Orkoan Kirk (2024)

Orkoan Kirk noadert ip 4 oktober 2024 zyn piekintensiteit in den Atlantischn Oceoan.

Spoor en intensiteit van Kirk, gekleurd ip boasis van de Saffir-Simpson Hurricane Wind Scale.

Orkoan Kirk wos e grôte krachtige tropische cycloon die vele schoade anrichtte in dêeln van West-Europa in oktober 2024, achter dat 'n overgegoan wos in een Europeesche storm. Kirk, den 11e genoamde storm, 7e orkoan, en 3e grôotn orkoan (orkoan mè wiendsnelheedn van mêer of 110 mph, of 177 km/h) van 't Atlantisch orkoansezoen 2024, ountstound van e klêen lêgedrukgebied dichteby Koapverdië. Satellietbeeldn ip 29 september tôogdn dat de storm verergerd wos tout e tropische depressie. De volgndn dag wierd 't tropische storm Kirk.

Kirk piekte ip 4 oktober, mè wiendsnelheedn van 240 km/h (150 mph), moa da wos in 't middn van den Atlantischn Oceoan, verre weg van menschn. Doarachter wierd 'n were zwakker. Binst dat 'n oostwoarts richtienge West-Europa trok, wierd Kirk de 5e storm van 't 2024-25 Europees stormsezoen. Zeker 7 tornado's en 2 woaterhoozn woarn gemeld in Europa achter da Kirk doar an land kwam.

Gevolgn

In Vrankryk is 1 mens gestorvn deur Kirk. 't Departement Seine-et-Marne in Île-de-France wos 't mêest getroffn deur de zwoare reegn, met huuzn die overstroomd woarn en mêerdere boann geblokkeerd. In België leidde een overstromienge in de stad Couvin tout d'activerienge van 't gemeentelik nôodplan.