Rotse (vis)

E rotse in en aquarium

Ryk:	Animalia (Bêestn)
Stamme:	Chordata (Chordata)
Klasse:	Actinopterygii (Stroalvinnign)
Orde:	Cypriniformes (Karperachtign)
Familie:	Cyprinidae (Echte karpers)
Geslacht:	Scardinius (Rotsn)

Sôorte

Scardinius erythrophthalmus
Linnaeus, 1758

Rotsn (Scardinius erythrophthalmus) zyn visschn uut de familie van de karpers die van nateure vôornkommn in zoet woater in West-Vloandern.

Verspreidienge

Ôorsprounkelik kommn ze vôorn in verre hêel Europa en in hêle stikkn van Azië. Oundertusschn zyn ze ouk uutezet in oundermêer de Verênigde Stoatn, Ierland, Spanje, Nieuw-Zêeland, Canada en Madagascar, oltemets met catastrofoale gevolgn voun 't visbestand doa.

Ze leevn surtout in woater die nie ol te zêre stroomt en woa dan der vele plantn in stoan, ol zyn der ouk die kunn overleevn in brak woater. Ze kunn goed teegn warm woater woa dat er nie ol te vele zuurstoffe in zit, mo nie teegn vervulienge (bevôorbeeld van fabriekn). 't I doamei dan der bykan gin rotsn zittn in riviern woa dat er vele industrie an is.

Beschryvienge

Rotsn zyn mêestol brounsgroene vanboovn en zilverkleurig vanounder en surtout nunder rôo vinn volln up. Ze zyn smol en langwerpig, mo ze kommn wel ogger me te veroudern. Ze kunn bykan 50 cantmeiter lank kommn, mo mêestol groakn ze mor an e cantmeiter of 35. Ze weegn toune en oovn kilo, ol is er ol êen evangn die mêer of e kilo 'n oof wôog. Nunder oge is gilf en nundern mound stoa no boovn voun bêestjes te vangn die an d'uppervlakte van 't woater zwemmn of dryvn. Z'eetn ouk e masse algn en plantn, 't i doamei dan ze beter nie in vyvertjes estookn zyn. Ze zwemmn mêestol in kleine groeptjes round tusschn de plantn an de kant.

Tusschn april en juli leggn de wuvetjes 200 000 eiers, die an woaterplantn bluuvn plakkn. Doaruut kommn der joungsjes uut die der nog nie ol te styf uutzien lyk nunder ouders, oundermêer omda nunder vinn nog nie rôod zyn.

Ofbeeldiengn die ier by passn ku je vien in de categorie Scardinius erythrophthalmus van Wikimedia Commons.