Novosibirsk

Novosibirsk Новосибирск
Liggienge in Rusland
Federoal district	Siberië
Federoal subject	Oblast Novosibirsk
Coördinoatn	🌍 55°1′0″N 82°56′0″O
Ippervlak	502,7 km²
Inweuners	1.637.266 (2025)
Website	www.novo-sibirsk.ru

Novosibirsk (Russisch: Новосибирск) is e stad in Rusland. 't Is 't administratief centrum en de grotste stad van den Oblast Novosibirsk en 't Federoal District Siberië. Volgns de volkstellienge van 2021 telde de stad 1.633.595 inweuners, woarmee da 't achter Moskou en Sint-Petersburg de derde mêest bevolkte stad van Rusland is. Novosibirsk ligt in 't zuudwestn van Siberië, an de oevers van de riviere de Ob.

Novosibirsk wierd in 1893 gesticht ip 't kruuspunt van de riviere de Ob met de toekomstige Trans-Siberische spoorlyne, woar dat de Novosibirsk-spoorbrugge angeleid wierd. De plekke wierd in 't begun Novonikolaïevsk genoemd ter êre van tsar Nikolai II en groeide al zêre uut tout e belangryk transport-, commercieel en industrieel centrum. 't Wierd verwoest deur de Russische Burgeroorlog, moar herstelde binst de vroege Sovjetperiode en krêeg in 1926 de noame van nu, Novosibirsk. Ounder leidienge van Jozef Stalin kwam Novosibirsk êen van de grotste industriële centra van Siberië.

Ênigte beziensweirdigheedn in Novosibirsk zyn de neo-Byzantynsche Alexander Nevski-kathedroale, 't Novosibirsk Opera- en Ballettheoater en de Zoo van Novosibirsk. De Luchthoavn Tolmatsjovo is 't drukste vliegpling in Siberië.

• 
  Alexander Nevski-kathedroale
• 
  Novosibirsk Opera- en Ballettheoater
• 
  Stoasje van Novosibirsk

Ofbeeldiengn die ier by passn ku je vien in de categorie Novosibirsk van Wikimedia Commons.