Guillaume Charlier

Van Wikipedia
Naar navigatie springen Naar zoeken springen
Monument van Lippens en De Bruyne deur Guillaume Charlier ip den dyk van Blanknberge
Groep blende deur Charlier vo de kathedroale van Dôornik

Guillaume Charlier (Elsene, 1854 - Sint-Joost-ten-Node, 1925) was e beeldhouwer uut 't Brusselse die vele ip vakanse kwam in Blanknberge.

Leven en werk[bewerkn | brontekst bewerken]

Charlier was den oudstn van e krôostryk gezin. Ot 'n viftiene was gieng ze voader dôod. Je was verplicht van by verschillige kunstnoars te goan werkn vo de menoage t' helpn ounderhoudn en vo ze studies te kunn betoaln. Negen joar loater, in 1879, kocht de mecenas Henri Van Cutsem zyn êeste werk en da was vor hem 't begun van e comfortabel burgerleevn. Charlier verblêef e poar moandn in Italië en kwam azo in contact met antieke kunst, moa je was surtout g'interesseerd in de geweune menschn ip stroate. In de loop van zyn carrière het 'n verschillige thema's gebruukt, lik religieuze ounderwerpn en scènes uut 't leevn van oarme menschn woarin dat de moederfigeure e belangryke rolle speelde. Je gienk vele ip vakanse in Blanknberge en je dêe nie liever of klappn over 't werk van de visschers en de geweune menschn ip de piere of ip den dyk. Charlier was ook e grôot portrettist en j'he vele werkn gemakt vor oopnboare plings in België. Die bestelliengn woarn 't bewys da zyn kunst officieel erkend wierd. Me ze jovioal en socioal karakter dêe Charlier mee an 't cultureel leevn van zyn tyd. Je was lid van La société Nationale des Beaux-Arts en de kunstenoarsgroep Les XX. De mêeste van zyn werkn zyn te viendn in 't Museum vo Schône Kunstn in Dôornik en in 't Charliermuseum in Brussel.

Blanknberge[bewerkn | brontekst bewerken]

  • E rampe noa den dyk in Blanknberge is vernoemd noa Charlier: de Charlierhelling
  • 't Monument van Lippens en De Bruyne ip de zêedyk en 't monument "Moedersmart" ip 't kerkhof van Blanknberge zyn werkn van hem.
  • Vlakby de viertorre, ip 't ende van den dyk an d' estacade, stoat 't standbeeld van e visscher an 't roer, "De Stuurman". 't Standbeeld dateert van 1960. Ter êre van de Blanknbergsche visschers is 't ofgegootn gewist van e beeld in ploaster, gemakt deur Guillaume Charlier in 't joar 1900. 't Monument wordt in Blanknberge "Sterken Dries" genoemd. Sterken Dries was de lapnoame van de Blanknbergsche visscher Andries Jurewyt die leefde van 1818 toet 1896.
Wikimedia Commons