtuugje mè Sarah, Thomas en Trudy nere.

Sizoen 13

Peter en Trudy ein de hêle familie uutgenôodigd vo nunder trouwfêeste ip Malta. Oen ze nunder miengeln in de lokoale folklore wudt Peter neregestookn. J' stuukt in mekoar.

Sizoen 14

De stoppn van Annemarie sloan deure. Ze probeert Guy te vermôordn. Nadat de familie binst e tuinfêeste in paniek probeert te vluchtn vo e wolkbreuke, blykt Veronique eurn zeune Cédric vermist te zyn.

Sizoen 15

De familie is gereisd noa Kroatië vo 't uwelik van Mario en Veronique. Veronique is hêlegans over eur toeren oen Mario achter e bitje ambras nie mêer komt updaagn.

Sizoen 16

Vermomd lik zoakeman Graham Boardman eit Xavier Latour 't familiebedryf noa de verdoemenisse g'olpen. De hêle familie dreigt meegezoogn te wordn in 't drama. Doaboovnup eit 'n Joe Bonduono vermôord.

Sizoen 17

Bart ountdekt da Brenda deur zyn minnares Nel is ountvoerd en wudt nu ôok upgeslootn, woarno Nel 't gebouw in brande stikt. Trudy biecht eur affaire mè Mario ip an Peter. Binst e weekend in d'Ardennn valt Veerle zwoar in e grotte en ze dreigt te verzuupn.

Sizoen 18

Xavier Latour eit Trudy en Louise loatn ountvoern. Handlangers Christel en Sébastien krygn spyt en willn under helpn vluchtn. Uutendelik volgt de confrontoatie mè Peter en 't ultieme gevecht ip leevn en dôod.

Sizoen 19

Marie-Rose bluuft eur verzettn teegn 't uwelik van Peter en June. Ip d'n grôotn dag dreigt ze d'rmee em nie mêer lik zeune te zien as 'n zyn joa-woord gift. Ip 't moment van de woarheid begunt Peter te twyfeln.

Sizoen 20

D'n ountleegn Bert wilt wraak en sluit 't kaderpersoneel van VDB Electronics up in 't kantoor, woarno dat 'n brand stikt. Terwyl da Marie-Rose, Veronique en Gerda nog probeern te vluchtn, bluuvn Bart, Peter en June achter in de vlammen.

Sizoen 21

Mieke wudt ountvoerd. Ip e teambuildingsweekend in d'Ardennn komt 't toet e confrontoatie tusschn de liefdesrivoaln Marie-Rose en Caroline. Binst e gevecht ip leevn en dôod volln ze tegoare in e ravyn.

Sizoen 22

Leen stoat ip 't punt vo te bevalln, moa 't buurtfêeste da Mathias g'organiseerd eit zörgt vo enorme verkêersmiserie. Mathias zelve krygt 't ip 't ende van d'n dag benauwd en zakt ip een ofgeleegn plekke in mekoar.

Sizoen 23

Elise is d'r van overtuugd da Delphine e vuul spelletje speelt, moa oen ze d'n confrontoatie angat lopt 't mis. In e schermutselienge valt Elise. Louise ziet olles gebeurn en moe lopt vo eur leevn vôorn da Delphine eur kan pakkn. Intusschn is de modeshow van Vérobello bezig, woa da de familie verschiet van de plotse komste van June. Binst de show duukt d'r ôok iemands ip die em uutgift vo Thomas Feyaerts.

Sizoen 24

June en Stan beraamn ol weekn e plan om Peter vo goed uut te schoakeln. Juste vôor dat 'n e prezentoasje goat geevn, probeern ze em in de val te lokkn. Cédric ligt in coma in 't zyknhuus. Veronique krygt doa nog e shock te verwerkn oen ze ountdekt da ze zwanger is. Marie-Rose en Mathias ein de zovielste ruuzje. J' zoekt trôost by Trudy, moa wudt binst de seks betrapt deur Marie-Rose. Ip een ounbekend strand wandelt Bart Van den Bossche vôorbey, oewêl dat iedreên peisde dat 'n dôod wos.

Sizoen 25

June speelt ol moandn e smerig spel om de Van den Bossches en nunder bedryf kapot te krygn. De familie probeert eur te ountmaskern moa krygt zwoare klappn te verwerkn. E poar van under beslissn vo 't rècht in eign andn te pakkn. D'r ountstoat e vuurgevecht by Fashion. Oen d'r iemands binn'nkomt, viendt 'n 't lyk van June, die vermôord is mè e schot. D'n doader is ounbekend.

Sizoen 26

Simon eit Stefanie ountvoerd en dreigt eur te vermôordn oen ze em up 't spôor kommn. Veronique trouwt mè Mathias, moa ze twyfelt omda ze ôok iet voelt vo Lars. Achter e passjonele nachte mè Lars lykt ze toch grêed vo mè Mathias te trouwn. Vôorn d'n trouw vroagt Lars eur om mè d'n nôorderzunne te verdwyne en tegoare e nieuw leevn te begunnn. Ze begunt weere te twyfeln: kiest ze vo Lars of vo Mathias?

Sizoen 27

Evy goat d'n ultiemen confrontoatie mè Stan an. Oen Maarten eur achternoagoat dreigt de situoasje uut d'and te lôopn. Emma lopt de meurn ip oen ze peist da ze Mila en Milou kan verliezn. Ze vlucht mè under, moa oen ze effkes nie uplet verdwynt Milou in e vyver. Binst 't zoekn komt ôok Emma nie mêer boovn. E zoate Veronique en Amélie moakn ruuzje achter een avendje uut. Oen Veronique e poar eurn loater ountwoakt, angt ze vul mè bloed mè e mes neffest eur. In de keukn viendt ze subiet d'n neregestookn Amélie.

Sizoen 28

Marie voelt eur in d'n oek gedreevn nu da Iris d'r in gesloagd is vo eur zeune Kasper te ountvoern. Oen ze t'ope mè Mathias d'n confrontoatie angat mè Lars en Veronique, ountstoat d'r e schermutselienge woaby da Marie in e ravyn noa beneen stort. Stefanie is te weetn g'raakt da eur nieuwn moat, Elias, d'n pyromaan is die d'n flikkn ol weekn bezig oudt. Ze gaat em achternoa, moa ze wudt neregesleegn en vastgeboundn. Je dreigt d'rmee vo eur en een ofgeleen loodse in brande te steekn. In Namibië lykt 't toet e geweldadige confrontoatie te kommn tusschn Guido en Emma.

Sizoen 29

't Is d'n verjoardag van Quinten, moa j' ziet gin reden vo 't te viern zounder Hannah. Alfons wilt bewyzn dat 'n e liedje hêlegans uut z'n ôofd kan ziengn mè d'ulpe van Benny, Vanessa, Patrick en Jenny. Cédric beslist uutendelik of 'n mè Lars en z'n moedre mee goat noa Singapore. De nieuwe escort Zoë eit e blauw oge achter een ofsproake mè inspecteur De Pelsmaeker. Guido en Stefanie ein e moeilik gesprek. Quinten grypt weere noa de flaske en drienkt e glas whiskey in êne kêer uut. Amelie slupt 's nachts de loft van Jonas binn'n en ziet da Stefanie doa zit.

Sizoen 30

De Fjutr-awards wordn uutgereikt en Quinten rydt z'n marathon. Stefanie is nog olsan vermist. Jonas peist da Simon mêer wit en eit em upgeslootn in e container. Iris en Peter ein een ofsproake in 't zyknhuus, moa Iris beslist vo de baby toch te oudn. Brigitte en Lars moakn ruuzje mè Raven, die 't beu is en vertrekt. J' wudt ipstroate upgeschrikt deur een oude bekende die vroagt woa da 't geld is. Lars is d'r zeker van da Wolff & Bos goat winnn, moa oen CoBrew wint, vertrekt 'n direct. Quinten rydt z'n marathon uut mè d'ulpe van Hannah en Gaston. Ze kussn, moa ton zakt Quinten in mekoar. Stefanie viendt Simon via de gsm van Jonas, moa ton komt Jonas ôok ipdaagn. Lars wudt meegenoomn deur ounbekendn...

Sizoen 31

Zjef moe noar e radiostudio vo reclame te moakn lik d'n appelman. Benny makt em grêed vo zyn uweliksanvroage an Samira, moa ton ôort 'n da Brahim in 't zyknhuus ligt mè e gebrookn schoere. Hannah wacht ip de thuuskoms van Quinten, moa j' komt nie ipdaagn: j' is g'arresteerd in Singapore omdan ze drugs in zyn rolstoel ein evoundn. Niko begunt te boksn teegn Sam oen die ginnen tegenstander eit, moa j' krygt zwoare klappn en bluuft liggn. Lars komt d'rachter da d'n minnoare van Veronique eigentlik zyn oalfbroere Koen is. Achter e wilde achtervolgienge rydt Veronique mè eur otto 't kanoal in...

Sizoen 32

Mieke ountdekt da Niko d'n voader is van Sam eur oungeboorn kiend en ze smyt under olletwêe d'rute. Vanessa nam ountslag by CoBrew achter e zwoare blunder. Jamila eit e nieuwe mode-opdracht en kan nie afspreekn mè Jelle. Raven en Jill viern nunder radio-optreedn up café, moa Louise is razend omda Raven niks lat weetn. Cédric en Yoko elpn Jan en Katrien mè groafweirk, moa Katrien blykt d'n gevaarlikke Elena Rieser te zyn. Ze verdooft under olledrie. Mieke en Sam ein e geweldadige confrontoatie over 't kiend. Lars en Veronique wordn bedreigd deur Elena. Elena eit Lars en Cédric levend begraven in e kiste die vul mè woater lopt. Veronique moe lopt vo under te reddn, moa ze viendt êest Yoko. 't Wudt e race teegn d'n tyd...

Sizoen 33

De familie Van den Bossche kykt uut noa nunder reünie. Moa Bert Van den Bossche is weere en j' wilt de hêle familie ipbloazn. J'eit e nieuw wezen deur plastische chirurgie en noemt emzelve Joris Nuyens. J' begunt e reloatie mè Mieke die van niks wit. Louise blykt eignlik de dochter van Bert/Joris te zyn. Joris wilt Louise reddn en probeert eur weug te oudn van d'n fêeste. J' moeste ôok Leen vermôordn oen ze zyn echte identiteit ountdekte. Up d'n reünie begunt 'n e speech over zyn slichte ervoariengen mè de familie. Juste vôor dat 'n d'n boel wilt loatn ountploffn, duukt Louise toch ip. Joris stopt d'n bom en vroagt Mieke ten uwelik om loater zyn plan weere te probeern. In e flashforward noa 3 januoari 2025 zien we Mieke bebloed nerevalln in eur trouwklêed.

Midseizoensfinoales

[bewerk'n | brontekst bewerken]

In de kestvakanse wudt er sinds sizoen 26 elk joar e midseizoensfinoale uutegezoundn. Da's e dubbelofleverienge die styf spannend is, moa de reekse lopt de weke d'rachter g'weun deure.

Sizoen 26

De bomma wudt 90 joar ip 't landuus van Lars. Lars en Veronique ein een affaire en oen ze bykans betrapt wordn, vroagt Veronique Mathias ten uwelik woa da iedreên by stoat. Jan en Viv ein ôok een affaire en kunnunder nie in-oudn binst d'n catering. Simon probeert de bomma te vergiftign moa Niko oudt em teegn. Loater doet 'n 't toch. Bart, die iedreên peisde da dôod wos, duukt subiet ip. De bomma valt bewustelôos nere.

Sizoen 27

De kiste van Guido Van den Bossche is leeg. Guido bezoekt zyn broere Jan in 't zyknhuus. De bomma gelooft da Guido nog leeft, moa de reste peist da Jan hallucineert. Peter en Amélie ountdekk'n datter e blad uut 't autopsieverslag van Guido ountbriekt. Veronique wudt ofgeperst deur begrafenisondernemer De Gendt. J' peist da Veronique eur voader dôod wilde.

Sizoen 28

't Proces van Veronique goat vrie zere oen d'r nieuwe getugn kommn. Lars probeert d'ounschuld van Veronique te bewyzn mè d'ulpe van Hannah. Marie vlucht oen ze 't lyk van Evy viendn in e bus. Lars stormt de rechtbank binn'n en wyst Marie-Rose an lik d'n doader die Amélie eit neregestookn. Marie-Rose makt e bekentenisse binst dat ze blit.

Sizoen 29

Lars en Mathias vechtn vo de liefde van Veronique. Mathias speelt e vuul spel vo Lars zwart te moakn en wilt Niko z'n brouwerie upkoopn. Niko sukkelt in e depressie en krygt een accident. Mieke wilt afreken mè Mathias. Lars eit nog olsan 't woapen woamè Marie is neregeschootn en wilt e deal sluutn mè Mathias. Later die avend is Robyn getuge van e schot in 't kantoor van Lars.

Sizoen 30

Deure da George Benny en Viv bluuft lastigvallen, duukn ze ounder ip hotel. Oen Amelie vo de zovielste kêer 't café vuul achterlat, is vo Jonas d'n moate vul en belt 'n Mathias ip. By Wolff & Bos ist er uutendelik e besluut: Lars wudt weere CEO, Veronique wudt weere creatief directeur en Brigitte financiël directeur. Cédric en Raven krygn olletwêe 1% van d' andêeln. Cédric wilt niks mè Raven te moakn ein en ôok Mieke voelt eur nie goed by de herschikkienge. Hannah en Quinten ein uutendelik e klappertje over nunder toekomst. Da gesprek droait wel anders uut of dat Quinten g'ôopt aad: Hannah makt em dudelik da 't nôoit mêer iet goat wordn tusschn under. Ze bluuft Tony verdedign en is 't er nie mè êens dat 'n e psychopaat is. Doamee wilt Quinten nie da Hannah Gaston nog ziet toet ze hêlegans geneezn is. George viendt Viv uutendelik in 't hotel en wilt weere mè eur herbegunnn. Viv zegt teegn Benny dat ze van em oudt, moa j' makt eur dudelik da de timing nie goed is en dat 'n tyd nôodig eit. 't Gesprek tusschn Hannah en Quinten eit gevolgn: Hannah belt noa d'n bak woa da Tony vastzit en Quinten krygt weere de goeste noa de flaske te grypn. Binst de zovielste ruuzje tusschn Jonas en Amelie krygt Amelie hevige pyne en zakt ze in mekoar in e vul café...

Sizoen 31

De hêle familie is d'r by ip 't trouwfêest van Lars en Veronique. Ôok Leon De Bodt komt ounuutverwacht lanks. J' zegt teegn Lars dat 'n verdwynt en dan ze mekoar nôoit mêer goan zien. Cédric ziet De Bodt ôok, wuk da zörgt vo e gevecht mè Raven. Veronique kiest d'n kant van Raven, woarno Cédric 't fêest verlat. Loater ip d'n avend wudt ôok d'n 95ste verjoardag van de Bomma gevierd mè vrywerk. Iris, die van d'n dokteur ollêne moa noa d'n avendfêeste mochte goan, overtuugt Marie-Rose om mee te goan en 't weere goed te moakn mè eur dochter. Ounderweug krygt d' ôogzwangere Iris e flauwte in d'n otto en verliest ze de controle over 't stuur. D'n otto knalt teegn e bôom. Iris overleeft d'n klap nie, moa nunder kiendje mè Peter kan nog gered wordn. Peter krygt ip 't fêest e vrêeselik telefongsje...

Sizoen 32

Lars wilt olles ip olles zettn vo Veronique te bevrydn uut d' andn van Koen. J' makt tegoare mè Mathias, Benny en Brigitte e plan. Olles is toet in de puntjes g'organiseerd, moa ze krygn ol rap miserie. Quinten beslist vo Hanne de woarheid te vertelln over Singapore en de rolle van Raymond. Raymond wacht nog olsan ip geld van Quinten en briekt t'ope mè em in by 't kantoor van CoBrew. Quinten probeert doa de boel zô lank meugelik te rekkn, omdan de flikkn ol anoniem getipt zyn. Hanne en Gaston duukn ounder by Thibaut. Brahim viendt d'n brief van Samira woarin da stoat da Kalid nie zyn echte voader is. J' is dul ip eur en verhuust noa 't studentnuus. Benny probeert d'n boel te kalmeern, moa da pakt nie. Oen Eva Finn komt oaln, is Finn spoorlôos. Rudi verwittigt Mieke en die ziet da d'n deure van eurn otto nog oopn stound en da Finn ezo is meegegôan. Hanne en Quinten kommn d'r ip 'tzelfste moment achter da Thibaut d'n zeune van Raymond is. J' wilt moeder en zeune nie loatn goan en Raymond ountdekt da Quinten de poliesje eit gebeld. Hanne en Gaston kunn uutendelik vluchtn. Quinten is ten einde road en duwt Raymond ounder nen otto die d'r an komt. Oen Lars uutendelik in de loft gerakt, ziet 'n e zwoare ruuzje tusschn Koen en Veronique woaby da ze em neresloat mè eurn laptop. Koen bluuft roerlôos liggn ip d'n ground...

Sizoen 33

Jelle leeft ol mêer of e weke oundergeduukt omdan 't em ol e stik d'n tyd t'opeweirkt mè de poliesje vo de bende van Daniel ip te pakkn. J' gift zyn adres an Jamila zoda ze mekoar kunn zien, moa Benny begunt d'r vanolles by te peizn. Louise wilt nog êne kêer oefenn mè Brahim, moa ze is ezeerd deure zyn ofwyzend gedrag. Ze ountdekt dat 'n gin contact mêer eit mè Liesje en beslist vo nie noa 't galabal te goan. Hanne oudt d'n ambras tusschn eur en Niko nie mêer uut en wilt weere verhuuzn. 't Lukt eur wel nie vo Niko te vergeetn, dundat ze bluuft. Ôok tusschn Louise en Brahim begunt d'r iet oen ze tegoare d'n tango dansn in d'n Jan & Alleman. Oen Jamila moe liegn over eur ofsproake mè Jelle, beslist Benny vo 't uus van Jelle in d' oge t' oudn. Je begunt direct te achtervolgn oen Jelle noa de stoasje goat vo Daniel te zien. Daniel wilt liever elders ofspreekn en Benny peist dan ze probeern te vluchtn, woardeure dat 'n d' operoatie van de poliesje hêlegans ommezepe elpt. Daniel blykt e woapen te ein en ziet deur Benny dat 'n in de val gelokt wudt. J' schiet d'r vandoor mè d'n otto van Samira binst da Jamila d'r nog in zit. 't Komt toet e confrontoatie woaby da Daniel dreigt vo Jamila nere te schietn. Benny kan zyn stiefdochter reddn, moa wudt zelve g'raakt...

Sizoen 34

Faroud makt em zörgn over Zjef, die ol e poar doagn vermist is, en j' verdinkt Joris d'r van da t'n mè Bert ounder êen oedje speelt. Lars gelooft em nie, dus zoekt Faroud zelve achter bewyzn, moa zounder succes. Stefanie biecht eur foutn ip an Sandra, die eur eign g'raakt voelt en probeert vo de band tusschn Benny en zyn dochter te repareern. Brigitte is curieus noa 't optreedn van Marcel. Oen j' eur ziet in 't publiek, is 't em van slag. Sandra eur wôordn helpn en Benny sprikt of mè zyn dochter. Juste oen Stefanie vertrekt, wudt ze aangereden deur nen otto. Brigitte zet eur preusheid an d'n kant, ziengt e liedje ip 't podium mè Marcel en briengt em azo weere vo de fans. Intusschn angt er e dreigienge over 't uwelik van Mieke en Joris deure Bert. Louise voelt eur nie goed achter e wilde nachte, moa gakt toch nog ip tyd ip d'n fêeste. Lars bluuft achterdochtig en viendt e roar adres ip d'n gsm van Joris. Faroud bevrydt Zjef doa, die verklapt da Joris en Bert dezelste persôon zyn en datter bommen liggn in de fêestzoale. Joris lokt Louise mè e smoeske 't bus in. J' biecht olles ip en gift eur zyn woapen: j' is eur biologische voader en j' wilt da ze em dôodschiet, aanders lat 'n d'n boel ountploffn. Louise schiet em nere, moa ze is te loate vo d'n bom te stoppn. Dankzy e telefongsje van Zjef an Rudi kan de familie nog vluchtn. Mieke is echter hêlegans in shock en bluuft allêne achter. Oen Zjef eur goat zoekn, ountploft d'n bom...

Webisodes

[bewerk'n | brontekst bewerken]

Sinds 2015 makt VTM webseries die ollêne online te zien zyn. Elken ofleverienge deurt round de 2 à 3 menuutn. In 2020 stopte Familie e poar moandn idder deure de corona-pandemie, en vo da gat ip te vulln kwam er 't Zit In De Familie , woavan dat d' ofleveriengn 5 menuutn of langer deurn.

  • De Zaak Bart (zomer 2015, 36 ofleveriengn): Oe da Bart zyn eign dôod feynste achter zyn miserie mè d'n Itoaliaanse maffiafamilie Gallo.
  • Nieuw Leven (herfst 2015, 17 ofleveriengn): Over d' ountwikkeliengn by Guido en Emma deure eur zwangerschap en d'n geboorte van Mila.
  • Niko Op De Vlucht (zomer 2016, 35 ofleveriengn): Achter d'n môord ip June is Niko êen van d' ôofdverdachtn en j' probeert uut d' andn van de poliesje te bluuvn.
  • Jacht op Guido & Emma (zomer 2017, 35 ofleveriengn): Ip vakanse in d' Ardennn wordn Guido en Emma upgejoagd deur nen handlanger van Ronald.
  • Loft Lars (winter 2017, 10 ofleveriengn): Lars zit upgeslootn in zyn loft mè zyn one-night-stand Marthe en belandt in e psychologisch spelletje.
  • Tour de Zjef (zomer 2018, 35 ofleveriengn): Zjef makt e roadtrip mè zyn voader Pierre en zyn grôte liefde Rudi.
  • Koorts (winter 2018-2019, 9 ofleveriengn): Marie eit droomn over Evy, die ze e poar weekn idder eit vermôord.
  • Spoorloos (zomer 2019, 36 ofleveriengn): In 1988 elpt Veronique Lars om zyn babyzusje Amélie weere te viendn.
  • Gestrikt (winter 2019, 7 ofleveriengn): E romantisch kestweekend vo Rudi en Zjef droait uut ip e gyselieng deur d'n Kestman.
  • 't Zit In De Familie (lente-zomer 2020, 17 ofleveriengn): Acteurs kykn weere noa d' ôogtepuntn uut de geschiedenisse van de soap.
  • Het Geheim van Raven (zomer 2021, 9 ofleveriengn): In 2019 goat Raven mè zyn moatn Britt en Arnold goan voarn mè d'n kano, mè olle gevolgn van dien.
  • De Grote Familiequiz (winter 2021, 14 ofleveriengn): Acteurs wordn uutgedoagd deur fans om te zien wien datter 't mêeste wit over de soap.
  • Raven en Louise In Het Nauw (zomer 2022, 9 ofleveriengn): Raven en Louise goan vo d' êeste kêer t'ope ip vakanse, moa da wudt e echte nachtmerrie.
  • Brahim & Jelle: Onbreekbare Vriendschap? (zomer 2023, 10 ofleveriengn): Brahim moe lettn ip 't uus van e regisseur en nôodigt Jelle uut.
  • Het ware gelaat van Joris (zomer 2024, 9 ofleveriengn): Wuk datter ollemolle mè Bert gebeurde vôorn dat 'n Joris Nuyens wierd.
  • Familegeheimen: Rube & Paul (zomer 2025, 9 ofleveriengn): In 2022 zoekt Rube Verdonck achter antwôordn over zyn biologische voader.

Boek'n

[bewerk'n | brontekst bewerken]

De boek'n goan mêestol over êen personoage in êen verhaallyne en geevn mêer uutleg over zaakn die ip tv nie te zien woarn. 't Is de bedoelienge dat er 4 boek'n per joar uutkommn.

In 1997 kwam d'r ôok ol êne kêer e leesboek uut mè d'n titel "De ontvoering".

Geboortn

[bewerk'n | brontekst bewerken]
SizoenKiendOuders
4Pierrot Van den BosscheRita Van den Bossche en † Dirk Cockelaere
6† Leen Van den BosscheJan Van den Bossche en Nele Van Winckel
7Hannah Van den BosscheBart Van den Bossche en † Brenda Vermeir
12† Lennert De WaeleMieke Van den Bossche en † Marc De Waele
13Guido Van den BosscheJan Van den Bossche en Linda Desmedt
14Dieuwke MitsidesEls d'Hollander en † Andreas Mitsides
14Louise Van den Bossche† Peter Van den Bossche en Trudy Tack de Rixart de Waremme
14Cédric Van de CaveyeVeronique Van den Bossche en Mario Van de Caveye
14Berre d'HollanderRené d'Hollander en Heidi Janssens
15Jelle Van den BosscheBart Van den Bossche en † Brenda Vermeir
17† Ruben MariënSuzy Mariën en Elke Baertsoen
19† Michaël Van den Bossche† Bert Van den Bossche en Lisa Deruyter
22Arthur Van den Bossche† Leen Van den Bossche en Jake Humphrey
25Mila Van den BosscheGuido Van den Bossche en Emma Verdonck
25† Alex HermansMaarten Van den Bossche en † Evy Hermans
28† Kasper Van de CaveyeCédric Van de Caveye en † Marie Devlieger
30Gaston Van den BosscheHannah Van den Bossche en Quinten Godderis
31Victor Van den Bossche† Peter Van den Bossche en † Iris Massant
34Bobbie De WulfLars De Wulf en Stefanie Coppens

Uwelikkn

[bewerk'n | brontekst bewerken]
SizoenOfleveriengeKoppelStatusKienders
2Ofl. 190† Marleen Van den Bossche en † Ben Van der VenneOuntboundn deure Marleen eurn dôodLovely Van der Venne
2Ofl. 246Anna Dierckx en Albert ThielensGetrouwd
4Ofl. 531† Herman De Bie en Ingrid Van den HeuvelOuntboundn deure Herman zyn dôod
4Ofl. 531Veronique Van den Bossche en † Giancarlo ParducciGescheid
4Ofl. 699Jan Van den Bossche en Nele Van WinckelGescheid† Leen en Maarten
5Ofl. 759† François Van den Bossche en † Mia DondeyneGetrouwd toet an nunder dôod
5Ofl. 874† Monique Stevens en † Didier De KunstGescheid
6Ofl. 1208† Guido Van den Bossche en Els d'HollanderOuntboundn deure Guido zyn dôod
7 en 14Bart Van den Bossche en † Brenda VermeirGescheid, ertrouwd, ountboundn deure Brenda eurn dôodHannah en Jelle
8Rita Van den Bossche en † Rob GerritsGescheid
9Ofl. 1902† Peter Van den Bossche en † Femke MaeterlinckOuntboundn deure Femke eurn dôod
11† Monique Stevens en Guy MaeterlinckOuntboundn deure Monique eurn dôod
11Jan Van den Bossche en Linda DesmedtGescheidGuido Van den Bossche
11† Walter Dierckx en † Carine WattezOuntboundn deure Carine eurn dôodKobe Dierckx
11Ofl. 2421Els d'Hollander en † Jo BerrevoetsOuntboundn deure Jo zyn dôod
12Guy Maeterlinck en † Annemarie GovaertOuntboundn deure Annemarie eurn dôod
13Mieke Van den Bossche en † Marc De WaeleOuntboundn deure Marc zyn dôod† Lennert De Waele
13René d'Hollander en Heidi JanssensGetrouwdBerre d'Hollander
13† Peter Van den Bossche en Trudy Tack de Rixart de WaremmeGescheidLouise Van den Bossche
14† Gustaaf Janssens en Isabelle SolieOuntboundn deure Gustaaf zyn dôod
14Els d'Hollander en † Andreas MitsidesOuntboundn deure Andreas zyn dôodDieuwke Mitsides
15Ofl. 3375Veronique Van den Bossche en Mario Van de CaveyeGescheidCédric Van de Caveye
16Ofl. 3516Mieke Van den Bossche en † Wim VeugelenGescheid
16† Bert Van den Bossche en Cixi Lao TsaiGescheid
20Ofl. 4403† Peter Van den Bossche en † June Van DammeGescheid
22Ofl. 5000† Marie-Rose De Putter en Mathias MoelaertGescheid
23Ofl. 5205† Dirk Cockelaere en Nathalie De BieOuntboundn deure Dirk zyn dôodGail en Justin
24Ofl. 5410Mieke Van den Bossche en Niko SchuurmansGescheid
24Ofl. 5510† Thomas Van den Bossche en Stefanie CoppensOuntboundn deure Thomas zyn dôod
26Ofl. 5988Rudi Verbiest en Zjef De MulderGescheid
27Ofl. 5989Veronique Van den Bossche en Mathias MoelaertGescheid
30Ofl. 6648Patrick Pauwels en Jenny VerstevenGetrouwd
31Ofl. 6917Veronique Van den Bossche en Lars De WulfGescheid
32Ofl. 7198Benny Coppens en Samira JibrellGetrouwd
33Ofl. 7303Mathias Moelaert en Vanessa MariënGetrouwd
34Ofl. 7572Mieke Van den Bossche en † Joris NuyensOuntboundn deure Joris zyn dôod (loater nietig verkloard)

Begingeneriek

[bewerk'n | brontekst bewerken]
Logo toet november 2014

D'r zyn ol verschillige intro's gebruukt vo Familie. In d' êeste neegn sizoenn zong actrice Jacky Lafon 't introliedje. De stiel van de intro veranderde styf mè de tydsproung in 1997. Van 't 10de toet 't 15de sizoen en van 't 16de toet 't 18de sizoen zong Koen Wauters twêe verschillige liedjes. In september 2009 kwam de vuufde versie, in'ezoungn deur Charlotte Therssen. Dat wos e Nederlandstoalige cover van The Show van Lenka.

Vanaf ogustus 2011 wos d'r e nieuwe intro. De titelsong wos weere e cover, deez'n kêer deur Maureen Vanherberghen (finaliste van Idool 2011). 't Wos e Vlamse versie van Stay The Night van James Blunt. Ip 14 november 2014 veranderde de generiek: 't liedje bleeft 'tzelste moa wierd nu gezoengn deur Mikaël Ophoff en Eva De Geyter (bekend van The Voice). De beelden krêegn van ton of e winter- en e zomerversie.

Ip 6 november 2017 wierd de generiek hêlegans upgefrist mè e nieuw liedje: Hemel voor ons twee van Stan Van Samang. D'n titelsong die vanof 4 november 2019 gebruukt wierd, wos geschreevn deur Miguel Wiels en Niels Destadsbader, en wierd gezoengn deur Destadsbader zelve.

Ip 29 ogustus 2022 wierd de generiek vo d'n tienstn kêer angepast mè Kleur van Camille lik nieuwe titelsong.

Overzicht

[bewerk'n | brontekst bewerken]
SizoenJoarZang
S1-S91991-2000Jacky Lafon
S10-S152000-2006Koen Wauters
S16-S182006-2009
S19-S202009-2011Charlotte Therssen
S21-S232011-2014Maureen Vanherberghen
S24-S262014-2017Mikaël Ophoff en Eva De Geyter
S26-S282017-2019Stan Van Samang
S29-S312019-2022Niels Destadsbader
S32-...2022-nuCamille

Tijdsproungn

[bewerk'n | brontekst bewerken]

De reekse eit twêe kêers e vroung g'makt van e poar joar: ip 6 januoari 1997 sproung 't verhoal zeve joar vodder, en ip 4 september 2006 giengen ze drie joar de toekomst in.

Trivia

[bewerk'n | brontekst bewerken]
  • In 2006 was 't Familie Fêest (of d'n Familiedag) in 't Wijnegem Shopping Center. Round de 80.000 fans kwoamn d'r kykn noa de acteurs.
  • Ip RTL wos d'r ôoit e Fransche versie van Familie te zien: Affaires de Famille, over de familie Du Bosc.

Referensjes

[bewerk'n | brontekst bewerken]
  1. ↑ Oudste soap van het continent (Familie) maakt tijdsprong van drie jaar, nieuwsblad.be (12 juni 2006).

Externe koppeliengn

[bewerk'n | brontekst bewerken]
Overgenomen van "https://vls.wikipedia.org/w/index.php?title=Familie&oldid=324582"