Michel Platini

Michel Platini

Michel Platini (Jœuf, 21 juni 1955) wos nen Franschn foetbollist en es vôorzittr van den Europeeschn foetbolbound UEFA.

Voetbolcarrière

Clubvoetbol

In zyn jeugd i Platini lêern voetbolln ip stroate, ol spelend me zyn moatn. Ie doorloopt de jeugdrangn by et lokoal clubke in Jœuf. Zyn drôom wos te meugn speeln by zyne favorietn club, FC Metz. An zyn 15 joar krygt ie em dorvo de kanse, mo je gerakt nie deur de medische tests deur zyn slichte capaciteit vor oasem t'oaln. Uutendelik grakt ie em in september 1972 wel an de bak by AS Nancy-Lorraine. Ondanks wa blessures vindt ie em er aglik zyn droai en komt ie de sterre van de club in de Fransche twêede klasse. In 1975 wordn ze kampioen en goan ze na êerste klasse. Drie joar loater winn ze la Coupe de France, den Franschn beker. In 1979 werd ie em getransfereerd na Saint-Étienne. By Les Verts i Platini ôok succes. Zynen vryen trap blykt dikkels e dôdelik woapn te zyn vo den teegnstand. In 1981 wordn ze kampioen van Vrankryk.

Ondertusschn kenn ze Platini international ôok ol. In 1982 krygt Platini e transfer na Juventus Turyn. By de oude madame vliegt ie em van succes na succes. Ze kommn kampioen van Itoalië in 1984 en 1986. Ze winn den Europeeschn Beker vo Bekerwinnoars in 1984 en in 't zelfde joar ôok den Europeeschn Supercup. E joar loater zyn ze ôok de beste in Europacup I en in de Weireldbeker vo Clubs. Toch es et joar 1985 ôok êen me e zwort randje deur et Heizeldrama bist de finale van Europacup I ip de Heizel tusschn Juventus en Liverpool, woarby da Platini den enigstn goal scoordigde. Persôonlik volt Platini ôok in de pryzn. Van 1984 tot 1986 endigt ie drie kêers achter mekoar et sezoen als topscorer in Itoalië. Ie krygt van 1983 tot 1985 drie kêers de Goudn Bolle, den prys vo bestn speler.

Nationoaln ploeg

Deur zyn goe prestoaties es Platini dikkels geselecteerd gewist vo Les Bleus. Ie it 72 caps ip zyn noame stoan en wos kapiting van de Fransche nationoale ploeg van 1979 tot 1987. Ulder grôotste succes wos et winn van et Europees Kampioenschap in 1984 achter in de finoale Spanje te versloan me 2-0. Platini i vo Vrankryk vele goals gemakt en wos me 41 goals gescoord tusschn 1976 en 1987 tot 17 oktober 2007 de recordouder van meest gemakte goals vo Vrankryk tot da Thierry Henry da gebrookn it.

Achter zyn carrière

Trainer

Platini stopt me actief voetbol in juni 1987. Mo in 1988 werd ie ol gevraagd vo Henri Michel te remplaceern als trainer van Vrankryk, achter da ze ulder nie addn kunn kwalificeern vo 't EK van 1988. Platini accepteert et en wordt ip 1 november van da joar bondscoach. Ie kryg carte blanche vo e nieuw topteam te moakn teegn 't EK van 1992. In 't begun lôop et nie zo goe en de kwalificatie vo 't WK van 1990 oaln ze nie. In de kwalificoaties vo 't EK 1992 in Zweedn goa et bère goe en Vrankryk goa als favoriet derna toe. Mo ip et EK ontgoocheln ze en liggn ze der uut achter de groepsfoazn. Michel Platini pakt ip 2 juli 1992 ountslag.

Organisateur

Sinsn januoari 1992 es Platini ton vice-vôorzitter van de FFF, de Fédération française de football. In die functie ielpt ie em vo d'organisoatie van 't weireldkampioenschap da in 1998 in Vrankryk g’oudn werd. Ôok makt ie internationoal carrière in den UEFA. Van 1988 tot 1990 wost ie ol lid van 't Comité vo technischn ountwikkelienge dervan. Vanaf 2002 wost ie lid van 't uutvoerend comité van de UEFA en de FIFA. Ip 26 januoari 2007 werd ie benoemd als vervanger van Lennart Johansson als vôorzittr van de UEFA.

Ofbeeldiengn die ier by passn ku je vien in de categorie Michel Platini van Wikimedia Commons.