Henry Du Mont

Van Wikipedia
Naar navigatie springen Jump to search
Dat artikel es oorsprounkelik geschreevn in 't Kustwestvlams.

Henry Du Mont

Henry Du Mont (ook: Henri of Henry Dumont en Henry Du Mont de Thier) (Borgloon (Groafschap Loon in 't Prinsbisdom Luuk), 1610 - Parys, 8 meie 1684) was e Limburgsche compositeur, dirigent, orgel- en klavecimbelspeler.

Je was de zeune van Henry de Thier en Elisabeth Orban. De familie De Thier weunde van begun 1613 toet 1620 in Luuk en doarachter verhuusdn ze noa Maastricht. In 1621 wierdn Henry en zyn broere Lambert kôorknoapn in d' Onze-Lieve-Vrouwekerke van Maastricht. In 1629 wierd Henry benoemd toet orgelspeler. Je mocht ook ip studiereize goan vo zyn vakbekwoamheid te verbetern. Je studeerde by Léonard de Hodémont, kôorleider (maître de chant) in de Sint-Lambertuskathedroale in Luuk.

Den 1stn december 1632 kwam zyn broere Lambert orgelspeler van d' Onze-Lieve-Vrouwekerke van Maastricht in zyn plekke. In 1638 vertrok Henry noa Parys en je wierd doar in april 1643 benoemd toet orgelspeler in d' Église Saint-Paul. Je veranderde in dien tyd ook zyn noame van De Thier noa Du Mont. Vanof 1652 wierd 'n klavecimbel- en orgelspeler an 't hof van den hertog van Anjou Philippe van Orléans, e broere van Louis XIV van Frankryk en vanof 1660 ook van de joenge keuniginne Maria Theresia van Ôostnryk, êeste vrouwe van de keunienk. Den 8ste juli 1663 wierd 'n benoemd toet sous-maître de la Chapelle royale (dirigent-kôorleider) in Versailles en verder toet commanditair abt van d' abdie in Silly-en-Gouffern by Lisieux. In 1672 wierd 'n benoemd toet hofkapelmêester (compositeur de musique de la Chapelle royale) en in 1673 toet kapelmêester van de keuniginne (Maître de musique de la Reine). In 1683 toet an zyn dôod wast 'n allêne nog orgelspeler in d' Église Saint-Paul.

Du Mont was getrouwd mè Mechthilde Loyens, de dochter van e burgemêester van Maastricht. Toet 1676 wast 'n kanunnik van 't kapittel van Sint-Servoas in die stad.

Externe link[bewerkn | brontekst bewerken]