Michel Platini

Michel Platini (Jœuf, 21 juni 1955) wos nen Franschn foetbollist en es vôorzittr van den Europeeschn foetbolbound UEFA.

Voetbolcarrière

Clubvoetbol

In zyn jeugd i Platini lêern voetbolln ip stroate, ol spelend me zyn moatn. Ie doorloopt de jeugdrangn by et lokoal clubke in Jœuf. Zyn drôoms wos te meugn speeln by zinne favorietn club, FC Metz. An zin 15 joar krigt em dorvo de kanse, mo je gerakt nie deur de medische tests deur zyn slichte capacityt vo oasem te oaln. Uutendelyk grakt em in september 1972 wel ande bak by AS Nancy-Lorraine. Ondanks wa blessures vindt em er aglik zyn droai en komt ie de sterre van de club inde Fransche twêede klasse. In 1975 word'n ze kampioen en goan ze na êerste klasse. Dire joar loater winn'n ze la Coupe de France, den Franschn beker. In 1979 werd em getransfereerd na Saint-Étienne. By Les Verts i Platini wok succes. Zynnen vryn trap blikt dikkels e dôodelyk woapn te zyn vo den teegnstand. In 1981 word'n ze kampioen van Vrankryk. Ondertusschn kenn'n ze Platini international wok ol. In 1982 krigt Platini e transfer na Juventus Turyn. By de oude madame vliegt em van succes na succes. Ze komm'n kampioen van Itoalië in 1984 en 1986. Ze winn'n den Europeeschn Beker vo Bekerwinnoars in 1984 en in tzelfde joar ôok den Europeeschn Supercup. E joar loater zyn ze ôok de beste in Europacup I en in de Weireldbeker vo Clubs. Toch es et joar 1985 ôok êen me e zwort randje deur et Heizeldrama bist de finale van Europacup I ip de Heizel tusschn Juventus en Liverpool, woarby da Platini den enigstn goal scoordigde. Persôonlyk volt platini ôok inde pryzn. Van 1984 tot 1986 endigdt ie drie kêers achter mekoar et sezoen als topscorer in Itoalië. Ie krigt van 1983 tot 1985 drie kêers de Godd'n Bolle, den prys vo bestn speler.

Nationoaln ploeg

Deur zyn goe prestoaties es Platini dikkels geselecteerd gewist vo Les Bleus. Ie it 72 caps ip zyn noame stoan en wos kapiting vande Fransche nationoale ploeg van 1979 tot 1987. Ulder grôotste succes wos et winn van et Europeesch Kampioenschap in 1984 achter in de finoale Spanje te versloan me 2-0. Platini i vo Vrankryk vele goals gemakt en wos me 41 gols gescoord tusschn 1976 en 1987 tot 17 oktober 2007 de recordouder van meest gemakte gols vo Vrankryk totda Thierry Henry da gebrookn it.

Achter zyn carrière

Trainer

Platini stopt me actief voetbol in juni 1987. Mo in 1988 werd ie ol gevraagd vo Henri Michel te remplaceern als trainer van Vrankryk, achter da ze ulder nie ad'n kunn'n kwalificeern vo't EK van 1988. Platini accepteert et en wordt ip 1 november vanda joar bondscoach. Ie krig carte blanche vo e nieuw topteam te moakn teegn 't EK van 1992. In't begun lôop et nie zo goe en de kwalificatie vo't WK van 1990 oaln ze nie. In de kwalificoaties vo 't EK 1992 in Zweedn goa et bère goe en Vrankryk goa als favoriet derna toe. Mo ip et EK ontgoocheln ze en liggn ze de uut achter de groepsfoazn. Michel Platini pakt ip 2 juli 1992 ountslag.

Organisateur

Sinsn januoari 1992 es Platini ton vice-vôorzitter van de FFF, de Fédération française de football. In die functie ielptem vo d'organisoatie vant weireldkampioenschap da in 1998 in Vrankryk godd'n werd. Ôok maktie internationoal carrière in den UEFA. Van 1988 tot 1990 wostie ol lid van Comité vo technischn ountwikkelienge dervan. Vanaf 2002 wostie lid van uutvoerend comité van de UEFA en de FIFA. Ip 26 januoari 2007 werdtie benoemd als vervanger van Lennart Johansson als vôorzittr van de UEFA.