Alessandro de' Medici

Alessandro de' Medici

Alessandro de' Medici, bygenoamd il Moro, (22 juli 1510 - 6 januoari 1537) was hertog van Penne van 1523. Je regeerdeg’ over Firenze van 1530 en was hertog van Firenze van 1532 tout an z’n dôod. Je krêeg zyn bynoame il Moro, omdat ‘n e moorse moeder aad.

Je was ‘t latste lid van de Cafaggiolo, den hoofdtak van de Medici, die regeerde over Firenze en den êestn hertog woavan da den titel erfelik wierd.

Zyn leevn

Alessandro was de zeune van Giulio de' Medici en verzekers Simonetta da Collavechio, e bediende in ’t Medicipaleis woamee da Giulio e korte reloasje aad vô den tyd dat ‘n kardinoal was. Da most stille g’oudn wordn en Alessandro wierd ipgebrocht in ’t Palazzo Medici, officieel ols de zeune van Lorenzo II, tegoare me Lorenzo ’s dochter Catharina en Ippolito de' Medici, de zeune van Giuliano, hertog van Nemours. In 1523 krêegt ‘n ol ‘t hertogdom Penne van z’n voader de paus.

Achter de plunderienge van Rome in 1527 deur de troepn van Karel V, profiteerdn de Florentynn van de chaos in Itoalië vo de republiek were in te voern en de Medici mostn vluchtn.

Loater sloot paus Clemens were vrede me Karel V en je kost em overtuugn vor ’n ende te moakn an de republiek Firenze en de Medici were an te stelln. Nog ’n overêenkomste was da de keizer z’n dochter Margaretha van Parma, die ton nog e klêen meisje was, zou loatn trouwn met Alessandro.

Achter drie joar, in de zomer van 1530, kostn de Medici were an de macht kommn en Clemens kost gedoan krygn van Alessandro te loatn regeern in plekke van Ippolito. Alessandro was pertang nie geirn gezien in Firenze deur z’n grof, arrogant, ounbeschoft en gewelddoadig karakter. In 1532 schafte Keizer Karel de signora of en benoemde Alessandro tout hertog van Firenze.

In 1535 krêeg Ippolito ipdracht van de Florentynsche opposiesje vo te goan klappn me Keizer Karel, vor Alessandro uut de regerienge te krygn. Binst z’n reize wierd ‘n ziek en ênigte doagn loater stierft ‘n, officieel an Malaria. Mo je zou vergiftigd gewist zyn in ipdracht van Alessandro.

Vrouwe en jounges

Giulia de' Medici me Maria Salviati deur Pontormo

Ip 29 februoari 1536 trouwde Alessandro me Margaretha van Parma, mo met eur aad ‘n gin jounges. J’a wel drie ounwettige jounges. D’êeste twêe, e zeune Giulio en e dochter Giulia, woarn van zyn maîtresse Taddea Malespina. Porzia was van ‘n ounbekende moeder en is geboorn achter eur voaders dôod.

• Giulio (ca. 1532-1600) trouwde me Lucrezia Gaetani.
• Guilia (ca. 1534-1588) trouwde me Francesco Cantelmo, groaf van Alvito en hertog van Popoli en loater me Bernadetto de' Medici, prins van Ottaiano.
• Porzia (1538-1565) wierd nunne.

Guilio en Guilia de’ Medici zyn de vôorouders van veel oadelikke families van nu.

Achter Alessandro’s dôod in 1537, kwoamn zyn jounges ounder de vôogdye van zyn ipvolger Cosimo I de' Medici en ze wierdn ipgebrocht lik z’n eign jounges. Cosimo 's moeder Maria Salviati stichtte 't Augustynerklôoster San Clemente in Firenze, woa da Porzia nunne wierd.

Zyn dôod

In januoari 1537 wierd Alessandro zelve vermôord deur Lorenzino de' Medici, bygenoamd Lorenzaccio, van de zytak de Popolani van de Medici, die ofstamde van Lorenzo den Oudn, de joungere broere van Cosimo den Oudn (zie stamboom).

Lorenzino vluchtte no Venetië, woa dat ‘n in 1548 vermôord wierd deur heurmôordenoars, in ipdracht van z’n kozyn Cosimo I, die achter de vlucht van Lorenzino verkoozn was ols ipvolger van ‘t hertogdom. Cosimo I was den êestn van de zytak die over Firenze regeerde.

Medici-stamboom

Mega-Zone - Firenze (Cafaggiolo- en Popolani-tak)