Woaterspuger

Woaterspuger an de collegioale Sint-Moartnskerke van Colmar in Vrankryk die ne jood voorstelt die 't gat van den duvel an 't lekkn es.

Ne woaterspuger, of gargouille in 't Frans, es en functioneel en decoratief element an de doakn van oge gotische gebouwn.

Woaterspugers zyn functioneel omdan ze zynder 't reinwoater van de doakn ofvoern zounder dat et lanks de meurn na benêen lopt en vochtigeid kut geevn. Ze zyn decoratief omdan ze bykans osan kluchtige, fantastische ofbeeldiengn zyn van persoonn, beestn of mounsters.

Kerkn en kathedroaln zyn van binn illige, gewyde plekkn. Moar an 'n buutnkant addn de bouwers vry spel en ze lietn under toun ook goane. Woaterspugers woarn de bouwelementn by uutstek voe under fantasatie te toogn en voe te lachn mit de geweune mienschn of mit de geestelikeid. Juste doardeure zyn woaterspugers getuugn van de fantasie van de middeleeuwsche mienschn.

Typische figeurn die ofgebeeld woarn lik woaterspugers:

• simpele mienschn, boern
• de bouwvakkers zevve
• geestelikkn, voe te toogn dan ze zynder ook nie osan even katholiek en woarn
• joodn, die in de middeleeuwn dikkers et mikpunt van spot woarn
• exotische beestn, en verwyzienge noa de kruusvoartn uut dienen tyd
• duvels en mounsters, vo de geweune mienschn benauwd te moakn

• 
  Woaterspuger an d'Ouze-Lieve-Vrouwekerke van Kortryk
• 
  Woaterspuger an de Sint-Janskathedroale van Den Bosch, Olland
• 
  Woaterspugers up de Munster van Freiburg, Duutsland

Ofbeeldiengn die ier by passn ku je vien in de categorie woaterspugers van Wikimedia Commons.